ޗެއަރޕާސަންކަން ލިބިެއްޖެނަމަ އެމްޑީޕީގައި ވެރިކަންކުރާ ޕާޓީގެ ކުލަ ޖައްސާނެކަމަށް އިކޮނޮމިކް މިނިސްތަރ ފައްޔާޒް އިސްމާޢީލް ވިދާޅުވެއްޖެއެވެ.
ޗެއަރޕާސަންކަމަށް ކުރައްވާ ކެމްޕެއިންގައި މާލެ އަތޮޅުގައި ބޭއްވި އެއްވުމެއްގައި ސަޕޯޓަރުންނާއި ވާހަކަފުޅު ދައްކަވަމުން ފައްޔާޒް ވިދާޅުވީ، އެމްޑީޕީ ވެރިކަމެއް ހިނގަމުން ދާއިރު މި ރާއްޖޭގައި ރަނގަޅުކުރަންޖެހޭ ބަދަލުކުރަންޖެހޭ ބައިވަރު ކަންކަން އެބަހުރިކަމަށެވެ. މިހާތަނަށް ވަރަށް ގިނަ ކަންކަން ކުރެވިއްޖެ ކަމަށާއި، 2023 އެމްޑީޕީއަށް އަނެއްކާވެސް ލިބުމަކީ ޤައުމުގައި ހުރި ކަންކަން ރަނގަޅުކުރުމަށް ކޮންމެހެންވެސް މުހިންމު ކަމެއްކަމަށް ފައްޔާޒް ވިދާޅުވިއެވެ.
އިދިކޮޅު ފަރާތަށް ފާޑުވިދާޅު ފައްޔާޒް ވިދާޅުވީ، އިދިކޮޅު ފަރާތްތަކުން އެމްޑީޕީން ނެރޭ ކަހަލަ ސިޔާސަތުތަކެއް ނޫނީ ރައްޔިތުން ބާރުވެރިކުރުވާ ރައްޔިތުން ޑިމޮކްރެޓިކް މުޖްތަމައަކަށް ގެންދަން މަސައްކަތްކުރާތަނެއް ނުފެންނަކަމަށެވެ. އެމީހުން ބަދަލުވިތަން ނުފެންނަކަމަށް ފައްޔާޒް ވިދާޅުވިއެވެ. އިންތިޚާބަށް ވާގޮތަކުން ޕާޓީއަށް ބޮޑު ބަދަލެއް އަންނާނެކަމާމެދު ޝައްކު ނުކުރައްވާކަމަށާއި، ޗެއަރޕާސަންކަން ލިބިއްޖެނަމަ ވެރިކަންކުރާ ޕާޓިއެއްގެ ކުލަ ޖައްސަން މަސައްކަތްކުރައްވާނެކަމަށް ފައްޔާޒް ވިދާޅުވިއެވެ.
– މިޕާޓީ ހަރުދަނާވުމަކީ ރާއްޖެ ހަރުދަނާވުން. އަޅުގަނޑަކަށް ނުފެނޭ އިދިކޮޅު ފަރާތްތަކުން އަޅުގަނޑުމެން މިނެރޭ ކަހަލަ ސިޔާސަތުތަކެއް ނޫނީ ރައްޔިތުން ބާރުވެރިކުރުވާ ރައްޔިތުން ޑިމޮކްރެޓިކް މުޖްތަމައަކަށް ގެންދަން މަސައްކަތްކުރާތަނެއް – @faya_i #MDPhingaalan pic.twitter.com/AOnSmWFxmO
— Nihu Riza (@NihuRiza) April 15, 2022
ވާދަވެރިކަން ބޮޑުވެފައިވާ ޗެއަރޕާސަންކަމުގެ އިންތިޚާބުގައި ދެން ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ. ޗެއަރޕާސަންކަމުގެ އިންތިޚާބު އޮންނާނީ އަންނަ މަހުގެ 14ގައެވެ. "ހިންގާލަން" މި ޝިއާރާއެކު ފައްޔާޒާއި، ރޮޒައިނާ ގެންދަވަނީ މުޅި ރާއްޖޭގައި ކެމްޕެއިން ފުޅާކުރަމުންނެވެ.
