ރައްޔިތުންގެ މަޖިލީހަކީ މިހާރު ވެރިކަމުގައި އޮތް އެމްޑީޕީއާއި، އިދިކޮޅު ޕީޕީއެމުން ބާރުވެރިކަން ދައްކައި، ކުޅިވަރުކުޅެން އޮތް މުއަސަސާއެއް ނޫންކަމުގައި ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަދި އެމްއެންޕީގެ ނައިބް ރައީސް އަހުމަދު އުޝާމް ވިދާޅުވެއްޖެއެވެ.

އުޝާމް މިފަދައިން ވިދާޅުވީ، މަޖިލީހުން ނިންމާ ބައެއް ނިންމުންތަކަކީ ވަކި ޕާޓީއަކުން އެކަނި ބޭނުންވެގެން ނިންމާ ނިންމުންތަކަށް ވާތީ އެކަމަށް ފާޑުވިދާޅުވެ ކުރެއްވި ޓުވީޓެއްގައެވެ. އުޝާމް ވިދާޅުވީ ނިމިދިޔަ މަޖިލީހުގައިވެސް ފެނިގެންދިޔައީ އޭރު ވެރިކަމުގައި އޮތް ޕީޕީއެމްގެ މެމްބަރުންގެ ނުފޫޒާއި ބާރުވެރިކަން ދައްކައި މަޖިލިސް ހިންގެވި މަންޒަރުކަމަށެވެ.

އަދި މިހާރު މަޖިލިސް ތެރެއިން ފެނިގެންދަނީ މަޖިލީހުގެ ސުޕަ މެޖޯރިޓީ އޮތް ވެރިކަން ކުރާ މައި ޕާޓީ އެމްޑީޕީން ހަމަ އެއުސޫލުން ކަންކަން ކުރަމުންދާތަން ކަމަށެވެ. މަޖިލީހަކީ އެއްވެސް ހާލެއްގައި އެމްޑީޕީއާއި، ޕީޕީއެމުން ބޭނުންވާހާ ގޮތަކަށް ކަންކަން ކުރަން އޮތް ތަނެއް ނޫންކަމަށް އުޝާމް ވިދާޅުވިއެވެ.

ރައްޔިތުންގެ މަޖިލިސްއޭ މިކިޔަނީ އެމްޑީޕީ އާއި ޕީޕީއެމްގެ ކުޅޭކުޅޭ ތަނަކަށެއް ނޫނެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް މެޖޯރިޓީގެ ބާރު ދައްކާލި ގޮތް އަދި މި އުޅެނީ ހަނދާނުން ނުފޮހިވެގެންނެވެ. އަނެއްކާ މިހާރު ވެސް މި ފެންނަނީ ހަމަ އެކަހަލަ ބާރު ދައްކާލާ ތަނެވެ.

– އުޝާމް ވިދާޅުވިއެވެ.

އުޝާމް މިފަދައިން ވިދާޅުވީ، އެސީސީގެ މެމްބަރުން ވަކި ކުރުމަށް މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ނިންމިއިރު، މެމްބަރުންނަށް ކޮމެޓީއަށް ވަޑައިގެން، ޖަވާބު ދާރީވާން ފުރުސަތު ނުދިނުމުން އެކަމަށް ގިނަ ބައެއްގެ ފާޑުކިޔުންވެސް އަމާޒުވެފައިވާތީއެވެ.

އޭސީސީގެ މެންބަރުން ވަކިކުރުމަށް ބޭއްވި ކޮމިޓީގެ ބައްދަލުވުމުގައި އިނގުރައިދޫ ދާއިރާގެ މެންބަރު ޙަސަން އަޙްމަދު ހުށައެޅުއްވި ހުށައެޅުމަށް ތާޢީދުކުރެއްވީ ބިލެތްދޫ ދާއިރާގެ މެންބަރު އަޙްމަދު ހަލީމްއެވެ. އަދި އެގޮތަށް ފާސްވީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި 8 މެންބަރުންގެ ތެރެއިން 5 މެންބަރުންގެ އަޣްލަބިއްޔަތުންނެވެ.

އޭސީސީގައި މިހާރު ތިއްބެވި ތިން މެންބަރުން ވަކިކުރުމަށް ކޮމިޓީން ފާސްކޮށްފައިވާއިރު، އެ ތިން މެންބަރުންނަކީ ކޮމިޝަނުގެ ރައީސް މަރިޔަމް ޝިއުނާއާއި، ނާއިބު ރައީސް ފާޠިމަތު އަނޫލާގެ އިތުރުން މެންބަރު ޢާއިޝަތު ޢަބްދުﷲ އެވެ. އޭސީސީގެ މެންބަރުން ވަކިކުރުމުގެ މަސައްކަތް މަޖިލީހުން ފަށާފައިވަނިކޮށް އެކޮމިޝަންގައި ހިމެނިވަޑައިގަންނަވާ 2 މެންބަރަކު ވަނީ އިސްތިއުފާ ދެއްވާފައެވެ. އެއީ އިބްރާހީމް ޝަކީލް އާއި އަލީ އަޝްރަފްއެވެ.

އޭސީސީގެ މެންބަރުން ވަކިކުރުމަށް ކޮމިޓީން ނިންމި ނިންމުން ދެން ފޮނުވާނީ މަޖިލީހުގެ ތަޅުމަށެވެ. އަދި ތަޅުމުން މި މައްސަލައަށް ގޮތެއް ނިންމުމަށް ދައުރުން ބޭރުން ޖަލްސާއެއް ބާއްވަން ވަނީ ކަނޑައަޅަފައެވެ.