މި ސީޒަނުގެ ފްރެންޗް ލީގުގައި ޕީއެސްޖީ މޮޅުވަމުން އައި ސިލްސިލާއަށް ރެެނެސް އިން ނިމުން ގެނެސްފިއެވެ.
ރެނެސްގެ އަމިއްލަ ދަނޑުގައި ކުޅުނު މި މެޗުން ޕީއެސްޖީ ބަލިވީ 0-2 ގެ ނަތީޖާއަކުންނެވެ. މިއީ ދުނިޔޭގެ އެންމެ މޮޅު އެއް ކުޅުންތެރިޔާ މެސީ ޕީއެސްޖީއަށް ބަދަލުވިފަހުން އެޓީމު ބަލިވި ފުރަތަމަ ފަހަރުކަން ފާހަގަކޮށްލެވެއެވެ.
މި މެޗުގެ ފުރަތަމަ ހާފުގައި ޕީއެސްޖީގެ ފަރާތުން ވަނީ ރަނގަޅު ކުޅުމެއް ފެނިގެންގޮސްފައެވެ. އަދި ރެނެސްގެ ގޯލާއި އަމާޒުކޮށް ގިނަ ހަމަލާތަކެއްވެސް އުފެއްދިއެވެ. މެޗުގައި ރެނެސް އިން ލަނޑު ޖަހާ ލީޑު ނެގީ ފުރަތަމަ ހާފްގެ 45 ވަނަ މިނެޓުގައެވެ. މި ލަނޑު ރެނެސްއަށް ކާމިޔާބުކޮށްދިނީ، ގަޓޭޓާން ލަބޯޑްއެވެ.
މެޗުގެ ދެވަނަ ހާފް ފަށައިގެން 46 ވަނަ މިނެޓުުގައި ރެެނެސްއިން ވަނީ ދެވަނަ ލަނޑެއް ޖަހާ ޕީއެސްޖީ ސިއްސުވާލާފައެވެ. މި ލަނޑު އެޓީމަށް ކާމިޔާބުކޮށްދިނީ، ފްލޭވިއަން ޓައީޓްއެވެ.
މި މެޗުން ޕީއެސްޖީ ބަލިވި ނަމަވެސް، އެ ޓީމު އޮތީ ތާވަލުގެ އެއްވަނައިގައި ކުޅުނު ނުވަ މެޗުން ލިބުނު 24 ޕޮއިންޓާއެކުއެވެ. ދެވަނައިގައި އޮތް ލެންސްއަށް ނުވަ މެޗުން 18 ޕޮއިންޓް ލިބިފައިވާއިރު، ޕީއެސްޖީ ބަލިކުރި ރެން އޮތީ ތާވަލުގެ ހަތްވަނައިގައި ނުވަ މެޗުން 12 ޕޮއިންޓާއެކުއެވެ.
