ށ. ޅައިމަގު "ކުރިމަގު" ބޯޓުގައި މަސައްކަތް ކުރަމުންދިޔަ ބަންގްލަދޭޝްގެ ރައްޔިތެއް ކަމަށްވާ ލުތުފަރު މަރާލި މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ބިދޭސީއަކު ކުއްލި ގޮތަކަށް މިއަދު މަރުވެއްޖެއެވެ. ލުތުފަރުގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ އެމްޑީ އަކްތަރު ހޮސައިން (50އ)އެވެ.
މޯލްޑިވްސް ކަރެކްޝަނަލް ސާރވިސް އިން ބުނީ، ރޭ ފަތިހު ގޮޅީތެރޭ ތާސްކުޅެން އިންދާ މެއަށް ތަދެއް އަރައިގެން ނޭވާލުމަށް ދަތިތަކެއްހުރުމުން އެމަޖެންސީގައި އައިޖީއެމްއެޗަށް ގެންގޮސް ފަރުވާ ދެމުންދަނިކޮށް ނިޔާވެފައިވާކަމަށެވެ. އޭނާ ނިޔާވީ ހާޓް އެޓެކެއް ޖެހިގެންކަމަށް ހޮސްޕިޓަލުން މަޢުލޫމާތު ދީފައިވާކަމަށްވެސް ކަރެކްޝަނުން ބުންޏެވެ.
އަކްތަރުގެ އިތުރުން އެ މައްސަލަގައި ދެން ދައުވާ އުފުލާފައިވަނީ, އަލަމިންއާއި ނޫރުލް އިސްލާމް ސަރުކާރުގެ މައްޗަށެވެ. އެ ދެ މީހުންގެ މައްޗަށް ވެސް އުފުލާފައިވަނީ އެނގިހުރެ ގަސްދުގައި މީހަކު މެރުމުގެ ދައުވާއެވެ.
ކުރިމަގު ބޯޓުގައި މަސައްކަތް ކުރަމުންދިޔަ ލުތުފަރު މަރާލީ އެއް ޖިންސުން ގުޅުން ހިންގާކަމުގެ ތުހުމަތުގައިކަމަށް ފުލުހުން ވަނީ ބުނެފައެވެ. މަރާލާފައިވާ ލުތުފަރުގެ ހަށިގަނޑު ހޯދާފައިވަނީ ކަނޑުގެ އަޑިންނެވެ. މި ބައިތައް ހޯދާފައިވަނީ އޭނާގެ ހަށިގަނޑު އޮތްކަމަށް ބެލެވޭ ސަރަހައްދު ޑައިވްކޮށްގެން ބެލިބެލުމުން ކަމަށް ފުލުހުން މަޢުލޫމާތުދެއެވެ.
