ދުނިގޭގެ މަޝްހޫރު، މޯބައިލް ފޯނު އުފައްދާ ކުންފުނި ކަމުގައިވާ ހުއާވޭ ކުންފުނީގެ ޗީފް ފައިނޭންޝަލް އޮފިސަރ، މެން ވަންޒްހައު، އެމެރިކާ، ކެނެޑާ އަދި ޗައިނާއިން ވީ އެއްބަސްވުމެއްގެ ދަށުން، ކެނެޑާއިން މިނިވަން ކޮށްފިއެވެ.
ޗައިނާގެ ވަރުގަދަ ޓެކް ކުންފުނި، ހުއާވޭގެ އެންމެ އިސް އެއްވެރިއެއްގެ ގޮތުގައި ހުންނެވި، މެންގ ކެނެޑާއިން މިނިވަން ކޮށްފައި މިވަނީ، މީގެ ދެއަހަރު ކުރިން، އެމެރިކާއިން އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހުއާވޭ ކުންފުނިން ޚިލާފްވެ، ހުއާވޭ ކުންފުނިން މި ފިޔަވަޅުތަކަށް މަކަރު ހަދާފައިވާ ކަމަށް އެމެރިކާއިން ކުރި ތުހުމަތުތަކާ ގުޅޮގެން ކެނެޑާގައި އޭނާ ހައްޔަރު ކުރެވި، ދެއަހަރު ވަންދެން ކުރިޔަށް ދިޔަ ގާނޫނީ ވަރަށް ބޮޑު "ހަގުރާމަ"އަކަށް ފަހުއެވެ.
މިހަފްތާގެ ހުކުރުދުވަހު، މެންގ ވަނީ، ކެނެޑާގެ ބްރީކްލީން ކޯޓު ރޫމުގައި އޮތް، އެމެރިކާއަށް އޭނާ ޑީޕޯޓު ކޮށްލުމާ ގުޅޭ އަޑުއެހުމަކަށް ހާޒިރު ވެފައެވެ. މި އަޑު އެހުމުގައި، ފަނޑިިޔާރުވަނީ، އޭނާ އެމެރިކާއަށް ޑީޕޯޓު ކުރުން ލަސް ކުރުމާ ގުޅޭގޮތުން ވެފައިވާ އެއްބަސްވުމަށް ހުއްދަ ދެއްވާފައެވެ.
މެންގއާއި އެމެރިކާގެ ސްޓޭޓް ޑިޕާޓްމަންޓާމެދު ވެފައިވާ އެއްބަސްވުމުގެ ދަށުން، ކުރެވިފައިވާ ތުހުމަތުތަކާ ކުރިމަތިކލުމަށް އެމެރިކާއަށް އޭނާ ގެނައުމަށް އެމެރިކާއިން އެދިފައިވާ އެދުމުގެ މައްސަލަ ހައްލުވެ، ކެނެޑާއިން އޭނާ މިނިވަން ކުރުމާއި ގުޅިގެން، ޗައިނާއާއި ހުޅަގުގެ ގައުމުތަކާ ދެމެދު އުފެދިފައިވާ ނުތަނަވަސްކަމަށް ވަރަށް ބޮޑު ހައްލެއް ލިބިގެންދާނެ ކަމަށް މަސްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.
މިހަފްތާގެ ހުކުރު ދުވަހު ވަންކޯވަރގައި، ބްރިޓިޝް ކޮލަމްބިއާ ސުޕްރީމް ކޯޓު ޖަސްޓިސް ހީތަރ ހޯލްމްސް ވަނީ، އޭނާ އެމެރިކާއަށް ފޮނުވާލުން މިވަގުތަށް ދޫކޮލުމަށް ނިންމާފައިވާ ނިންމަށް ހުއްދަ ދެއްވާފައެވެ.
އަދި މި ހުށަހެޅުން ކޯޓަށް ހުށަހެޅުއްވި އެޓާރނީ ޖޯން ގިބް ކާރސްލޭ ވަނީ މިއީ މި ކޭސްގެ "އެންމެ ފަހުގެ މަރުހަލާ" ކަމުގައި ވިދާޅުވެފައެވެ.
ވެން ކޯވަރ ކޯޓް ހައުސްގެ ބޭރުގައި ހުންނަވާ ވާހަކަ ދައްކަވަމުން މެންގ ވަނީ ފަނޑިޔާރު ހޯލްމްސް އަށާއި، ރާނީ އަށާއި އަދި ކެނެޑާއަށްވެސް ވަރަށް ބޮޑަށް ޝުކުރު އަދާ ކުރައްވާފައެވެ.
"ފާއިތުވެދިޔަ 2 އަހަރަކީ އަހަރެންގެ ހަޔާތް އެފުށް މިފުށަށް ޖެހިގެންދިޔަ ދެ އަހަރު،" ކޯޓްހައުސްގެ ބޭރުގައި ހުންނަވާ ކިޔުއްވި ބަޔާނެއްގައި މެންގ ވިދާޅުވެފައި ވެއެވެ. "މަންމައެއް، އަންބެއް އަދި ކުންފުންޏެއްގެ އިސްވެރިއެއްގެ ހައިސިއްޔަތުން، މި މުއްދަތަކީ، ހަޔާތަށް ބޮޑެތި ލޮޅުންތަކެއް އައި މުއްދަތެއް، މިއީ ހަގީގަތުގައިވެސް އަހަރެންނަށް ލިބިގެންދިޔަ އަގުނުކުރެވޭނޭ ތަޖުރިބާތަކެއް… ހަރުބަހެއްގައި ބުނާފަދައިން، ބޮޑެތި ގޮންޖެހުންތަކާ ކުރިމަތީ ލީވަަރަކަށް ދާނީ ކުރިއަރަމުން،" އޭނާ ވިދާޅުވެފައި ވެއެވެ.
މީގެކުރިން، ކޯޓުގެ ފަނޑިޔާރު ހޯލްމްސްވަނީ، މެންގ އަށާއި އޭނާގެ ގާނުނީ ޓީމަށް ޝުކުރު އަދާ ކުރައްވާފައެވެ.
"މެންގ، ތިބޭފުޅާ ވަނީ، ކޯޓުގައި ބޭއްވުނު ހުރިހާ އަޑުއެހުމެއްގައިވެސް، ކޯޓަށް ވަރަށް ބޮޑު އެއްބާރުލުމެއް ދެއްވާފަ، އެހެންކަމުން ކޯޓުން ތިބޭފުޅާއަށްވެސް އަދި ގާނޫނީ ޓީމަށްވެސް ވަރަށް ބޮޑު ޝުކުރެއް ދަންނަވަން،" ފަނޑިޔާރު ހޯލްމްސް ވިދާޅުވެފައި ވެއެވެ.
އެންމެ ފަހުން ބޭއްވުނު އަޑު އެހުމަށްފަހު، މެންގ ކެނެޑާއިން ފުރައިގެން ދިއުމުގައި އެއްވެސް ހުރަހެއް ނެތްކަން ހާމަކޮށް، ކެނެޑާގެ ޖަސްޓިސް ޑިޕާޓްމަންޓުންވަނީ ބަޔާނެއް ނެރެފައެވެ.
