މީހުން ދިރިއުޅޭ ރަށްރަށުން ރިއުޅުމުގެ ބޭނުމަށް ނޫން އެހެން ބޭނުންތަކަށް ދޫކުރާ ބިންތަކުގެ އެންމެ ކުޑަ ކުލި ކަނޑައެޅުމުގެ ބާރު އެ ރަށެއްގެ ކައުންސިލަކަށް ލިބޭނެހެން ގަވާއިދު އިސްލާހުކޮށް މިއަދު އާންމުކޮށްފިއެވެ.
މި ބަދަލު ގެނައީ "ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ބިން ދޫކުރުމުގެ ގަވާއިދަށް" ގެނައި ހަތަރުވަނަ އިސްލާހުގެ ތެރެއިންނެވެ. އެގޮތުން އެ ގަވާއިދުގައި މީގެކުރިން ސަރުކާރުގެ ކަމާއި ބެހޭ މިނިސްޓްރީއަށް ދީފައިވާ ބާރުތަކާއި ޒިންމާތައް އުނިކޮށް ރަށު ކައުންސިލަށް އެބާރުތައް ވަނީ ދީފައެވެ.
އިސްލާހުގައި ވާގޮތުން އެކިއެކި ބޭނުންތަކަށް ދޫކުރާ ބިންތަކުގެ އެންމެ ކުޑަ ކުލި ކަނޑައަޅާނީ އެރަށެއްގެ ނުވަތަ އެ ސިޓީގެ ތަނަވަސްކަމަށާއި، އިގްތިސޯދީ ފުދުންތެރިކަމަށް އަދި ބިމުގެ ޑިމާންޑަށް ބަލައި ކައުންސިލްތަކުން ކަމަށެވެ. އަދި އަގު ކަނޑައަޅާއިރު އެރަށެއްގެ ނުވަތަ އެ ސިޓީއެއްގެ ލޭންޑް ޔޫސް ޕްލޭންގައި ކަނޑައަޅާފައިވާ އަގުތަކަށް ރިއާޔަތްކުރަން ވާނެ ކަމަށް ވެސް ގަވާއިދުގައި ބުނެއެވެ.
މި އަގުތައް ކޮންމެ ދެ އަހަރަކުން އެއް އަހަރު މުރާޖައާ ކުރަން ޖެހޭނެ ކަމަށާއި، އެކިއެކި ބޭނުންތަކަށް ދޫކުރާ ބިންތަކުގެ ކުލި ތަފާތު ކުރުމުގެ އިހުތިޔާރު ވެސް ކައުންސިލްތަކަށް ލިބިގެންވާ ކަމަށް ގަވައިދުގައި ބަޔާންކޮށްފައި ވެއެވެ. މިގޮތުން އަގުތައް ކަނޑައެޅުމަށްފަހު ސަރުކާރުގެ ގެޒެޓުގައި އާންމުކުރަން ޖެހޭނެ ކަމަށްވެސް އިސްލާހުގައި ބުނެފައިވެއެވެ.
އެހެން ނަމަވެސް ފަތުރުވެރިކަމަށް ދޫކުރާ ބިންތައް ދޫކުރަން ޖެހޭނީ ދިވެހިރާއްޖޭގެ ޓޫރިޒަމާ ބެހޭ ގާނޫނުގައި ކަނޑައަޅައިފައިވާ ގޮތަށެވެ.
ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ބިން ދޫކުރުމުގެ ގަވާއިދު މީގެކުރިން އޮތް ގޮތުން އެފަދަ ބިންތަކުގެ އަގު ކަނޑައަޅަނީ ޕްލޭނިން މިނިސްޓްރީގެ ލޭންޑް ވެލުއޭޝަން ކޮމިޓީންނެވެ.
