ރައްޔިތުންގެ މަޝްވަރާއަކާ ނުލައި ހއ.ފިއްލަދޫ އިހްތިސާސުން ދައްޕަރު ވަކިކުރި މައްސަލައިގައި ފިއްލަދޫ ރައްޔިތުން، މަޖިލީހުގެ ރިޔާސަތުގެ އެއްބާރުލުމާއެކު ހުށަހެޅި ޕެޓިޝަން އޮއްބާލަން މަޖިލީހުން މަސައްކަތްކުރުމަކީ ބަލައިގަނެވޭނެ ކަމެއްނޫންކަމަށް ޓްރާންސްޕޭރެންސީ މޯލްޑިވްސް އިން ބުނެފިއެވެ.
ޓްރާންސްޕޭރެންސީ އިން މި ކަންބޮޑުވުން ފާޅުކޮށްފައިމިވަނީ، އިއްޔެ ބޭއްވި ޕެޓިޝަން ކޮމިޓީގައި، ފިއްލަދޫ އިހުތިސޯސުން ދައްޕަރު ވަކިކުރި މައްސަލައިގައި ރައްޔިތުންގެ ހުރި ކަންބޮޑުވުންތައް ހިމާ މަޖިލީަށް ހުށަހަޅާފައިވާ ޕެޓިޝަން ކުރިއަށް ނުގެންގޮސް މަޑުޖައްސާލުމަށް ޕެޓިޝަން ކޮމިޓީގެ ބައެއް މެންބަރު ވާހަކަ ދެއްކުމާއި ގުޅިގެންނެވެ. ކޮމިޓީގައި ހިމެނިވަޑައިގަންނަވާ އެމްޑީޕީގެ ބައެއް މެންބަރުން ވަނީ ފިއްލަދޫ އިޙްތިޞާސްގެ މައްސަލަ އިހަށް މަޑުޖައްސާލުމަށް ގޮވާލައްވާފައެވެ.
ރައްޔިތުންގެ މަޖިލީހުގެ ޕެޓިޝަން ކޮމިޓީއަށް ހުށަހެޅިފައިވާ ޕެޓިޝަންތައް ދިރާސާކުރުން pic.twitter.com/4R1nRuGmbv
— People's Majlis (@mvpeoplesmajlis) September 29, 2021
މިކަމުގެ ކަންބޮޑުވުން ފާޅުކޮށް ޓްރާންސްޕޭރެންސީން ބުނީ، ރައްޔިތުންގެ މަޝްވަރާއަކާ ނުލާ ފިއްލަދޫ އިހްތިސާސުން ދައްޕަރު ވަކިކުރި މައްސަލައިގައި ފިއްލަދޫ ރައްޔިތުން މަޖިލީހުގެ ރިޔާސަތުގެ އެއްބާރުލުމާއެކު ހުށަހެޅި ޕެޓިޝަން އޮއްބާލަން މަޖިލީހުން މަސައްކަތްކުރުމަކީ ބަލައިގަނެވޭނެ ކަމެއްނޫންކަމަށެވެ. މެންބަރުންނަކީ ރައްޔިތުންގެ ހައްގުތައް ރައްކާތެރިކޮށް، ވެރިކަމުގެ ނިޒާމު ހަރުދަނާކުރުމަށް ރައްޔިތުންގެ ހިޔާލާއި އަޑު ސަރުކާރުގެ ވެރިންނާއި ހަމައަށް ފޯރުކޮށްދިނުމުގެ ޒިންމާ އުފުލަން ޖެހޭ ބަޔަކަށް ވާހިނދު ސަރުކާރުގެ މަސްލަހަތު އިސްކުރުމަކީ ހިތާމަކުރާކަމެއްކަމަށްވެސް ޓްރާންސްޕޭރެންސީން ބުންޏެވެ.
ޓްރާންސްޕޭރެންސީން ވަނީ، ރައްޔިތުންނާއި ސީދާ ގުޅިފައިވާ މުހިއްމު މައްސަލަ ތަކުގައި، ރައްޔިތުން ތަމްސީލުކުރުމަށް ހޮވާފައިވާ މެންބަރުންގެ ޒިންމާއަކަށްވާނީ ސަރުކާރު ޖަވާބުދާރީކޮށް، ރައްޔިތުންގެ އަޑު އުފުލުން ކަމުގައި ހަނދާންކޮށްދޭކަމަށްވެސް ބުނެފައެވެ.
އެހެންކަމުން، ފިއްލަދޫ ރައްޔިތުންގެ ޕެޓިޝަން އޮށްބާލަން ކުރާ މަސައްކަތް މިހާރުން މިހާރަށް ހުއްޓާލުމަށް ރައްޔިތުންގެ މަޖިލީހުގެ މެންބަރުންނަށް ގޮވާލުމާއި އެކު، ވެރިކަން ހިންގުމުގެ ބާރު ޒިންމާދާރުކުރުވުމަށް ގޮވާލަންް!
– ޓްރާންސްޕޭރެންސީ މޯލްޑިވްސް
3. ރައްޔިތުންނާއި ސީދާ ގުޅިފައިވާ މުހިއްމު މައްސަލަ ތަކުގައި، ރައްޔިތުން ތަމްސީލުކުރުމަށް ހޮވާފައިވާ މެންބަރުންގެ ޒިންމާއަކަށްވާނީ ސަރުކާރު ޖަވާބުދާރީކޮށް، ރައްޔިތުންގެ އަޑު އުފުލުން ކަމުގައި ހަނދާންކޮށްދެން. @mvpeoplesmajlis #SaveDhapparu
— Transparency MV (@TransparencyMV) October 2, 2021
ދައްޕަރަކީ ހއ.ފިއްލަދޫގެ އުތުރުން އެރަށާގުޅިފައި އޮންނަ ރަށެކެވެ. 2010 އަހަރު ހއ.ދައްޕަރަކީ ފަޅުރަށެއްގެ ގޮތުގައި ކަނޑައަޅައި، އެރަށުގައި ރިސޯޓެއް ތަރައްޤީކުރުމަށް ބަޔަކާއި ހަވާލުކުރިއެވެ. ނަމަވެސް ރިސޯޓް ތަރައްޤީކުރުން އެރަށުގައި ކުރިއަށް ގެންގޮސްފައެއް ނުވެއެވެ. އޭގެ ފަހުން މިދޔަ އަހަރުގެ މާރިޗް 18 ގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ފިއްލަދޫގެ އިހުތިޞާސްގެ ތެރޭގައި ދައްޕަރު ހިމަނުއްވާފައެވެ. ނަމަވެސް ފަހުން ރައީސް އޮފީހުން ނެރުނު ގަރާރެއްގައި ވަނީ ފިއްލަދޫގެ އިދާރީ ދާއިރާގެ އިހުތިޞާސްގެ ތެރެއިން ދައްޕަރު ވަކިކޮށްފައެވެ.
މިކަމާއި ގުޅިގެން އެރަށު ރައްޔިތުންގެ ކަންބޮޑވުންތައް ހިމަނާ މަޖިލީހަށް ވަނީ ޕެޓިޝަނެއް ހުށައަޅާފައެވެ. ދައްޕަރު މައްސަލާގައި ފިއްލަދޫ ހިމެނޭ ކެލާ ދާއިރާގެ މެންބަރު އިބްރާހީމް ޝަރީފް އެރަށަށް ވަޑައިގެން އުޅުއްވަނިކޮށް، ރަށުގެ ޒުވާނުން އޭނާގެ އިސްތިއުފާއަށް ގޮވާ އޭނާ ވަނީ ރަށުން ބާލާފައެވެ.
