ހުރްމުޒް ކަނޑުއޮޅީގައި ކަނޑުއަޑީގެ މައިނެއްގައި ޖެހި ތެޔޮ ޓޭންކަރެއް ގޮވައިފި

ހުރްމުޒް ކަނޑުއޮޅިން ދަތުރުކުރި ތެޔޮ ޓޭންކަރެއް، އީރާނުން ކަނޑައަޅާފައިވާ ދަތުރުފަތުރުގެ މަގުން ނެއްޓި، ކަނޑު އަޑީގައި ހުރި މައިނެއްގައި ޖެހި ގޮވައިފި އެވެ.

އީރާނުގެ ނޫސް އިދާރާއެއް ކަމަށްވާ "ދިފާއު ޕްރެސް" އިން އާދީއްތަ ދުވަހު ރިޕޯޓުކުރި ގޮތުގައި، މި ހާދިސާ ހިނގާފައި ވަނީ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން، ގަވާއިދާ ހިލާފަށް ކަނޑުއޮޅި ހުރަސްކުރަން އުޅުނު ހަ އުޅަނދެއް ވޭތުވެދިޔަ 24 ގަޑިއިރު ތެރޭ ހިފަހައްޓާފައި ވަނިކޮށެވެ. ދިފާއު ޕްރެސް އިން މި ޓޭންކަރު ސިފަކޮށްފައި ވަނީ "ގަވާއިދާ ހިލާފުވި އުޅަނދެއް"ގެ ގޮތުގައެވެ.

ޓޭންކަރު ނިސްބަތްވާ ގައުމަކާއި، ދަތުރުކުރަމުންދިޔަ މަންޒިލެއް އަދި ވެރިފަރާތެއް ރިޕޯޓުގައި ހާމަކޮށްފައި ނުވާއިރު، ހާދިސާގައި މީހަކަށް އަނިޔާއެއް ލިބުނު ކަމަށް ނުވަތަ ތިމާވެއްޓަށް ގެއްލުމެއް ލިބުނު ކަމެއް ވެސް ހާމަކޮށްފައެއް ނުވެއެވެ. ކަނޑައެޅިފައިވާ މަގުން ނެއްޓި ދަތުރުކުރާ އުޅަނދުފަހަރަށް ދިމާވާ ކޮންމެ ކަމެއްގެ ޒިންމާ އެ އުޅަނދަކުން އުފުލަން ޖެހޭނެ ކަމުގެ އިންޒާރު އީރާނުގެ ކަމާބެހޭ ފަރާތްތަކުން ކުރިން ވެސް ދީފައި ވާކަން، ދިފާއު ޕްރެސް އިން ފާހަގަކުރި އެވެ.

އީރާނުގެ ދައުލަތުގެ ޓީވީން ބުނާ ގޮތުގައި، ހުއްދައަކާ ނުލައި އަދި ކަނޑައެޅިފައިވާ މަގުން ބޭރުން ދަތުރުކުރަން އުޅުނު އެ ހަ އުޅަނދު ހިފެހެއްޓުމުގެ ކުރިން، އައި.އާރް.ޖީ.ސީގެ ކަނޑުގެ ސިފައިން ވަނީ އިންޒާރުގެ ބަޑި ޖަހާފަ އެވެ. އަދި މިސްރާބު ބަދަލުކުރުމާ ހަމައަށް، އެ އުޅަނދުތަކުގެ ދަތުރު ވަނީ ހުއްޓުވާފަ އެވެ.

މިއީ ދުނިޔޭގެ ހަކަތައިގެ ވިޔަފާރީގައި އެންމެ މުހިންމު އެއް ސަރަހައްދު ކަމަށްވާ ހުރްމުޒް ކަނޑުއޮޅީގެ ސަލާމަތާއި ދަތުރުފަތުރުގެ ނިޒާމާ ގުޅޭ ގޮތުން، އީރާނާއި އެމެރިކާއާ ދެމެދު މަސްލަހަތު ގޯސްވެފައި ވަނިކޮށް ހިނގި ހާދިސާއެކެވެ. ފެބްރުއަރީ 28 ވަނަ ދުވަހު ފެށުނު އެމެރިކާއާއި އިސްރާއީލުގެ އުދުވާނުތައް ހުއްޓާލުމަށްޓަކައި، ޕާކިސްތާނުގެ މެދުވެރިކަމާ އެކު އެކުލަވާލި ފަހުމުނާމާއެއްގައި، އީރާނާއި އެމެރިކާއިން މިދިޔަ މަހު ވަނީ ސޮއިކޮށްފަ އެވެ.

އެ ފަހުމުނާމާގެ ދަށުން، 60 ދުވަހުގެ މުއްދަތަށް އެއްވެސް ފީއަކާ ނުލައި ހުރްމުޒް ކަނޑުއޮޅިން އުޅަނދުފަހަރަށް ދަތުރުކުރެވޭނެ އިންތިޒާމު ހަމަޖައްސައި ދިނުމަށް އީރާނުން ވަނީ އެއްބަސްވެފަ އެވެ. މިއާއެކު، ކަނޑުއޮޅި ހުރަސްކުރާ އުޅަނދުފަހަރަށް ހާއްސަ މަގެއް ކަނޑައަޅައި، ގަވާއިދާ ހިލާފު މަގުތަކުން ދަތުރު ނުކުރުމަށް އީރާނުން ވަނީ އިންޒާރު ދީފަ އެވެ.

ނަމަވެސް، އެ އިންޒާރުތަކާ އެއްކޮޅަށް، ކަނޑައެޅިފައިވާ މަގު ފިޔަވައި އެހެން މަގުތަކުން އުޅަނދުފަހަރު ދަތުރު ކުރުވުމަށް އެމެރިކާއިން ދަނީ މަސައްކަތް ކުރަމުންނެވެ. މިކަމުގެ ސަބަބުން، ސަރަހައްދީ ކަނޑުގެ ދަތުރުފަތުރަށް ވޮޝިންޓަނުން ނުފޫޒު ފޯރުވުން ހުއްޓާލަންދެން، އީރާނުން ވަނީ ދަތުރުފަތުރުގެ ކޮރިޑޯ ބަންދުކޮށްފަ އެވެ.