ފަރެސްމާތޮޑާ އެއާޕޯޓްގެ ރަންވޭ ބޮޑު ކުރަން އެދެނީ

ގދ. ފަރެސްމާތޮޑާ އެއާޕޯޓުގައި އަޅަން ނިންމާފައިވާ ރަންވޭގެ ސައިޒު ބޮޑުކޮށްދިނުމަށް އެދެން ގދ.އަތޮޅު ކައުންސިލުން ނިންމައިފިއެވެ.

ފަރެސްމާތޮޑާ ހިމެނޭ ސަރަޙައްދުގެ ކުދި ފަޅުރަށްތަކާއެކު ޖުމްލަ 19.9 ހެކްޓަރުގެ ބިން އެމްޓީސީސީން ވަނީ މިމަޝްރޫޢުއަށްޓަކައި ހިއްކާފައެވެ. 1200 މީޓަރުގެ ރަންވޭއަކާއެކު ތަރައްޤީކުރާ ފަރެސްމާތޮޑާ އެއަރޕޯޓަކީ އެތެރޭގެ އުދުހުންތަކަށް ޚާއްސަކޮށް ތަރައްޤީކުރާ އެއަރޕޯޓެކެވެ. ބަޖެޓުން 144.8 މިލިއަން ރުފިޔާއަށް ކުރިއަށްގެންދާ މިމަޝްރޫޢަކީ ފަރެސްމާތޮޑާ ރައްޔިތުންނާއި އެސަރަޙައްދުގެ ރަށްތަކުގެ ރައްޔިތުންގެ އުއްމީދާ ގުޅިފައިވާ އެއަރޕޯޓެކެވެ.

އެއާޕޯޓްގެ ރަންވޭ ބޮޑު ކުރުމަށް ނިންމައި އަތޮޅު ކައުންސިލުން ފާސްކުރީ 1،800 މީޓަރުގެ ރަންވޭއެއް ފަރެސްމާތޮޑާ އެއާޕޯޓްގައި އަޅައިދިނުމަށް ސަރުކާރުގައި އެދުމަށެވެ. މިމަހު 14 ވަނަ ދުވަހު އޮތް ކައުންސިލްގެ ބައްދަލުވުމުގައި ބައިވެރިވި ނުވަ މެންބަރުންގެ ތެރެއިން އައް މެންބަރުން އެ ހުށަހެޅުމަށް ތާއީދުކޮށްފައެވެ.

ފަރެސްމާތޮޑާ އެއަރޕޯޓް ތަރައްޤީކުރަނީ އެ ސަރަހައްދުން ބޮޑު ބައެއް ހިއްކައިގެން ކަމުން އެެއަރޕޯޓާއި ފަރެސްމާތޮޑާ ގުޅާލުމަށް ނިންމާފައިވަނީ ކޯޒްވޭއަކުންނެވެ. މި ކޯޒްވޭގެ މަސައްކަތްވެސް އަންނަ ޖޫންމަހުގެ ނިޔަލަށް އެއްކޮށް ނިންމުމަށް އެމްޓީސީސީން ވަނީ އަމާޒު ހިފާފައެވެ.

ރާއްޖޭގެ ކޮންމެ ރަށަކުން ލޯންޗެއްގައި 30 މިނެޓުން ދަތުރުކޮށް ދެވޭހާ ކައިރީގައި އެއަރޕޯޓެއް ތަރައްޤީކުރުމަށް ސަރުކާރުން ވެފައިވާ ވަޢުދގެ ދަށުން މ. މުލީގައިވެސް އެއައރޕޯޓެއް އެޅުމުގެ މަސައްކަތް އަންނަނީ ކުރަމުންނެވެ. މީގެއިތުރުން ބ. ތުޅާދޫ، ށ. ބިލެތްފަހި، ތ. ވިލުފުށި، ހދ. މަކުނުދޫ، ފ.މަގޫދޫގެ އިތުރުން ރ.އަތޮޅުގެ ދެކުނު ބިތުގައި އެއަރޕޯޓް ތަރައްޤީކުރުމުގެ މަސައްކަތްވެސް ސަރުކާރުންވަނީ އިއުލާންކުރައްވާފައެވެ. 133މިލިއަން ޑޮލަރު ހޭދަވާނެ ކަމަށް ބެލެވޭ މި 6 އެއަރޕޯޓްގެ މަސައްކަތް ކޮށްދޭނެ ބަޔަކު ހޯދުމަށް ވަނީ ހުޅުވާލާފައެވެ.