ވިނަރެސް މަޝްރޫޢު ކިޔާ ހައުސިން މަޝްރޫޢުއެއް ނޯންނާނެކަމަށް ކުރީގެ އިކޮނޮމިކް މިނިސްޓަރ އަދި ޕީއެންސީގެ ނާއިބު ރައީސް މުޙައްމަދު ސަޢީދު ވިދާޅުވެއްޖެއެވެ.
ސަޢީދު މިހެން ވިދާޅުވީ، ހުޅުމާލޭގައި ކުރިއަށްގެންދާ ވިނަރެސް ހައުސިންގ މަޝްރޫޢުގެ މަސައްކަތް ލަސްވަނީ ކުރީ ސަރުކާރުން ޢަމަލުކޮށްފައިވާގޮތުންކަމަށް އެޗްޑީސީން ބުނުމާއި ގުޅިގެންނެވެ.
ސަޢީދު ވިދާޅުވީ، ފަސް އަހަރު ނިމިގެންދާއިރުވެސް ސަރުކާރަށް ކަންކަން ހާސިލްކޮށްދޭވެ މާހައުލެއް ސަރުކާރުގެ ތެރޭގައި ނެތްކަމަށެވެ. އޭނާ ވަނީ ބަހަނާ ނުދައްކާ ސަރުކާރުގެ މަޝްރޫޢުތައް ނިންމުމަށް ގޮވާލައްވާފައެވެ.
ފަސް އަހަރު ނިމިދަނީ ކަންކަން ޑެލިވަރ ކުރުމުގެ މާހައުލެއް ސަރުކާރުތެރޭ ނެތުމުން! ބަހަނާ ނުދައްކާ މަޝްރޫޢު ނިންމާފަ ރައްޔިތުންނާއި ހަވާލުކުރައްވާ. ތިއީ ހިޔާ މަޝްރޫޢު، ވިނަރެސް އެއީ ރައީސް ޞާލިޙަށް އެމަނިކުފާނުގެ އަމިއްލަ ސަރުކާރުން ދީގެން އުޅޭ ކެއްސެއް! އެހެން ކިޔާ މަޝްރޫޢުއެއް ނޯންނާނެ
5 aharu nimidhanee kankan deliver kurumuge maahauleh sarukaaru therey nethumun! Bahanaa nudhakkavaa mashroou nimmaafa rayyithun naai havaalu kuravvaa. Thiee HIYAA mashroou, VINARES eiee RS ah emanikfaanuge amilla sarukaarun dheegen ulhey ke’sseh! Ehen kiyaa mashroou eh noannaane pic.twitter.com/wDZsD6A01S
— Mohamed Saeed (@em_saeed) September 15, 2021
ސަޢީދު މިހެން ވިދާޅުވެފައިވާއިރު، ވިނަރެސް މަޝްރޫޢުއަކީ ކުރީ ސަރުކާރުން ފަށާފައިވާ ހައުސިން މަޝްރޫޢުއެއްކަމަށާއި، މިސަރުކާރުން އެ މަޝްރޫޢުގެ ނަން ވިނަރެސްގެ ނަމަށް ބަދަލުކުރީކަމަށް އިދިކޮޅު ފަރާތްތަކުން ބުނެއެވެ. އަދި ނަން ބަދަލުކުރުމަކުން އެއީ މިސަރުކާރުގެ މަޝްރޫޢުއަކަށް ނުވާނެކަމަށްވެސް އިދިކޮޅު ބައެއް ފަރާތްތަކުން ބުނެއެވެ.
"ވިނަރެސް" ޕްރޮޖެކްޓްގައި ހިމެނެނީ 1344 ހައުސިންގ ޔުނިޓްއެވެ. އެއީ މުޅިންވެސް 3 ކޮޓަރީގެ އެޕަރޓްމަންޓްތަކެވެ. މި ޕްރޮޖެކްޓްގައި 4 ބާވަތެއްގެ ޔުނިޓްތައް ހިމެނެއެވެ. އެއީ މެރީނާ ވިއު، އައުޓަރ ވިއު، އިނަރ ވިއު އަދި ސްޓޭންޑަރޑް ވިއު ފްލެޓްތަކެވެ.
އެޗްޑީސީގެ މެނޭޖިންގ ޑައިރެކްޓަރ ސުހައިލް އަޙުމަދު ވިދާޅުވެފައިވަނީ، ހިޔާ މަޝްރޫޢުގެ ފްލެޓް ދޫކޮށްލަން އެދޭ ފަންނީ މުވައްޒަފުންނަށް، މި ޕްރޮޖެކްޓްގެ ތެރެއިން ޔުނިޓް ހޯދުމުގެ ފުރުޞަތު އޮންނާނެކަމަށެވެ. އަދި މިކަމާއި ގުޅޭ މަޝްވަރާތައް ހައުސިންގ މިނިސްޓްރީއާއެކު ކުރިއަށްދާކަމަށް ސުހައިލް ވިދާޅުވިއެވެ.
މިޕްރޮޖެކްޓްގެ އަގުތައްވެސް އެޗްޑީސީން ވަނީ އިޢުލާނުކޮށްފައެވެ. މީގެތެރޭގައި ފައިސާ ދެއްކޭނެ އެކި ސްކީމްތައް ހިމެނެއެވެ. މެރީނާ ވިއުގައި ހިމެނެނީ 172 އެޕަރޓްމަންޓެވެ. މި ޔުނިޓްތަކުގެ އަގު އުޅެނީ 2732000 ރުފިޔާއާ 2600000 މިލިއަން ރުފިޔާއާ ދެމެދުގައެވެ. އައުޓަރ ވިއުގައި ހިމެނެނީ 372 އެޕަރޓްމަންޓްއެވެ. މި އެޕަރޓްމަންޓްތަކުގެ އަގަކީ 2705000 ރުފިޔާއާ 2600000 މިލިއަން ރުފިޔާއާ ދެމެދުއެވެ. އިނަރ ވިއުގައި ހިމެނެނީ 352 އެޕަރޓްމަންޓެވެ. މި ޔުނިޓްތަކުގެ އަގަކީ 2679000 ރުފިޔާއާ 2600000 ރުފިޔާއާ ދެމެދުގެ އަގުތަކެވެ. އަދި ސްޓޭންޑަރޑް ވިއުގައި ހިމެނެނީ 448 ޔުނިޓެވެ. މި ޔުނިޓްތަކުގެ އަގު އުޅެނީ 2508000 ރުފިޔާއާ 2546000 ރުފިޔާއާ ދެމެދުގައެވެ.
މެރީނާ ވިއު، އައުޓަރ ވިއު، އިނަރ ވިއުގެ އެޕަރޓްމަންޓްތަކަކީ 902 އަކަފޫޓުގެ ޔުނިޓްތަކެވެ. ސްޓޭންޑަރޑް ވިއު އެޕަރޓްމަންޓްތަކަކީ 883 އަކަފޫޓުގެ ޔުނިޓްތަކެވެ.
