ވެރިކަން ކުރަމުންދާ މައި ޕާޓީ އެމްޑީޕީގައި އިސްކޮށް ހަރަކާތްތެރިވި ބޭފުޅުންކޮޅެއް އިދިކޮޅު ޕްރޮގްރެސިވް ކޯލިޝަނާއި ގުޅިއްޖެއެވެ.

ޕީޕީއެމްއާއި މިބޭފުޅުން ގުޅިވަޑައިގެން ފޯމް ހަވާލު ކުރެއްވީ ޕީޕީއެމްގެ ރައީސް އަދި އިދިކޮޅު ލީޑަރު ރައީސް އަބްދުﷲ ޔާމީނާއިއެވެ.

ޕީޕީއެމްއާއި އަލަށް ގުޅުނު އިބްރާހިމް ޒަކީ އަކީ އެމްޑީޕީ އަދި އަދާލާތު ޕާޓީގައިވެސް ގިނަ މަސައްކަތްތަކެއް ކުރައްވާފައިވާ ބޭފުޅެކެވެ. އޭނާ ޕީޕީއެމްއާއި ގުޅި ރައީސް ޔާމީނާއި ފޯމް ހަވާލު ކުރެއްވީ ރައީސް ޔާމީންގެ ސިޔާސަތުތަކަށް ތާއީދު ކުރައްވައި، ޤައުމު އިސްލާހު ކުރެއްވުމުގެ މަސައްކަތުގައި އަމަލީ ގޮތުން ބައިވެރިވުމަށެވެ.

ރޭ ސޮއިކުރި ބޭފުޅުންގެ ތެރޭގައި ރ.އިންނަމާދޫ އެމްޑީޕީގެ ވަރަށް ހަރަކާތްތެރި ބޭފުޅެއް ކަމަށްވާ މުހައްމަދު ނަސީރުވެސް ވަނީ އިދިކޮޅު ޕީޕީއެމްއާއި ގުޅިފައެވެ. މީގެ އިތުރުން އައްޑޫ ސިޓީ މީދޫ ދާއިރާގެ ކުރީގެ ކައުންސިލް މެމްބަރު އަދި އެމްޑީޕީގައިވެސް ވަރަށް އިސްކޮށް މަސައްކަތް ކުރެއްވި ހުސެއިން ހިޔާޒުވެސް ވަނީ ޕީޕީއެމްއާއި ގުޅި ފޯމް ރައީސް ޔާމީނާއި ހަވާލު ކޮށްފައެވެ.

ފަހަކަށް އައިސް ވެރިކަން ކުރާ މައި ޕާޓީގެ އިސްސަފުގައި ހަރަކާތްތެރިވި އަތޮޅު ތެރޭގެ މެމްބަރުން ދަނީ އިދިކޮޅު ޕީޕީއެމްއާއި ގުޅެމުންނެވެ. ޚާއްސަކޮށް ސަރުކާރުން ވެފައިވާ ވައުދުތައް ނުފުއްދުމާއި، ރާއްޖޭގައި ތިބި އިންޑިއާގެ ސިފައިން ބޭލުމާއި ދެކޮޅަށް ގިނަ ބަޔަކު ދަނީ ތާއީދުކުރަމުންނެވެ. ވެރިކަން ކުރާ މައި ޕާޓީގެ އިތުރުން ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަށް ނިސްބަތްވާ ގިނަ ބަޔަކުވެސް މިދުވަސްވަރު ދަނީ އެޕާޓީން ވަކިވަމުންނެވެ.

އަދާލަތު ޕާޓީގައި ކުރިއަށް ދެވޭނެ ގޮތެއް ނެތުމުން އެޕާޓީގެ އިސްސަފުގައި ހަރަކާތްތެރިވި ކުރީގެ މެމްބަރު އަނާރާ ނައީމްވެސް އިއްޔެ އެޕާޓީން ވަކިވެ ވަޑައިގެންފައެވެ.