ނިމިދިޔަ ވެރިކަމުގައި ފެނަކަ ކޯޕަރޭޝަނުން ފިއުލްސަޕްލައި މޯލްޑިވްސްއަށް ދައްކަންޖެހޭ 730 މިލިޔަން ރުފިޔާ ނުދައްކައި އޮތްކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަ ދައްކަވަމުން ތެޔޮ ގަތުމަށްފަހު ފިއުލްސަޕްލައިއަށް ދައްކަންޖެހޭ ފައިސާ ނުދައްކާ ކަމަށްބުނެ ދައްކަމުންދާ ވާހަތަކާއި ގުޅިގެން ސައީދު ވިދާޅުވީ، ފެނަކައިން ތެޔޮ ގަންނަނީ ބަރާބަރަށް ފައިސާ ދެއްކުމަށްފަހުގައިކަމަށެވެ. ނަމަވެސް ކޯވިޑް-19 އާއި ގުޅިގެން ކުޑަ ޑިލޭއެއް އުޅުނު ނަމަވެސް ކުންފުޏާއި ހަވާލުވިފަހުން މިހާތަނަށް ބަރާބަރަށް ފައިސާ ދައްކަމުން ގޮސްފައިވާކަމަށެވެ. އެގޮތުން މިހާތަނަށް 1.8 ބިލިޔަނަށްވުރެ ގިނަ ރުފިޔާ ދައްކާފައިވާކަމަށެވެ.

ފެނަކަ ކޯޕަރޭޝަނަށް ބޭނުންވާ ތެޔޮ 2017 ވަނަ އަހަރުގެ އޭޕްރީލް މަހުން ފެށިގެން ފޯރުކޮށް ދެމުންދަނީ އެސްޓޯއޯއީން ކަމަށެވެ. އެސްޓޯއޯން ތެޔޮ ގަތުމަށް ފެނަކައިން ނިންމި އެންމެ ބޮޑު މަގްސަދަކީވެސް މިޚިދުމަތަކީ ރައްޔިތުންނަށް ފޯރުކޮށްދޭންޖެހޭ އެންމެ އަސާސީ ޚިދުމަތަކަށްވާއިރު، ޚިދުމަތް މެދުނުކެނޑި ފޯރުކޮށް ދިނުމުގެ ބޭނުމުގައެވެ.

ނަމަވެސް ފެނަކައާއި މިހާރު އޮތް މެނޭޖްމަންޓް ހަވާލުވުމުގެ ކުރިން، އެފްއެސްއެމްއަށް ދައްކަންޖެހޭ ފައިސާ ދައްކަމުން ގޮސްފައިނުވާކަން އެމްޑީވަނީ ފާހަގަކޮށްފައެވެ. އެގޮތުން 730 މިލިޔަނަށްވުރެ ގިނަ ރުފިޔާ ނުދައްކައި ހުރިކަން ސައީދު ވަނީ ފަހަގަކޮށްފައެވެ. މިފައިސާވެސް ދައްކާފައިވަނީ މިހާރު އޮތް މެނޭޖްމަންޓުން ކަމަށާއި، އެހާބޮޑު އަދަދަކުން ފައިސާ ނުދެއްކި އޮތުމުން އެކަމާއިގިނަ ސުވާލުތަކެއް އުފެދޭކަމަށް ސައީދު ވިދާޅުވިއެވެ.

ފާއިތުވެދިޔަ ތަނުގައި ފެނަކަ ހިންގުމުގައި ހުރި ދޯދިޔާ ކަންތައްތަކަށް އިޝާރާތް ކުރައްވައި ސައީދު ވިދާޅުވީ ކޯވިޑްގެ މިދަތި ދުވަސްތަކުގައިވެސް ފެނަކަ ހިންގަމުން ދިޔައީ އެއްވެސް ލޯނެއް ނުނަގައިކަމަށެވެ. ނަމަވެސް ކުރިން ފިނޭންސް މިނިސްޓްރީއާއި، އެމްއައިބީން ބޮޑެތި ލޯނުތަކެއްވެސް ނަގާފައިވާކަމަށެވެ. ފެނަކައިން ބޮޑެތި އަދަދުތަކުން ލޯނުތައް ނެގުމަށްފަހު އެއްވެސް ބޮޑު އިންވެސްޓް މަންޓެއް ނުކުރެވިވާއިރު، 730 މިލިޔަން ރުފިޔާ ނުދެއްކި އޮތީ ކޮން ސަބަބާއި ހެދިކަމެއް އެއްގޮތަކަށްވެސް ނޭގޭކަމަށް ސައީދު ވިދާޅުވިއެވެ.