އިންޑިއާ އައުޓް ހަރަކާތަކީ ފަހަކަށް އައިސް އިދިކޮޅު ޕީޕިއެމްއިން ކުރިޔަށް ގެންދާ އެންމެ ބޮޑު އެއް ސިޔާސީ ހަރަކާތެވެ. އަދި މި ސިޔާސީ ހަރަކާތް ރާއްޖޭގެ އެކި ކަންކޮޅުތަކަށް ފުޅާވެ، ރައީސް ޔާމިން ޖަލުން މިނިވަން ވުމާއެކު ވަނީ، އިތުރު ގިޔަރެއް ކުރިޔަށްވެސް ޖައްސާލާފައެވެ.

މާނައަކީ، މި ހަރަކާތަށް ސީދާ ރައީސް ޔާމިން ގުޅިވަޑައިގަތުމާއި ހަމައިން މިހަރަކާތުގެ އަމާޒު ބަދަލުވެ، އަދި ބޭރު ދުނިޔޭގެ ސަމާލުކަމަށްވެސް އިހުނަށްވުރެ ބޮޑަށް މި ހަރަކާތް އައިސް، ހަރަކާތުގެ ތެރެއިން އިތުރު "މޯމެންޓަމެއް" އުފެދިގެން ގޮސްފައިވާކަން ފާހަގަ ކޮށްލަން ޖެހެއެވެ. އަދި ހަމަ އެއާއިއެކު، ރާއްޖެއާއި ޒަމާނުއްސުރެ އެންމެ އަވައްޓެެރި އެއް ގައުމެއްގެ ގޮތުގައި އޮތް އިންޑިއާފަދަ، ސިޔާސީ ގޮތުންނާއި، ވިޔަފާރީގެ ގޮތުންނާއި އަދި އެނޫނަސް އެތައް ގޮތަކުން ރާއްޖެއާއި ގާތް ގުޅުމެއް އުފެދިގެން ގޮސްފައިވާ ދުނިޔޭގެ އެންމެ ބޮޑު ޑިމޮކްރަސީގެ ގޮތުގައި އޮތް ގައުމަކާއި ދެކޮޅަށް ރާއްޖޭގެ ކުރީގެ ރައީސަކު ނިކުންމެވުމުންވެސް، މި ހަރަކާތުގެ އަމާޒާއި ދޭތެރޭ އެތައް ބަޔަކަށް އެތައް ގޮތަކުން ބަހުސް ކުރަން މަޖުބޫރު ވެގެންވެސް ގޮސްފައި ވެއެވެ.

މީގެ އިތުރުން، އިންޑިއާ އައުޓު ހަރަކާތާއި ގުޅެމުންދާ މީހުންގެ އަދަދު އިތުރުވެ، ޕީޕިއެމްއަށް ތާއީދު ނުކުރާ އެތައް ބަޔަކުވެސް މިއީ ގައުމީ ހަރަކާތެއްގެ ގޮތުގައި ދެކި މިހަރަކާތާއި ފަހަކަށް އައިސް ގުޅިފައި ވާއިރު، ގޭގޭ ފާރުތަކަށް ދަންދެން އިންޑިއާ އައުޓު ޖެހުމަށް ކުރީގެ ރައީސް ޔާމިން ގޮވާލެއްވި ގޮވާލެއްވުން ވެގެން ދިޔައީ ގިނަ ބައެއްގެ ސަމާލުކަން މި ހަރަކާތުގެ ތެރެއިން ހުއްޓިގެން ދިޔަ އެއް ކަމެއްގެ ގޮތުގައިވެސް މެއެވެ.

ކޮންމެއަކަސް، އިންޑިއާ އައުޓު ހަރަކާތް ޕީޕީއެމްއިން ހިންގާ އެންމެ މުހިންމު ސިޔާސީ ހަރަކާތަށްވެ، އަދި އެ ހަރަކާތަކީ ރާއްޖެއާއި އަވައްޓެރި ގައުމެއްގެ އަސްކަރިއްޔާ ރާއްޖޭގައި ތިބޭ ތިބުމާއި ދެކޮޅަށް ހިންގޭ ހަރަކާތަކަށް ވެގެންދިޔަ ނަމަވެސް، މިހަރަކާތުގައި ވަކިން ފާހަގަ ވާގޮތަށް "އިންއާ"ގެ ނަން ބޭނުން ކުރެވެމުން ދިއުމަކީ، ޚާރިޖީ ގޮތުން ބަލާއިރު ސިޔާސީ އިދިކޮޅު ފަރާތްތަކަށްވެސް އަދި ސަރުކާރަށްވެސް ނާޒުކު މައްސަލައަކަށް މެނުވީ ނުވާނެއެވެ.

