ގުޅީފަޅުގައި ޕޯޓް އެޅުމަށް ހިންގާ މަޝްރޫޢުގެ ދަށުން ގުޅީފަޅު ހިއްކާތީ، އެކަމުގެ ސަބަބުން ތިމާވެއްޓަށް ގެއްލުންވާކަމަށްބުނެ އެ މަޝްރޫޢުއު ހުއްޓުވުމަށް ސިވިލް ކޯޓަށް މައްސަލައެއް ވައްދައިފިއެވެ.
ގުޅީފަޅު ހިއްކުން ހުއްޓުވުމަށް ސބިލް ކޯޓަށް ހުށައަޅަފައިވަނީ ތިމާވެށީގެ އެކްޓިވިސްތެއްކަމަށްވާ އަބްދުލްގަފޫރު (ހުމޭ)އެވެ. އޭނާއަކީ ތިމާވެށީގެ ކަންކަމުގައި އަޑއުފުލާ ސޭވް ދަ މޯލްޑިވްސްގެ މެންބަރެއްވެސްމެއެވެ. އެނާ ހުށައެޅި މައްސަލަ ރައްދުވަނީ އެންވަޔަރަމަންޓް ޕްރޮތެކްޝަން އެޖެންސީ (އީޕީއޭ)އާއި، ހައުސިން މިނިސްޓްރީއާއި، އެންވަޔަރަމަންޓް މިނިސްޓްރީއަށެވެ.
މި މައްސަލަ މިހާރު ވަނީ ސިވިލް ކޯޓަށް ބަލައިގެންފައެވެ. އޭނާ ހުށައެޅި މި މައްސަލާގައި ވަނީ ގުޅީފަޅު ހިއްކުމުގެ މަޝްރޫޢޫގެ ސަބަބުން ތިމާވެއްޓަށާއި، ޢުމްރާނީއ ަދި އިޤްތިޞާދީ ގޮތުންވެސް ގެއްލުންތަކެއްވާކަމަށެވެ.
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ސަރުކާރުގެ ވަޢުދެކެވެ. ނަމަވެސް ފަހުން ސަރުކާރުން ވަނީ މި މަޝްރޫޢު ގުޅީފަޅަށް ބަދަލުކޮށްފައެވެ.
ގުޅީފަޅުގައި ވިޔަފާރި ބަނދަރެއް ތަރައްޤީކުރުމަށް ސަރުކާރުން ނިންމާފައިވަނީ މާލޭގެ ވިޔަފާރި ބަނދަރަށް ދިމާވެފައިވާ ޖާގައިގެ ދަތިކަމާއި ހެދި ރާއްޖޭގެ އިޤްތިސާދަށް ނޭދެވޭ އަސަރުތަކެއް ކުރުމުގެ ސަބަބުންނެވެ.
މިކަމަށް ހައްލެއް ގެނެސް ސަރަޙައްދީގޮތުން ފާހަގަކޮށްލެވޭ އަދި ޒަމާނަށްފެތޭ ބޮޑު ބަނދަރެއް އެޅުމުގެ މަސައްކަތް ސަރުކާރުން ކުރަމުން އަންނައިރު މި ބަނދަރާއެކު ރާއްޖެއަށް އެތެރެކުރާ މުދަލުގެ އަގުހެޔޮވެ، އިޤްތިސާދަށް ރަނގަޅު ބަދަލެއް އަންނާނެކަމަށް ތަޖުރިބާކާރުން ލަފާކުރެއެވެ.
ގުޅީފަޅު ޕޯޓު ތަރައްޤީކުރުމަކީ މިއަހަރަށް ސަރުކާރުން ބަޖެޓުކޮށްފައިވާ މަޝްރޫޢުތަކުގެ ތެރެއިން މުހިއްމު މަސައްކަތެކެވެ.
