އިތުރު 10 ރަށެއްގެ ކޯޓަށް މެޖިސްޓްރޭޓުން ހޯދަން ޖުޑިޝަލް ސަރވިސް ކޮމިޝަން (ޖޭއެސްސީ)އިން ޢިއުލާންކޮށްފިއެވެ.
ޖޭއެސްސީން އިޢުލާނުކޮށްފައި ވަނީ 2 ރަށެއްގެ ކޯޓުތަކަށް އިސް މެޖިސްޓްރޭޓުން ހޯދުމަށާއި، 8 ރަށެއްގެ ކޯޓުތަކަށް މެޖިސްޓްރޭޓުން ހޯދުމަށެވެ. މީގެތެރެއިން އިސް މެޖިސްޓްރޭޓުން ހޯދަން ޢިއުލާންކޮށްފައިވަނީ، ދ.ކުދަހުވަދޫ އަދި ގދ. ތިނަދޫ މެޖިސްޓްރޭޓް ކޯޓަށެވެ. އަދި މެޖިސްޓްރޭޓުން ހޯދަން އިއުލާންކޮށްފައިވަނީ، ގދ. ފަރެސްމާތޮޑާ، ފ. ފީއަލީ، ބ. ދަރަވަންދޫ، ތ. ގުރައިދޫ، ށ. ކޮމަންޑޫ، ށ. ފުނަދޫ، ހދ. ނޮޅިވަރަމް އަދި ހއ. ދިއްދޫ މެޖިސްޓްރޭޓް ކޯޓަށެވެ.
ފ.ފީއަލީ، ގދ.ފަރެސްމާތޮޑާ ކޯޓުގެ މެޖިސްޓޭޓުން ހޯދަން މިއީ އިއުލާންކުރި 3 ވަނަ ފަހަރެވެ. މި މަގާމުތަކަށް ކުރިމަތިލުމުގެ ސުން ގަޑިއެއްކަމަށް ޖޭއެސްސީ އިން ހުޅުވާލާފައިވަނީ އޭޕްރީލް މަހުގެ 20 ވަނަ ދުވަހުގެ ނިޔަލަށެވެ.
Vacancy Announcement: Magistratunge magaamah kurimathilumuge furusathu.
More info: https://t.co/GuTrO2IRVb pic.twitter.com/whUYAaqxUQ
— Judicial Service Commission (@MaldivesJSC) March 28, 2022
މެޖިސްޓްރޭޓުންގެ މަޤާމަށް ކުރިމަތިލުމުގެ ޝަރުތުތަކުގެ ތެރޭގައި އުމުރުން 25 އަހަރުވުމާއި އިސްލާމީ ޝަރީޢާ ނުވަތަ ޤާނޫނު؛ ނުވަތަ ޤާނޫނާއި ޝަރީޢަތުގެ ރޮނގުން ދަށް ވެގެން ޑިޕްލޮމާ އޮންނަން ޖެހެއެވެ. މީގެއިތުރުން ފަނޑިޔާރުކަމުގައި ނުވަތަ ޤާނޫނީ ވަކީލުކަން ކުރުމުގައި މަދުވެގެން 2 އަހަރު ދުވަހުގެ ތަޖްރިބާ ލިބިފައިވާ މީހަކަށްވާންޖެހެއެވެ. ޝަރުޢީ ކޯޓެއްގެ ލީގަލް މަޤާމެއްގައި މަދުވެގެން 2 އަހަރު ދުވަހުގެ ތަޖްރިބާ ލިބިފައިވާ މީހަކަށްވެސް މިމަޤާމަށް ކުރިމަތިލެވޭނެކަމަށް ޖޭއެސްސީން ވިދާޅުވެއެވެ.
މެޖިސްޓްރޭޓުންނަށް މުސާރައާއި އެލެވެންސްތައް ހިމެނޭހެން 23450 ރުފިޔާއާއި ޤާނޫނުގައިވާ ގޮތުގެމަތިން މެޑިކަލް އިންޝުއަރެންސް ލިބޭނެއެވެ. އަދި އިސް މެޖިސްޓްރޭޓުންނަށް އެލަވަންސްތަކާއެކު މުސާރައިގެ ގޮތުގައި 25600 ރުފިޔާއާއި ޤާނޫނުގައިވާ ގޮތުގެމަތިން މެޑިކަލް އިންޝުއަރެންސް ލިބޭނެއެވެ.
