އަވަށްޓެރި އިންޑިއާއަކީ ދިވެހިންގެ އެކުވެރި ޤައުމެއް ކަމަށާއި، އެޤައުމަކީ ރާއްޖެ އަޅުވެތިކޮށް، އަޅުވެތި ޤައުމަކަށް ވެގެން ނުވާނެކަމަށް އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

އިދިކޮޅު ކޯލިޝަނުން ބޭއްވި "އައްޑަނަ" ޖަލްސާގައި އަބްދުއްރަހީމް ވަނީ ދިވެހިންގެ ރީތި އަދާތަކާއި، ދިވެހިންގެ އުސޫލުތަކާއި، ސަގާފަތަށް އަލިއަޅުވާލައި ވާހަކަ ދައްކަވާފައެވެ. އަބްދުއްރަހީމް ވިދާޅުވީ ދިވެހިންނަކީ ޒަމާނުއްސުރެއް ދިވެހިންގެ ކަންކަން ނިންމުމުގައި ދިވެހިން ބޭނުންވާ ގޮތަށް ކަންކަން ނިންމަމުން ދިޔަ ބައެއްކަމަށެވެ.

ނަމަވެސް މިކަން ބަދަލުވެގެން ގޮސްފައިވަނީ 2018 ވަނަ އަހަރުގެ ރިޔާސީ އިންތިޚާބުގެ ތެރެއަށް ދިވެހިންގެ ގާތް އެކުވެރި ޤައުމެއްކަމަށްވާ އިންޑިއާގެ ނުފޫޒު އިންތިހާއަށް ވައްދައި އިންތިޚާބު އޮޅުވާލި ހިސާބުންކަމަށެވެ. މިއަދު ރާއްޖޭގައި ފެންނަމުންދަނީ ދިވެހިން ދުވަހަކުވެސް އިންޑިއާގެ ފަރާތުން އެދުނު މަންޒަރެއް ނޫންކަމަށް އަބްދުއްރަހީމް ވިދާޅުވިއެވެ. ރާއްޖޭގެ އެކި ކަންކޮޅުތަކުގައި އިންޑިއާގެ ސިފައިން ވަޒަންވެރިވެގެން އުޅުމާއި، އިންޑިއާގެ އަސްކަރީ ސިފައިން ހަތިޔާރާއިއެކު ރަށްރަށުގައި އުޅުމަކީ ދިވެހި ރައްޔިތުން ނުހަނު ކަންބޮޑުވާ ކަމެއްކަމަށް އަބްދުއްރަހީމް ވިދާޅުވިއެވެ.

އިންޑިޔާއިން ދިވެހިން އަޅުވެތި ކުރަން ނޫޅުއްވާ. އިންޑިއާއި މިގޮވާލަނީ އަސްކަރީ ސިފައިން ގެންދަވުމަށް. މިހާރުން މިހާރުން އިންޑިޔާގެ ސިފައިން ބާލައި، ގޮންނޭގޭ އެގްރިމަންޓްތައް އުވާލަން ސަރުކާރަށް ގޮވާލަން.

– އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ދިވެހި ރައްޔިތުން އިންޑިއާގެ ހެލިކޮޕްޓަރާއި، އިންޑިއާގެ މަނަވަރުތަކާއި، އިންޑިއާގެ ސިފައިން މިފަސްގަނޑުގައި ތިބުމަށް ނޭދޭކަމަށެވެ. އަދި އިންޑިއާ ވެގެން ނޫންކަމަށާއި، އެއީ ކޮންމެ ޤައުމެއްގެ ސިފައިންނަށް ވީނަމަވެސް އެމީހުން ތިބުމަކަށް ދިވެހިން ނޭދޭކަމަށެވެ. ނަމަވެސް މިކަން ކުރަން ނޭގެނީ މިސަރުކާރަށް ކަމަށާއި، މިކަން ކުރަން އެގޭނީ ރައީސް ޔާމީން ވެރިކަމަށް ގެނެސްގެންކަމަށް އަބްދުއްރަހީމް ވިދާޅުވިއެވެ.

އަދި މިއަދު އިދިކޮޅު ކޯލިޝަނުން ކުރަމުންދާ މަސައްކަތަކީ ރައީސް ޔާމީން އަލުން ވެރިކަމަށް ގެނައުމަށް ކުރާ މަސައްކަތް ކަމަށާއި، މިކަން މާދުރުނޫން މުސްތަގުބަލެއްގައި ކާމިޔާބު ވެގެންދާނެކަމަށް އޭނާ ވިދާޅުވިއެވެ.