އިނގިރޭސި ޕްރިމިއާ ލީގުގައި ރޭ ލޫކާކޫ ޖެހި 2 ލަނޑާއެކު ޗެލްސީން އެސްޓަން ވިލާގެ މައްޗަށް ފަސޭހަ މޮޅެއް ހޯދައިފިއެވެ.
ޗެލްސީގެ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 0-3 ގެ ނަތީޖާއަކުންނެވެ.
މެޗުގައި ޗެލްސީން ލަނޑު ޖަހާ ލީޑު ނެގީ 15 ވަނަ މިނެޓުގައެވެ. މި ލަނޑު ޗެލްސީއަށް ކާމިޔާބުކޮށްދިނީ ރޮމޭލޫ ލުކާކޫއެވެ. ގިނަވަގުތު ބޯޅަ ހިފަހައްޓާ ޗެލްސީން މެޗުގައި މޮޅު ކުޅުމެއް ދެއްކިއިރު އެޓީމުން ލީޑު ފުޅާކުރީ ދެވަނަ ހާފުގެ 4 ވަނަ މިނެޓުގެ ތެރޭގައެވެ. މި ލަނޑު ޗެލްސީއަށް ކާމިޔާބުކޮށްދިނީ، މަޓިއޯ ކޮވިސިޗްއެވެ. މެޗުގައި ޗެލްސީން ޖެހި 3 ވަނަ ލަނޑު ލޫކާކޫ ކާމިޔާބުކޮށްދިނީ މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައެވެ.
މި މެޗުގައި ލުކާކޫ ޖެހި ދެ ލަނޑާއެކު، މިއީ އަލުން އަނބުރާ ޗެލްސީއަށް ބަދަލުވެ ލުކާކޫ ކާމިޔާބުކޮށްދިން ތިންވަނަ ލަނޑެވެ.
ޕްރިމިއާ ލީގުގައި ރޭ ކުޅުނު އެހެން މެޗުތަކަށް ބަލާލާއިރު، އެންމެ ފަހުގެ ޗެމްޕިއަން މެންޗެސްޓަރ ސިޓީ ވަނީ ލެސްޓަ ސިޓީ އަތުން 0-1 ގެ ނަތީޖާއަކުން މޮޅުވެފައެވެ. އަދި ޓޮޓެންހަމް ވަނީ ކްރިސްޓަލް ޕެލަސް އަތުން 0-3 ގެ ނަތީޖާއަކުން ބަލިވެފައެވެ. މީގެ އިތުުރުން އާސެނަލް ވަނީ 0-1 އިން ނޮވިޗް ސިޓީ ބަލިކޮށްފައެވެ.
