ޔޫކުރެއިން ހަނގުރާމައާއި ގުޅިގެން އިނގިރޭސިވިލާތުން ރަޝިއާއާއި ދެކޮޅަށް ގެންގުޅެމުން އަންނަ އުދުވާނީ ސިޔާސަތުގެ ސަބަބުން، އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ރަޝިއާއަށް ވަނުން އެގައުމުން މަނާކޮށްފިކަން މޮސްކޯއިން ހާމަ ކޮށްފިއެވެ.
ރަޝިއާގެ ފޮރިންގ މިނިސްޓްރީން ހާމަ ކޮށްފައިވާ ގޮތުގައި، ރަޝިއާށް ވަނުން މަނާކޮށްފައިވާ، އިނގިރޭސި ސަރުކާރުގެ އިސްފަރާތްތަކާއި އަދި އެގައުމުގެ ސިޔާސީ އިސް ފަރާތްތަކުގެ ތެރޭގައި 13 އޮފިޝަލަކު ހިމެނެއެވެ. އަދި މީގެ ތެރޭގައި، އިނގިރޭސި މިހާރުގެ ބޮޑުވަޒީ ޖޯންސަންގެ އިތުރުން، އެގައުމުގެ ކުރީގެ ބޮޑުވަޒީރު ތެރޭސާ މޭއާއި، އިނގިރޭސިވިލާތުގެ މިހާރުގެ ފޮރިންގ ސެކެޓްރީ ލިޒް ޓްރަސްއާއި، ފަރސްޓް މިނިސްޓަރ އޮފް ސްކޮޓްލޭންޑް ނިކޯލާ ސްޓާރޖިއޮންވެސް ހިމެނެއެވެ.
"މި ފިޔަވަޅަކީ، ރަޝިއާގެ އޮފިޝަލުންނާއި ދެކޮޅަށް އަޅާފައިވާ ފިޔަވަޅުތަކާއި، އިނގިރޭސި ސަރުކާރުން ރަޝިއާއާއި ދެކޮޅަށް ގެންގުޅެމުން އަންނަ އުދުވާނީ ސިޔާސަތުގެ ސަބަބުން އަޅާލައިފާ ފިޔަވަޅުތަކެއް،" ރަޝިއާގެ ފޮރިންގ މިނިސްޓްރީން އާންމު ކޮށްފައިވާ ބަޔާނުގައި ބުނެފައި ވެއެވެ. މި ބަޔާނުގައި ވާގޮތުން މި ލިސްޓް ކުރިޔަށް އޮތްތަނުގައި އިތުރަށް ފުޅާ ކުރެވޭނެއެވެ.
ރަޝިއާއިން މިހާރުވެސް ވަނީ އެމެރިކާގެ ރައީސް ޖޯ ބައިޑްންގެ އިތުރު އެގައުމުގެ ސީނިއަރ ގިނަ އޮފިޝަލުންވެސް ރަޝިއާއަށް އެތެރެވުން މަނާ ކޮށްފައެވެ.
ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފޭށުމާއި ގުޅިގެން އެމެރިކާއާއި އިގިރޭސިވިލާތުގެ އިތުރުން ޔޫރަޕިއަން އިއްތިހާދުންވެސް ދަނީ ރަޝިއާއާއި ދެކޮޅަށް އިގްތިސާދީ ގޮތުން ދަތިކުރުމުގެ ހަރުކަށި ފިޔަވަޅުތައް އަޅަމުންނެވެ. މީގެ ތެރޭގައި ރަޝިއާގެ ފައިނޭންޝަން ސެކްޓަރގެ އިތުރުން، ޕުޓިންއާއި ގާތްކަން ބާއްވަމުންދާ އެގައުމުގެ މުއްސަދި މަހުޖަނުންވެސް ހިމެނެއެވެ.