ސަބަބަކީ، އިންޑިއާ ސަރުކާރާއި ދިވެހި ސަރުކާރާ ދެމެދު ހަދާފައިވާ އެއްބަސްވުމަކާއިމެދު އޮތް ހިތްހަމަ ނުޖެހުމެއްގެ ތެރެއިން ނަމަވެސް، އާންމު ރައްޔިތުންގެ ހިތްތަކުގައި ބޭރުގައި ދައުލަތަކާ ދެމެދު އުފެދެމުންދާ ދެކޮޅުވެރި ކަމުގެ ޝުޢޫރުތަކާއި ރޯވަމުންދާ ނަފްރަތުގެ އަލިފާނެވެ.

އިންޑިއާ އައުޓު ގާނޫނަކުން ހުއްޓުވުން!

އިންޑިއާ އައުޓު ހަރަކާތް ހުއްޓުމެއް ނެތި ރާއްޖޭގެ އެކި ކަންކޮޅުތަކުގައި ކުރިޔަށް ގޮސް، އެންމެފަހުން ބައެއް ފަރާތްތަކުން ވަނީ، މިހަރަކާތުގެ ޝިއާރު ކަމުގައިވާ "އިންޑިއާ އައުޓު" މި ޝިއާރު ރާއްޖޭގެ ބައެއް ރަށްރަށުގެ ފާރުތަކުގައިވެސް ޖަހަން ފަށާފައެވެ. ނަތީޖާއެއްގެ ގޮތުން، މިކަމުގެ ކަންބޮޑުވުން އެޑިއުކޭޝަން މިނިސްޓްރީންވެސް ފާޅުކޮށް، ރާއްޖޭގެ ސްކޫލުތަކުގައި ކިޔަވާދޭ ޓީޗަރުންގެ މެދުގައިވެސް މިކަމުގެ ބިރުވެރިކަން އުފެދިގެން ގޮސްފައިވާކަމަށް އެމިނިސްޓްރީން ވަނީ ބުނެފައެވެ. އަދި އޭގެ ނަތީޖާއެއްގެ ގޮތުން ރާއްޖޭގެ ސްކޫލްތަކުގައި ކިޔަވާދޭ ގިނަ އަދަދެއްގެ ޓީޗަރުން މި ބިރުވެރި ކަމުގައި ރާއްޖެ ދޫކޮށް ދިއުމުގެ ބިރު އޮތްކަމުގައިވެސް އެޑިއުކޭޝަން މިނިސްޓްރީން ބުނެފައި ވެއެވެ.

ކޮންމެއަކަސް އިދިކޮޅު ޕީޕީއެމްއިން ކުރިޔަށް ގެންދާ އިންޑިއާ އައުޓް ހަރަކާތް ރާއްޖެ ތެރޭގެ ރަށްތަކަށް ފުޅާވެ، އަދި ތައުލިމީ ދާއިރާއިން މި ހަރަކާތާމެދު ކަންބޮޑުވުން ފާޅުކުރި ހިސާބުން ހަރަކާމެދު ސަރުކާރުގެ މުވައްސަސާތަކުގެ މެދުގައި އޮތް ކަންބޮޑުވުންތައް ވަރަށްވެސް ރަގަޅަށް ވަނީ ހާމަވެގެން ގޮސްފައެވެ. އަދި އިދިކޮޅު ޕީޕީއެމްއިން މިއީ ގައުމީ ހަރަކާތެއްގެ ގޮތުގައި ސިފަ ކުރަމުން ދިޔަނަމަވެސް، ހަރަކާތުގެ އެންމެ އިސް ސަފުގައި ސިޔާސީ ފަރާތްތައް ތިބެ، މިހަރަކާތް ކުރިޔަށް ދާދިއުމުގެ ނަތީޖާއެއްގެ ގޮތުން، ސަރުކާރުން ތަފާތު ވިސްނުމަކުން ހަރަކާތާމެދު މިހާރު ވިސްނަން ފަށާފައިވުމުގެ އެއް ހެއްކަކީ، މިހަރަކާތް ހުއްޓުމަކަށް ގެނައުމަށް އެންމެ ފަހުން ގާނޫނެއް ފާސް ކުރުމަށް ސަރުކާރުން ވިސްނަމުންދާ ވިސްނުމެވެ.

މިގޮތުން، ހާރިޖީ ގުޅުންތަކަށް ނޭދެވޭ އަސަރު ފޯރާ ގޮތަށް ސިޔާސީ ހަރަކާތް ހިންގައިފި ނަމަ އަދަބު ލިބޭ ބިލެއް އެކުލަވާލުމުގެ މަސައްކަތް އެމްޑީޕީން ފަށާފައިވާކަން މީޑިއާތަކުން މިހާރުވަނީ ހާމަވެގެން ގޮސްފައެވެ.

