މެންޗެސްޓަރ ޔުނައިޓެޑަށް ބަދަލުވެ ކުޅުނު ފުރަތަމަ މެޗުގައި ރޮނާލްޑޯ ދެ ލަނޑު ޖަހާ ޔުނައިޓެޑް މޮޅުކޮށްދީފިއެވެ.
ޔުނައިޓެޑްގެ ދަނޑު އޯލްޑް ޓްރެފޯޑްގައި ސަޕޯޓަރުންގެ ކުރިމަތީގައި ނިއުކާސަލް ޔުނައިޓެޑާއި ދެކޮޅަށް ކުޅުނު މި މެޗު ޔުނައިޓެޑުން ކާމިޔާބުކުރީ 1-4 ގެ ނަތީޖާއަކުންނެވެ.
ގިނަ ބަޔަކު ހީކުރިގޮތާއި ހިލާފަށް މެޗުގެ ފުރަތަމަ އެގާރައިގައި ހިމެނިގެން ރޮނާލްޑޯ ވަނީ މެޗުގައި އެއްކޮށް ކުޅެފައެވެ. މެޗުގެ ފުރަތަމަ ހާފުގައި ގިނަ ވަގުތު ބޯޅަ ކޮންޓްރޯލްކޮށްގެން ކުޅުނީވެސް ޔުނައިޓެޑުންނެވެ. އަދި ލަނޑު ޖަހާނެ ގިނަ ފުރުޞަތުތައްވެސް ތަނަވަސްކުރީ ޔުނައިޓެޑުންނެވެ. ޔުނައިޓެޑުން މި މެޗުގައި ލަނޑު ޖަހާ ލީޑު ނެގީ ފުރަތަމަ ހާފްގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެެރޭގައި ކްރިސްޓިއާނޯ ރޮނާލްޑޯ ކާމިޔާބުކޮށްދިން ލަނޑުންނެވެ. ރޮނާލްޑޯ މި ލަނޑު ޖެހީ ގްރީންވުޑް ގޯލާއި އަމާޒުކޮށް ފޮނުވާލި ބޯޅަ ކީޕަރ އަތުގައި ޖެހިފައި ގޯލު ކުރިމައްޗަށް ހުރަސްވުމުން އެއްފަހަރުން ޖަހާ ގޯލުގެ ތެރެއަށް ފޮނުވާލައިގެންނެވެ.
މެޗުގެ ދެވަނަ ހާފް ފަށައިގެން 56 ވަނަ މިނެޓުގައި ނިއުކާސަލް ޔުނައިޓެޑުން ވަނީ ލަނޑެއް ޖަހާ ނަތީޖާ ހަމަހަމަކޮށްފައެވެ. މި ލަނޑު ނިއުކާސަލަށް ކާމިޔާބުކޮށްދިނީ، ހަވިއޭ މަންކީލޯއެވެ. ނަމަވެސް ނިއުކާސަލުން ނަތީޖާ ހަމަހަމަކުރިތާ 6 މިނެޓު ފަހުން އަނެއްކާވެސް ރޮނާލްޑޯ ވަނީ އިތުރު ލަނޑެއް ދެވަނަ ފަހަރަށް ޔުނައިޓެޑަށް ލީޑު ނަގައިދީފައެވެ. މެޗުގައި ޔުނައިޓެޑުން ޖެހި ތިންވަނަ ލަނޑު އެޓީމަށް ކާމިޔާބުކޮށްދިނީ ބްރޫނޯ ފެނާންޑޭޒްއެވެ. މި ލަނޑު އޭނާ ޖެހީ ޕެނަލްޓީ އޭރިޔާ ބޭރުގައި ހުރެ ގޯލުގެ މަތީ ކަނަށް ބޯޅަ ފޮނުވާލައިގެންނެވެ. ޔުނައިޓެޑުގެ ހަތަރު ވަނަ ލަނޑު ދެވަނަ ހާފުގެ ފުރިހަމަ ވަގުތު ހަމަވެގެން ދެއްކި އިތުުރު ވަގުތުގެ ތެރޭގައި އެޓީމަށް ކާމިޔާބުކޮށްދިނީ، ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އެރި ލިންގާޑްއެވެ.
މިނަތީޖާއާއެކު ޕްރިމިއާ ލީގުގެ އެއްވަނައިގައި މިވަގުތު އޮތީ ޔުނައިޓެޑްއެވެ. އެއީ މިހާތަނަށް ކުޅުނު 4 މެޗުން ހޯދި 10 ޕޮއިންޓާއެކުއެވެ. އަދި ޔުނައިޓެޑާ އެއްވަރަކަށް ޕޮއިންޓް ހޯދައިގެން ދެވަނައިގައި އޮތީ ޗެލްސީއެވެ. ސިޓީ 3 ވަނައިގައި އޮތީ ހަތަރު މެޗުން ހޯދި 9 ޕޮއިންޓާއެކުއެވެ. އަދި ހަތަރު ވަނައިގައި އޮތީ ބްރައިޓެންއެވެ.
