ސަރުކާރުން ވެރިކަމަށް އައުމަށް ވެފައިވާ އެންމެ ބޮޑު ވައުދު ކަމުގައިވާ އެމްއެމްޕީއާރުސީގެ ޚިޔާނާތުގެ މައްސަލަ ބެލުމަށް މިހާރު އޮތް އެންޓި ކޮރަޕްޝަން ކޮމިޝަނަށް ތިން އަހަރު ވެގެންދިޔަ އިރުވެސް ވީއެއްވެސް ކަމެއް ނެތްކަމަށް ވިދާޅުވެ ކޮމިޝަނަށް ބަދަލު ގެނައުމަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔަޢުޤޫބް އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދު ޖަލްސާގައި ވާހަކަ ދައްކަވަމުން ޔައުގޫބު ވިދާޅުވީ ސަރުކާރަށް ތިން އަހަރުވާން ކައިރިވާއިރު، މިހާތަނަށްވެސް ކޮމިޝަންތަކަށް ނަތީޖާ ނުނެރެވޭކަމީ ކަންބޮޑުވާ ކަމެއްކަމަށެވެ. އޭސީސީގެ މަސައްކަތްތައް ވަކިން ފާހަގަކޮށް ޔައުގޫބް ވިދާޅުވީ އެމްއެމްޕީއާރުސީގެ ވައްކަމުގެ މައްސަލަތައް އެއްވެސް ވަރަކަށް ކުރިއަށް ނުދާކަމީ އޮތް ވަރަށް ބޮޑު ކަންބޮޑުވުމެއްކަމަށެވެ.
އޭސީސީއަށް ގާބިލް ބޭފުޅުން އައްޔަންކޮށް 30 މިލިޔަން ރުފިޔާގެ ބަޖެޓެއް ދީފައިވާއިރު ވީހަމަ އެއްކަމެއްވެސް ނެތްކަމަށް އޭނާ ވިދާޅުވިއެވެ. އޭސީސީގައި ތަހުގީގް ކުރުމަށް 45 އިންވެސްޓިގޭޓަރުން ތިއްބަވާއިރު، އެކި ޓީމުތަކަށް ބަހާލައިގެން މަސައްކަތް ކުރާއިރުވެސް އަހަރަކު 15 މައްސަލަވެސް ތަހުގީގް ނިންމައި ދައުވާ އުފުލަން ނުފޮނުވޭކަމީ މަޤާމުގެ ގާބިލްކަމާއިމެދު ސުވާލު އުފެދޭ ކަމެއްކަމަށް ޔައުޤޫބު ވިދާޅުވިއެވެ.
15 ޓީމު އޭސީސީގައި ހިމެނޭއިރު އެންމެ ކުޑަމިނުން، ކޮންމެ ޓީމަކަށް މަހަކަށް އެންމެ މައްސަލައެއް ނިމޭނަމަވެސް ކޮންމެ މަހަކު 15 މައްސަލަ ނިމޭނެ. އޭރުން އަހަރު ބޮޑު ބައެއްލިބޭނެ. އެއްވެސް ވަރަކަށް މަސައްކަތް ނުކުރާކަމަށް އަޅުގަނޑު ދަންނަވާނީ. މިހާރު ވަގުތު ދެވިއްޖެ، ފުރުސަތު ދެވިއްޖެ، ދެން މިިވަރަކަށް ފުރުސަތު ދެވޭނީ ތިން އަހަރު ނިމުނުއިރު އެމްއެމްޕީއާރުސީއައި ގުޅޭ 3 މައްސަލަވެސް ނުދޭ.
– ޔައުޤޫބް ވިދާޅުވިއެވެ.
ޔައުޤޫބުވަނީ އެސެޓް ރިކަވަރީ ކޮމިޝަނަށްވެސް ފާޑު ވިދާޅުވެފައެވެ. އެކޮމިޝަނަކީވެސް ބޮޑެތި ބާރުތަކެއްދީ އުފެދިފައިވާ ކޮމިޝަނަކަށްވާއިރު މައްސަލަތައް ރައްޔިތުން އުންމީދު ކުރި ވަރައި ގާތައްވެސް ނުދާކަމީ ފެންނަމުންދާ ހަގީގްތަކަމަށެވެ.
ކޮމިޝަންތަކުގައި ތިއްބެވި މެމްބަރުންނަކީ ހަމައެކަނި މުސާރަ ދޭން ބައިތިއްބަވާފައިވާ ބޭފުޅުންކަމަށްވާނަމަ މިހާރުން މިހާރަށްވެސް ކޮމިޝަން ބަދަލު ކުރަންޖެހޭކަމަށް ޔައުގޫބް ވިދާޅުވިއެވެ.
