ދިވެހި ރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާންގެ ގެކޮޅުގެ ސެކިއުރިޓީ ބްރީޗްވި ގޮތް ދެނެގަތުމަށް ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
މިމައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖުއެވެ. ސިރާޖު ހުށަހެޅުއްވި މައްސަލަ ބަލައިގަނެ މަޖިލީހުގައި ވަނީ ބަހުސްކޮށްފައެވެ. މިބަހުސްގައި މެމްބަރުންވަނީ ދައުލަތުގެ އެންމެ މަތީ ވެރިންގެ ސަލާމަތަށް މިފަދަ ނުރައްކާތެރި ކަންކަން ދިމާވަމުންދާއިރު މިކަމުގައި ސީރިއަސް ގޮތްތަކަށް އަމަލު ކުރަންޖެހޭކަމަށެވެ.
އިއްޔެ ބޭއްވި ރައްޔިތުންގެ މަޖިލީހުގެ ޖަލްސާގައި ހޯމް މިނިސްޓަރ އިމްރާން ވިދާޅުވީ ރާއްޖޭގައި މިފަދަ ހުރިހާ ކަމެއް ހިނގައިދާ އެންމެ ބޮޑު ސަބަބަކީ މަސްތުވާތެތީގެ މައްސަލަ ބޮޑުވުމުންކަމަށެވެ. ދާދިފަހުން އުއްތަމަ ފަނޑިޔާރުގެ ގެކޮޅަށް ވަތް މީހަކީވެސް މަސްތުގެ ހާލަތުގައި ހުރެ އެގެއަށް ވަނުމަށް މަސައްކަތް ކުރި މީހެއްކަމަށާއި، އެމައްސަލަވެސް ފުލުހުން މިހާރު ތަހުގީގު ކުރަމުންދާކަމަށެވެ.
ސިރާޖު ހުށަހެޅުއްވި މައްސަލާގައި ބުނެފައިވަނީ މަޖިލީހުގެ ރައީސް، މުޙައްމަދު ނަޝީދު މިހާރުވެސް ގެންދަވަނީ އެމަނިކުފާނުގެ ފުރާނަފުޅަށް އަމާޒުކޮށް 6 މެއި 2021 ވަނަ ދުވަހު ދީފައިވާ ނުރައްކާތެރި ޓެރަރިސްޓް ހަމަލާގެ ޒަހަމްތަކަށް ފަރުވާ ހޯއްދަވަމުން ކަމުގައެވެ. ރައީސް ނަޝީދުގެ ފުރާނަފުޅަށް އަމާޒުކޮށް ހަމަލާ ދެވިފައިވަނީ ސެކިއުރިޓީ ބްރީޗް ވެގެން ކަމަށާއި، މިހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމެޓީން ހިންގުނު ޕާލިމަންޓަރީ އިންކުއަރީއިން އެންމެ ބޮޑަށް ފާހަގަ ކުރެވުނު އެއްކަމަކީ 6 މެއި ގައި ހަމަލާ ދެވިފައިވަނީ ސަލާމަތީ ޚިދުމަތް ފޯރުކޮށްދިނުމުގައި ބަލަންޖެހޭ ކަންކަން ބަލަންޖެހޭ މިންވަރަށް ބެލިފައިނުވާތީ ކަމުގައެވ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ޓެރަރިސްޓް ހަމަލާއެއް ދެވުނުތާ 5 މަސް ހަމަނުވެއޮއްވައި އަޅުގަނޑުމެންނަށް އަޑު އިވިގެންމިދިޔައީ ދިވެހިރާއްޖޭގެ ސުޕްރީމް ކޯޓުގެ އުއްތަމަ ފަނޑިޔާރުގެ ސެކިއުރިޓީ ބްރީޗްއެއް ހިނގައިފިކަމުގަ. ދައުލަތުގެ ތިން ބާރުގެ ތެރެއިން ދެ ބާރުގެ ވެރިންގެ ސެކިއުރިޓީ ބްރީޗްވުމަކީ މުޅި ރައްޔިތުންގެ ސެކިއުރިޓީއާމެދު ސުވާލު އުފެދޭކަމެއް. އަދި ބިރުވެރި ކަމެއް.
– ސިރާޖުގެ މައްސަލާގައި ބުނެފައިވެއެވެ.
އުއްތަމަ ފަނޑިޔާރުގެ ގެކޮޅަށް ވަންނަން މަސައްކަތްކުރީ މަސްތުވާތަކެތީގެ ސިކާރައަކަށް ވެފައިވާ ފަރާތެއްކަމުގައި ބުނެ ކަންކަން ނިންމާލެވޭ ވަރަށްވުރެ މިފަދަ ކަންކަން ސީރިއަސްކޮށް ނަގަންޖެހޭ ހިސާބަށް މިހާރު ޤައުމުގެ ހާލަތު ވަނީ ގޮސްފައިވާ ކަމެއްކަމަށް ވަނީ ބުނެފައެވެ.