"ދިވެހިރާއްޖެއިން ބޭރު ގައުމުތަކާ އެކު ގާއިމުކޮށްފައިވާ ޚާރިޖީ ގުޅުންތަކަށް ނޭދެވޭ އަސަރުކުރާނެ ފަދަ އަމަލުތައް ހުއްޓުވުމުގެ ބިލް"ގެ ނަމުގައި މިހާރު ޑްރާފްޓު ކުރުމުގެ މަރުހަލާގައިވާ މިބިލުގެ މައިގަޑު އަމާޒަކީ، ދިވެހި ދައުލަތުން އެކި ގައުމުތަކާއެކު ގާއިމުކޮށްފައިވާ ގުޅުންތަކަށް ނޭދެވޭ އަސަރު ފޯރާ ގޮތަށް ހިންގާ އަމަލުތަކަކީ ޖިނާއީ ކުށަކަށް ހަދައި، އަދި އޭގެ ނަތީޖާއެއްގެ ގޮތުން ކުއްވެރިވާ ފަރާތްތަކަށް ގާނޫނި ގޮތުން ލިބެންޖެހޭ އަދަބުތައް ލިބި ދިނުމެވެ.

އަދި ބިލާއިގުޅެގޮތުން މިހާތަނަށް އާންމު ވެފައިވާ މައުލޫމާތުތަކަށް ބާލާއިރު، ޑްރާފްޓްގައިވާ ގޮތުން، މި ބިލް ގާނޫނަކަށް ވެގެން ދިއުމަށްފަހު އެގާނޫނުން ކުށްވެރިވާނެ އަމަލެއް ކަމަށް ބެލެވޭނީ ގާނޫނީ އަދި ބައިނަލްއަގުވާމީ ހަމަތަކާއި ދެ ގައުމުން ބަލައިގެންފައިވާ އުސޫލަކާ އެއްގޮތަށް އޮތް ކަމެއްގައި، ރައްޔިތުންގެ ނަމުގައި ރާއްޖެ ރަމްޒުވާ ގޮތަށް ވަކި ބަޔަކު ނުވަތަ ސިޔާސީ ޕާޓީއަކުން ވަކި ގައުމެއްގެ ސަރުކާރާއި އެ ގައުމެއްގެ ވަކި މުއައްސަސާއަކާ ދެކޮޅަށް މުޒާހަރާކުރުމާއި ސިޔާސީ ހަރަކާތް ހިންގުމުންނެވެ.

އަދި ޑްރާފްޓް ކުރުމުގެ މަރުހަލާގައިވާ މިގާނޫނުގެ ދަށުން ލިބޭ އަދަބުތަކުގެ ތެރޭގައި 20،000ރ. އިން ޖޫރިމަނާ ކުރުމާއި އެއް އަހަރަށް ވުރެ ދިގު ނޫން މުއްދަތަކަށް ގޭ ބަންދު ކުރުން ނުވަތަ ހަ މަސް ދުވަހަށް ވުރެ ކުރު މުއްދަތަކަށް ޖަލަށް ލުން ހިމެނެ އެވެ.

ބައެއް ފަރާތްތަކުގެ ފާޑުކިއުން!

އިންޑިއާ އައުޓު ހަރަކާތް ގާނޫނަކުން ހުއްޓުވަށް މަޖުބޫރުވާ ހާލަތެއް އުފެދިގެން ދިޔައީ މިއީ ހަމައެކަނި ކުރެވޭ މުޒާހިރާތަކެއްގެ ގޮތުގައި ސިފަކުރެވުމުގެ ބަދަލުގައި، އެއަށްވުރެ ފުޅާކޮށް، މި ހަރަކާތުގެ ނަތީޖާއެއްގެ ގޮތުން، ބޭރުގެ ދައުލަތަކާ ރާއްޖެއާދެމެދު އޮތް ޚާރިޖީ ގުޅުމަށް، އާންމުކޮށް ހިންގޭ މިފަދަ ހަރަކާތެއްގެ ނަތީޖާއެއްގެ ގޮތުން އަސަރު ކުރުމުގެ ފުރުސަތު އޮތުމުން ކަމުގައި ބެލެވެއެވެ.

އަދި ހަރަކާތުގައި ބޭނުން ކުރެވެމުންދާ ގިނަ ޝިއާރުތަކަކީ، އިންޑިއާގެ އަސްކަރިއްޔާ ރާއްޖޭގައި އޮތް އޮތުމުގެ ބަދަލުގައި، އިންޑިއާ އޭގެ ޒަތުގައި ރަމްޒުކޮށްދޭ ޝިއާރުތަކަކަށް ވެގެން ދިއުމަކީވެސް، ވަކީ ބޮޑަށް ރާއްޖެއިން އިންޑިއާ ސަރުކާރާއެކީ ގާއިމް ކޮށްފައިވާ ޚާރިޖީ ގުޅުމަށް މި ހަރަކާތް ނިސްބަތް ކުރެވިގެންދާ އެއް ސަބަބެއްގެ ގޮތުގައި ފާހަގަވެގެން ގޮސްފައި ވެއެވެ.

