2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑޭޓެއްގެ ގޮތުގައި، ޕްރައިމަރީއަކާ ނުލައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް އެ ޕާޓީގެ ރިޔާސީ ޓިކެޓް އެރުވުމަށް އެދި، ޕީއެންސީގެ މަތީ މަޖިލީހަށް މިއަދު ގަރާރެއް ހުށަހަޅައިފިއެވެ.
މި ގަރާރު ހުށަހެޅީ ޕާޓީގެ އާންމު މެންބަރެއް ކަމަށްވާ އަބްދުﷲ އިބްރާހީމެވެ. ގަރާރުގައި ފާހަގަކޮށްފައިވަނީ ރައީސް މުއިއްޒުގެ ވެރިކަމުގައި ރާއްޖޭގެ މިނިވަންކަމާއި ސިޔާދަތު ރައްކާތެރިކުރައްވައި، ބޭރުގެ އަސްކަރީ ބާރެއް ރާއްޖޭގައި ނެތްކަން ކަށަވަރުކޮށްދެއްވި ކަމަށާއި، ކަނޑުގެ ސަރަހައްދު ބެލެހެއްޓުމުގެ ގާބިލުކަން އިތުރުކުރައްވައި، ދަރަނީގެ މައްސަލަތަކަށް ހަރުދަނާ ފިޔަވަޅުތަކެއް އަޅުއްވަމުން ގެންދަވާ ކަމެވެ. މީގެ އިތުރުން، "ޑިޖިޓަލް މޯލްޑިވްސް 2.0″ ތައާރަފުކުރެއްވުމާއި، ބޯހިޔާވަހިކަމުގެ މައްސަލަ ހައްލުކުރުމަށް ރަސްމާލެ ފަދަ ބިޔަ މަޝްރޫއުތައް ހިންގެވުމާއި، ފަލަސްތީނުގެ ރައްޔިތުންގެ ހައްގުގައި ބައިނަލްއަގްވާމީ މައިދާނުގައި ވަކާލާތު ކުރައްވަމުން ގެންދަވާ ކަންވެސް ގަރާރުގައި ފާހަގަކޮށްފައިވެއެވެ.
ޕީއެންސީގެ އަސާސީ ގަވާއިދުގެ 88 ވަނަ މާއްދާގައިވާ ގޮތުން، ރައީސުލްޖުމްހޫރިއްޔާ ކަމުގައި ހުންނެވި ޕާޓީގެ މެންބަރަކު ދެވަނަ ދައުރަކަށް ކުރިމަތިލެއްވުމަށް އެދިވަޑައިގަންނަވާނަމަ، ޕްރައިމަރީއަކާ ނުލައި ޓިކެޓް ލިބިވަޑައިގަންނަވާނެއެވެ. ރައީސް މުއިއްޒަށް ދެވަނަ ދައުރެއް ދިނުމަކީ ގައުމީ ވާޖިބެއް ކަމަށް ބުނެ، މި ގަރާރު ފާސްކޮށްދިނުމަށް އަބްދުﷲ އިބްރާހީމް ވަނީ މެންބަރުންގެ ކިބައިން އެދިވަޑައިގެންފައެވެ.
ކޮމެންޓު ފޮނުވާ