މި ސަރުކާރުގެ ސިޔާސަތުތަކާއި، ކަނޑުގައި އޮޔާދާ ހުސްއޮނަކާއި އެއްވެސް ތަފާތެއް ނެތްކަމުގައި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

ކޯވިޑް-19ގެ ހާލަތުގައި ސަރުކާރުގެ ސިޔާސަތުތައް ބައްޓަން ކުރަމުންދާ ގޮތަށް ވަރަށްބޮޑަށް ފާޑުވިދާޅުވެ، ސައީދު ވިދާޅުވީ އިޤްތިޞާދު މިހާބޮޑަށް ގޯސްވެގެންދާއިރުވެސް ސަރުކާރުގެ ސިޔާސަތުތައް ބައްޓަން ކުރަމުންދަނީ އެޔާއި ދިމާ އިދިކޮޅަށް ކަމުގައެވެ. ވެރިންގެ މުސާރަބޮޑުކޮށް، ވެރިންނަށް މޮޅު ގޮތްގޮތަށް ކަންކަން ކުރުމަކީ މިހާލަތުގައިވެސް ސަރުކާރުން އަމާޒު ހިފާފައިވާ ކަންތައްތައް ކަމުގައި ސައީދު ވިދާޅުވިއެވެ.

ކަނޑުގައި އޮޔާދާ ހުސްއޮނަކާއި ރައީސް ސޯލިޙު ސަރުކާރުގެ ސިޔާސަތާއި އެއްވެސް ތަފާތެއްނެތް! އިކޮނޮމީ ވަނީގޯސް، ވެރިންގެ މުސާރަވަނީބޮޑު، މުއައްޒިފުންގެ މުސާރަވީ%50 ދަށް، އަދިމުސާރަކުޑަކުރި ގިނަ ކުންފުނިތަކަށްދިނީ ޓެކްސްގެލުއި؟

– ސައީދު ވިދާޅުވިއެވެ.

ސައީދު މިހެން ވިދާޅުވީ ފިނޭންސް މިނިސްޓްރީން ކުންފުނިތައް ގިންތިކޮށް ޕާފޯމަންސް ބަލަން ގެނައި ބަދަލާއެކު، ސަރުކާރު ހިއްސާވާ ކުންފުނިތަކުގެ މެނޭޖިން ޑިރެކްޓަރު (އެމްޑީ) އާއި ޑެޕިއުޓީ މެނޭޖިން ޑިރެކްޓަރު (ޑީއެމްޑީ) އިން ގެ މުސާރަ ބޮޑު ކުރުމާއި ހުޅުލެ އައިލެންޑް ހޮޓެލް (އެޗްއައިއެޗް) ގައި މަސައްކަތް ކުރަމުން އައި ގިނަ އަދަދެއްގެ ދިވެހި މުވައްޒަފުން ވަޒީފާއިން ވަކިކުރި ކުރުމަށް އިޝާރާތް ކުރައްވައެވެ.

ފިނޭންސް މިނިސްޓްރީން ކުންފުނިތައް ގިންތިކޮށް ޕާފޯމަންސް ބަލަން ގެނައި ބަދަލާއެކު، ސަރުކާރު ހިއްސާވާ ކުންފުނިތަކުގެ އިސްވެރިންގެ މުސާރަވެސް ވަނީ ބޮޑުތަނުން ބޮޑުކޮށްފައެވެ. ސަރުކާރުން މުރާޖާކޮށް ކުންފުނިތަކަށް ފޮނުވި ލިޔުމުގައި ވާގޮތުން، ކެޓަގައިޒްކޮށްފައިވާ ސަރުކާރު ކުންފުނިތަކުގެ އެންމެ ދަށް ކެޓަގަރީގެ ކުންފުންޏެއްގެ އެމްޑީގެ މިހާރުގެ މުސާރަ އަށް އެވްރެޖުކޮށް 10،000ރ. އާއި 15،000 ގެ އިތުރުވުމެއް އަންނާނެއެވެ.

ފިނޭންސް މިނިސްޓްރީން ބުނެފައިވާ ގޮތުގައި ކުންފުނިތައް ތަފާތު ކެޓަގަރީތަކަކަށް ކޮންމެ ކެޓަގަރީއެއްގައި ހިމެނޭ ކުންފުނި ގިންތިކުރުމުގައި ކުންފުނީގެ “ޓޯޓަލް އެސެޓާއި” “ޕާފޯމަންސް” އަދި މުވައްޒަފުންގެ އަދަދަށް ބަލައި އެމްޑީންގެ މުސާރަ ކަނޑައެޅޭނެ އުސޫލެއް އޮތުމަކީ މެނޭޖިން ޑިރެކްޓަރުން ކުރާ މަސައްކަތާއި އުފުލާ ޒިންމާ އާއި ކުންފުންޏަށް ހޯދައިދޭ ކާމިޔާބީ އަށް ބިނާ ކޮށް މުސާރައާއި އިނާޔަތް ދިނުމަށް މަގު ފަހިވާނެ ކަމެއް ކަމަށެވެ.