އެހެންނަމަވެސ،ް ބައެއް ފަރާތްތަކުން ދެކޭ ގޮތުގައި، ގާނޫނަކުން މިހަރަކާތް ހުއްޓުވިގެން ދާއިރު، އޭގެ ނަތީޖާއެއްގެ ގޮތުން، ގާނުނު އަސާސީން ލިބިދީފައިވާ ޚިޔާލު ފާޅުކުރުމުގެ އަސާސީ ހައްގު އޭގެ ޒާތުގައި ހަނިވެގެން ދާނެއެވެ. ސަބަބަކީ އިންޑިއާ އައުޓު ހަރަކާތުގެ އެންމެ މުހިންމު އެއް އަސާސަކީ މަގުމަތީ ހަރަކާތްތަކާއި މުޒާހިރާތައް ކަމުގައި ވެގެން ދިއުމެވެ.

މިގޮތުން، އދ. އިން ކަނޑައަޅާފައި ހުންނަވާ ދީނީ މިނިވަންކަމާބެހޭ ރެޕަޓުއަރ ޑރ. އަހުމަދު ޝަހީދު ވިދާޅުވެފައި ވަނީ ޙާރިޖީ ގުޅުންތަކަށް ފާޑު ކިޔެން ޖެހޭނެ ކަމަށާއި، އަދި ޚިޔާލުފާޅުކުރުމުގެ މިނިވަންކަން ހަނިކުރެވިގެން ނުވާނެ ކަމުގައެވެ.

Criminalising freedom of thought & expression is something I thought MDP especially @MohamedNasheed @evattey @Imthiyazfahmy would never advocate! Hope you denounce this bill in unequivocal terms! Criticising foreign policy / India policy cannot be criminalised! @article19UN https://t.co/1y7K95QiI8

— Ahmed Shaheed (@ahmedshaheed) January 30, 2022

އެހެންނަަމެވެސް، އިންޑިއާ އައުޓު ހަރަކާތް އާންމު ވެގެން ގޮސްފައިވާ މިންވަރަށް ބަލާއިރު، އަދި މި ހަރަކާތުގެ ތެރެއިން އިންޑިއާއާއި ދެކޮޅަށް އުފެދިގެންދާ ނަފްރަތަށް ބަލާއިރު، މިހަރަކާތުގެ ކަންބޮޑުވުން ސަރުކާރުގެ ތެރޭގައި ހުންނާނޭ ކަމުގައި ގަބޫލުކުރަން މިއަދު މިވަނީ މަޖުބޫރު ވެގެން ގޮސްފައެވެ. އަދި އެއްވެސް ގައުމެއްގައި އެތެރޭގެ ސިޔާސީ ކޯޅުންތަކުގެ އަސްލަކީ، ދޭދޭ ގައުމުތަކާ ދެމެދު އޮންނަ ގުޅުންތައް ގުރުބާން ވެގެންދާންވަރުގެ ޖަޒުބާތަކަށް ވެގެން ދިއުމަކީ ހުރިހާ ގޮތަކުން ބެލި ކަމުގައި ވިނަމަވެސް، ގައުމަށް ގެއްލުން ހުރި ކަމަކަށް މެދުނުވީ ވެގެނެއް ނުދާނެއެވެ.

އެހެންނަމަވެސް، އިންޑިއާ އައުޓް ހަރަކާތް ގާނޫނަކުން ހުއްޓުވުމަށް ކުރަން ޖެހޭ މަސައްކަތުގެ އެންމެ މުހިންމު އެއް ބަޔަކަށް ވެގެންދަނީ، ރާއްޖެއާއި ބޭރުގެ ދައުލަތަކާއި ދެމެދު އުފެދިގެން ގޮސްފައިވާ ގުޅުމަށް، ހިންގޭ ސިޔާސީ ހަރަކާތްތަކުގެ އަސަރު އޭގެ ނޭދެވޭ ގޮތުގައި ކުރުން ހުއްޓުވުން ކަމުގައި ވެގެން ދާތީ، ގާނޫނު އަސާސީން ލިބިދީފައިވާ ޚިޔާލު ފާޅުކުރުމުގެ މިނިވަންކަމާ، ސިޔާސީ ގުޅުންތަކަށް ނޭދެވޭ އަސަރު ކުރާގޮތަށް ހިންގޭ ހަރަކާތްތައް ހުއްޓުވުމާއި ދެމެދު ރޮގު ދަމާލާނީ ކޮންހިސާބަކުންތޯ މިއީ ބަހުސްކޮށް ނިންމަންޖެހޭ މުހިންމު ނިންމުމެކެވެ.