ރައީސް ޔާމީން އިލްތިމާސަކީ ހުރިހާ ބޭފުޅުން ވެސް އެންމެ އިސް މަސްއޫލިއްޔަތަކަށް ގައުމު ސަލާމަތް ކުރުން ހައްދަވުން ކަމުގައި އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއްޖެއެވެ.
އިދިކޮޅު ޕީޕީއެމްއަށް 10 އަހަރު ފުރުން ފާހަގަ ކުރުމަށް ރޭ މުޅި ރާއްޖޭގައި ހިންގި ދިދަ ނެގުމުގެ ރަސްމިއްޔާތުގެ ތެރެއިން މާލޭ ޕީޕީއެމް އޮފީހުގައި ހިންގި ހަރަކާތުގައި ވާހަކަ ދައްކަވަމުން އަބްދުއްރަހީމް ވިދާޅުވީ ރައީސް ޔާމީން ހުންނެވީ ޤައުމީ ޚިދުމުގައި ސާބިތުކަމާއި އެކުގައި ކަމަށެވެ. އެމަނިކުފާނުގެ އިލްތިމާސަކީ ކޮންމެ ރައްޔިތަކުވެސް ޤައުމު ސަލާމަތް ކުރުމަކީ އެންމެ އިސް މަސްއޫލިއްތަކަށް ހެއްދެވުންކަމަށެވެ.
ތަފާތު އެކި ހުށައެޅުންތައް އައުމުންވެސް ގަބޫލުފުޅު ނުކުރައްވާ، އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމް ރާއްޖޭގައި ހުންނެވީ ދިވެހި ގައުމަށް އަދިވެސް އިހުލާސްތެރި ހިދުމަތްތަކެއް ކޮށްދެއްވުމަށް ބޭނުންފުޅުވާތީ ކަމަށް އަބްދުއްރަހީމް ވިދާޅުވިއެވެ. 2013 ވަނަ އަހަރު ގާއިމު ވެގެން ދިޔަ ރައީސް ޔާމީންގެ ވެރިކަމަކީ ހުރިހާ ގޮތަކުން ބެލިނަމަވެސް އެންމެ ފަހުރުވެރި އެންމެ ގިނަ ތަރައްގީގެ މަޝްރޫއުތައް ހިންގި ވެރިކަން ކަމަށް އަބްދުލްރަހީމް ވިދާޅުވިއެވެ.
ރާއްޖޭގެ ޗާޓަށް ބަދަލު ގެނެސް އުއްމީދު ނުކުރާވަރުގެ ތަރައްގީގެ މަޝްރޫއުތައް ހިންގައި، ރައްޔިތުންނަށް އުފާފާގަތިކަން ގެނެސްދެއްވި. ދިވެހިރާއްޖޭގެ އިސްލާމްދީނަށް ބުރޫ އަރާފަދަ އެއްވެސް ކަމެއް ނުކޮށް، އިސްލާމްދީނަށް ފުރައްސާރަ ކުރުމުގެ އެއްވެސް ފުރުސަތު މިބިމުގައި އެމަނިކުފާނު ނުދެއްވާ.
– އަބްދުލްރަހީމް ވިދާޅުވިއެވެ.
އަބްދުއްރަހީމް ވިދާޅުވީ އަންނަ ނޮވެންބަރު މަހަށް ރައީސް ޔާމީންގެ ޖަލު ހުކުމަށް ދެ އަހަރު ފުރޭއިރު އެމަނިކުފާނަށް ލިބިވަޑައިގަންނަވަނީ ހައްގު އަދަބެއް ނޫން ކަމަށެވެ. ނަމަވެސް އެ އަނިޔާތަކަށް ރައީސް ޔާމީން ކެތްތެރިވެ ހުންނެވީ ގައުމާއި ރައްޔިތުންގެ ހައްގުގައި ކަމަށެވެ. އަބްދުއްރަހީމް ވަނީ ދެ އަހަރު ދުވަހު ޖަލުގައި ހުންނަވަން ކެރިވަޑައިގެން ލީޑަރަކީ ކޮބައިތޯ ސުވާލު ކުރައްވާފައެވެ. އަދި ތަފާތު އެކި ހުށައެޅުންތައް އައުމުންވެސް ގަބޫލުފުޅު ނުކުރައްވާ، އެމަނިކުފާނު ރާއްޖޭގައި ހުންނެވީ ދިވެހި ގައުމަށް އަދިވެސް އިހުލާސްތެރި ހިދުމަތްތަކެއް ކޮށްދެއްވުމަށް ބޭނުންފުޅުވާތީ ކަމަށެވެ.
2018 ވަނަ އަހަރު އައި ރައީސް ސޯލިހްގެ ވެރިކަމުން ހަމައެކަނި ކުރިކަމަކީ ރައީސް ޔާމީނަށް އަނިޔާ ކުރުން ކަމަށް ވެސް އަބްދުލްރަހީމް ވިދާޅުވިއެވެ.
