ތިން ޤާޞީއެއްގެ ލީކުވެފައިވާ އޯޑިއޯތަކުގެ މައްސަލައިގައި، އޯޑިއޯ ތަހުލީލް ކުރުމަށް ފުލުހުންގެ ތަހުގީގް ގޮސްފައިވާ ހިސާބެއް ބެލުމަށް މިއަދު އިދިކޮޅު ކޯލިޝަނުން ފުލުސް އޮފީހަށް ދިއުމުން ފުލުހުން އިދިކޮޅު ކޯލިޝަނާއި ބައްދަލު ނުކުރިއެވެ.
މިމައްސަލައިގެ ތަފްސީލް ހޯދުމަށް އިދިކޮޅު ކޯލިޝަންގެ ލީޑަރޝިޕްގައި ހިމެނޭ ގިނަ ބޭފުޅުން މިއަދުވަނީ ފުލުސް އޮފީހަށް ވަޑައިގެންފައެވެ. އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ އޯޑިއޯތަކުގެ މައްސަލައި ފުލުހުންގެ މަސައްކަތް ކުރިއަށް ގޮސްފައިވާ ހިސާބެއް ބެލުމަށް ތަކުރާރުކޮށް ކުރެވިދިޔަ މަސައްކަތަށް ފުލުހުންގެ އެއްބާރުލުމެއް ނުލިބޭކަމަށެވެ.
ތަކުރާރުކޮށް ސިޓީ ފޮނުވައިގެންވެސް އޯޑިއޯ ތަހުލީލުގެ މަރުހަލާ ގޮސްފައިވާ ހިސާބެއް ބެލުމަށް ކުރި މަސައްކަތް ނާކާމިޔާބު ވެފައިވާކަމަށެވެ. އަދި މިއަދު ފުލުސް އޮފީހަށް ދިއުމުން ބައްދަލުނުކުރެވުނީ އިދިކޮޅުން ހިންގާ އިންޑިއާ އައުޓް ހަރަކާތްތަކާއި ގުޅިގެން ސީޕީ އިންޑިއާއަށް ވަޑައިގަންނަވަން ޖެހުމުންކަމަށް ވިދާޅުވެފައިވާކަމަށެވެ.
ނަމަވެސް ކުރިއަށް އޮތް ހަފްތާއެއްހާ ދުވަހުގެ ތެރޭގައި ސީޕީ ބައްދަލު ކުރައްވާނެކަމުގެ އިޝާރާތެއް ކުރައްވާފައިވާކަމަށް އަބްދުއްރަހީމް ވިދާވިއެވެ. އޭނާ ވިދާޅުވީ މިކަމަކީ ވަރަށް ސީރިއަސް ކަމަކަށްވާއިރު، އަދި ސްޕްރީމްކޯޓުން ހުކުމަކައި ހަމައަށް ގޮސްފައިވާ މައްސަލައަކަށްވާއިރު، މިމައްސަލަ ވީހާވެސް އަވަހަށް ތަހުގީގްކޮށްނިމެން ޖެހޭކަމަށެވެ.
