އަލްޖީރިއާގެ ކުރީގެ ރައީސް އަބުދުލް އަޒީޒް ބޫތަފްލިކާ އުމުރުން 84 އަހަރުގައި އަވަހާރަ ވެއްޖެއެވެ.
20 އަހަރަށްވިރެ ގިނަދުވަހު އަލްޖީރިއާގެ ވެރިކަން ކުރެއްވުމަށްފަހު ބޫތަފްލިކާ ވެރިކަމުން އިސްތިއުފާ ދެއްވީ، 2019ވަނަ އަހަރު އޭނާގެ ވެރިކަމާ ދެކޮޅަށް އެގައުމުގައި ހިގައިދިޔަ ބޮޑެތި މުޒާހިރާތަކަށް ފަހުއެވެ.
އަދި، އަލްޖީރިއާގައި، ބޫތަފްލިކާގެ ވެރިކަން ނިމުމަކަށް ގެނައުމަށް އޭރު މުޒާހިރާ ކުރި "ހިރާކް މޫވްމަންޓް" އިންވަނީ އަނެއްކާވެސް އެގައުމުގައި މުޒާހިރާ ކުރަން ފަށާފައެވެ. މި މޫވްމަންޓުން ގޮވަމުންދަނީ އެމީހުން ބޭނުންވަނީ އަސްކަރީ ވެރިކަމެއް ނޫންކަމަށާއި ބޭނުންވަނީ މަދަނީ ވެރިކަމެއް ކަމުގައެވެ.
އަލްޖީރިއާގެ މިނިވަންކަމަށް ކުރެވުނު ހަގުރާމާގައި ބައިވެރި ވެފައިވާ، އަލްޖީރިއާގެ ފަހުގެ ޖީލުތަކަށް ފެނިފައިވާ ހަމައެކަނި ލީޑަރު ކަމުގައިވާ ބޫތަފްލިކާ އެންމެ ފުރަތަމަ އަލްޖީރިއާގެ ވެރިކަމަށް އިސްވެވަޑައިގަތީ 1999 ވަނަ އަހަރުއެވެ. އަދި އޭނާ އެއަށްފަހު އަމިއްލަފުޅަށް އެގައުމުގައި މަޝްހޫރު ވެވަޑައިގަތީ އަލްޖީރިއާގެ އަހުލީ ހަގުރާމަ ނިމުމަކަށް ގެންނެވި ލީޑަރުގެ ގޮތުގައެވެ.
2013 ވަނަ އަހަރު ބޫތަފްލިކާއަށް ސްޓްރޯކެއް ޖެހިވަޑައިގަތުމަށްފަހު އޭނާ އާންމުންގެ ތެރެއިން ފެނިފައިވަނީ ވަރަށް މަދުންނެވެ.
ބޫތަފްލިކާގެ ދިގުވެރިކަން، ކުރެވެމުންދިޔަ މުޒާހިރާތަކަށްފަހު ނިމިގެން ދިއުމާއެކު، އަލްޖީރިއާގެ މުވައްސަސާތަކުންވަނީ އޭނާގެ ވެރިކަމުގައި ހިގައިދިޔަ ކޮރަޕްޝަންތައް ތަހުގީގުކޮށްފައެވެ. އަދި މިތަހުގީގުގައި ކޮރަޕްޝަންގެ އެތައް އަމަލެއް ހިންގާފައިވާކަން ސާބިތުވެ، އޭނާގެ ވެރިކަމުގެ އިސް އެތައް އޮފިޝަލުންނެއް އެގައުމުގައި ޖަލަށް ލާފައި ވެއެވެ.
މީގެ ތެރޭގައި، ބޫތަފްލިކާގެ ވެރިމުގައި ބާރުގަދަ، އަދި އޭނާގެ އެޑްވައިޒަރެއްގެ މަގާމުގައި ހުންނެވި އޭނާގެ ބޭބެ ސާދިއުވެސް ހިމެނެއެވެ. ސާއިދު ޖަލަށް ލާފައިވަނީ 15 އަހަރުގެ މުއްދަތަކަށެވެ. އަދި އޭނާގެ މައްޗަށް، ބޫތަފްލިކާގެ ވެރިކަމަށްފަހު އެގައުމުގައި ގާއިމްކުރެވުނު ވެރިކަމާ ދެކޮޅު ހަރަކާތްތައް ހިންގުމުގު ކުށްވެސް ވަނީ ސާބިތު ވެފައެވެ.
ފްރާންސްގެ އިސްތިއުމާރުން އަލްޖީރިއާއަށް 1962ވަނަ އަހަރު މިނިވަންކަން ލިބިގެން ދިއުމާއެކު، ބޫތަފްލިކާ ވެވަޑައިގަތީ އަލްޖީރިއާގެ ފުރަތަމަ ފޮރިންގ މިނިސްޓަރަަށެވެ. އަދި އެއަށްފަހު ވަކިފަރާތަކަށް ނުޖެހޭ ހަރާކުގެ އިސްފަރާތެއްގެ ހައިސިއްޔަތުން އޭނާ ވަނީ އެފްރިކާ، އޭޝިއާ އަދި ލެޓިން އެމެރިކާގެ ފަރާތުން ވަކާލާތު ކޮށްފައެވެ.
ޔޫއެން ޖެނެރަލް އެސެމްބްލީގެ ރައީސެއްގެ ހައިސިއްޔަތުން އޭނާވަނީ ފަލަސްތީނުގެ ކުރީގެ ރައީސް ޔާސިރު އަރަފާތަށް ޔޫންގައި ތަގްރީރު ކުރުމުގެ ފުރުސަތު 1974ގައި ދެއްވާފައެވެ. އަދި މިފުރުސަތު ވެގެން ދިޔައީ، ފަލަސްތީނުގެ ރައްޔިތުން މިނިވަންކަމަށް ކުރަމުން އައި ޖިހާދަށް ބައިނަލްއަގުވާމީ ރުހުން ލިބިގެން ދިޔަ ފުރުސަތު ކަމުގައެވެ.
