ރާއްޖެއަށް ފަތުރުވެރިކަން ތައާރަފްކުރުމުގައި މުޙިއްމު ދައުރެއް އަދާކުރި ޖޯޖު ކޯބިން މިއަދު ރާއްޖެ ވަޑައިގެންފިއެވެ.
ކޯބިންއަށް އެއާޕޯޓު ވީއައިޕީން މަރުހަބާ ދެންނެވީ އިޓަލީގެ ޓުއަ ގްރޫޕް ރާއްޖެ ގެނައުމުގައި ކޯބިން އާއެކު އިސް ދައުރެއް އަދާކުރެއްވި މިހާރުގެ ފޮރިން މިނިސްޓަރު އަހުމަދު ނަސީމާއި ޓޫރިޒަމް މިނިސްޓަރު ޑރ. އަބްދުއްﷲ މައުސޫމްއެވެ.
މި ރަށްތައް ފެނުނީމަ ހަނދާން ވަނީ 50 އަހަރު ކުރިން އަހަރެން ރާއްޖެއަށްކުރި ދަތުރު. މިހިރީ ހަމަ ގަބޫލުވެސް ކުރަންވެސް ދަތިވެފައި. މިއީ ލިބޭ ވަރަށް ބޮޑު ސަރަފެއް އަދި އުފަލެއް، ވަރަށް އުފާކުރަން ޓޫރިޒަމަށް ފަންސާސް އަހަރު ފުރުން ފާހަގަ ކުރުމުގައި ބައިވެރިވުމަށް ދަވަތު ލިބުނީމަ.
– ކޯބިން ބުންޏެވެ.
އޭނާ ރާއްޖެއަށްކުރާ ހަތް ދުވަހުގެ ދަތުރުގައި މާލޭގައި މަޑުކުރާނީ، މާގިރި ހޮޓަލުގައެެވެ. އެއަށް ފަހު ނއަތޮޅުގައި އެއް ރޭ މަޑުކުރުމަށް ފަހު ކުޑަވިލިގިލީގައިވެސް އޭނާ މަޑުކުރާނެއެވެ. މިނިސްޓަރު މައުސޫމް ވިދާޅުވި ގޮތުގައި ޓޫރިޒަމަށް 50 އަހަރު ފުރުމާއި ގުޅޭ ބައެއް ހަރަކާތްތަކުގައި ބައިވެރިވެ ވަޑައިގަތުމަށް އެމެރިކާގައި މިހާރު ދިރިއުޅުއްވާ ކޯބިން، ވަޑައިގަތުމަކީ ޓޫރިޒަމް އަހަރަށް އިތުރު ފުރިހަމަކަމެއް ގެނެސްދިން ކަމެކެވެ. ކުރިން ވެސް އަދި މިހާރު ވެސް ކޯބިން ގެ ތަޖުރިބާ އާއި އެހީތެރިކަން ރާއްޖޭގެ ޓޫރިޒަމަށް ނުހަނު ބޭނުން ކަމަށް މައުސޫމް ވިދާޅުވިއެވެ.
1971 ވަނަ އަހަރު ކޯބިން ރާއްޖެއަށް ޒިޔާރަތްކުރީ ރާއްޖޭގެ ގުދުރަތީ ރީތިކަން ބަލާލާ، ފަތުރުވެރިކަން ރާއްޖެއަށް ތައާރަފްކުރެވިދާނެތޯ ބެލުމަށެވެ. އެއަށްފަހު ދެވަނަ ފަހަރަށް 1972 ވަނަ އަހަރު 12 މީހުން ހިމެނޭ އިޓަލީގެ ޓުއަރިސްޓް ގްރޫޕަކާއެކު ކޯބިން ރާއްޖެއަށް ކުރި ދަތުރަކީ ފަތުރުވެރިންގެ ގޮތުގައި ބަޔަކު ރާއްޖެ ޒިޔާރަތްކުރި ފުރަތަމަ ފަހަރެވެ.
ކޯބިން ވިދާޅުވީ ކޮންމެ ގައުމަކީ ވެސް ރީތި ގައުމަކަށްވި ނަމަވެސް، ރާއްޖެ އާ އެއްފަދަ ޖަޒީރާ ވަންތަ އަދި ހިތްހެޔޮ ބަޔަކު ދިރިއުޅޭ އެހެން ގައުމެއް ފާހަގަ އެއް ނުކުރެވޭކަމަށެ. ކޯބިންގެ ވާހަކަައިގައިވަނީ ރާއްޖޭގެ ފަތުރުވެރިކަމަށް އައިސްފައިވާ ކުރިއެރުންތައް ފާހަގަކޮށްފައެވެ. އަދި އޭނާގެ މި ދަތުރުގައި ގިނަ ބައްދަލުވުންތަކެއް ބޭއްވުމަށް ނިންމާފައިވާ ކަމަށާއި، މި ބައްދަލުވުންތަކާއެކު ރާއްޖެއަށް އެމެރިކާއިން އަންނަ ފަތުރުވެރިން އިތުރުކުރުމަށް މަސައްކަތްކުރާނެކަމަށް ކޯބިން ވިދާޅުވިއެވެ. ކޯބިން މިހާރު މަސައްކަތްކުރަމުންދަނީ ކޮންސަލްޓަންޓެއްގެ ގޮތުގައެވެ.
"ކޯބިން" މި ނަމަކީ ދިވެހިންނަށް އާނަމެއް ނޫނެވެ. ރާއްޖޭގެ ރީތިކަން ދުނިޔެއަށް ދައްކުވައިދީ އެންމެ ފުރަތަމަ ރާއްޖެއަށް ފަތުރުވެރިން ގެނައީ ކޯބިންއެވެ.
