ބަރަކާތްތެރިކަން އެންމެ ބޮޑު ޒަމާނަކީ، ޙައްޖު މަހުގެ ފުރަތަމަ ދިހަ ދުވަސްކަމަށާއި، އެ ދިހަ ދުވަހު ކުރާ އަޅުކަންތައް އިތުރުކޮށް ހެޔޮ އަމަލުކުރުން އިތުރުކުރުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.

ޙައްޖު މަހުގެ ފުރަތަމަ 10 ދުވަހުގެ މަތްކަން ބަޔާންކުރައްވާ ރާއްޖޭގެ މީހުން ދިރިއުޅޭ ރަށްރަށުގައި މިއަދު ދެއްވި ހުކުރު ޚުޠުބާގައި ވަނީ، ﷲގެ ޙަޟްރަތުގައި އެންމެ ލޮބުވެތިވެގެންވާ މައްސަރުތަކަކީ، ޙުރުމަތްތެރިވެގެންވާ ހަތަރު މައްސަރުކަމަށް ވިދާޅުވެފައެވެ. އެ މައްސަރުތަކުގެ ތެރެއިން
އެންމެ ލޮބުވެތިކަން ބޮޑު މައްސަރަކީ، ޙައްޖު މަސްކަމަށާއި، ޙައްޖު މަހުގެ އެންމެ މާތް ދުވަސްތަކަކީ، އެ މަހުގެ ފުރަތަމަ ދިހަ ދުވަސްކަމަށްވެސް ބަޔާންކުރެއްވިއެވެ.

ދުނިޔެއަށް މިވަގުތު ކުރިމަތިވެފައި މިވާ ބަލިމަޑުކަމުގެ ސަބަބުން، މިއަހަރު ޙައްޖުގެ އަޅުކަން އަދާކުރުމަށް ނިޔަތްގަނެފައިވާ އެތައް ބަޔަކަށް، ޙައްޖަށް ދެވޭގޮތް ނުވި ކަމުގައި ވިޔަސް، މާތް ﷲ ގެ ރަޙްމަތުން އުންމީދު ކަޑާނުލުމަށްވެސް ޚުޠުބާގައި ވަނީ ނަސޭހަތްތެރިވެވަޑައިގެންފައެވެ.

އެކަލާނގެ ރަޙްމަތް އަޅުގަނޑުމެންގެ މައްޗަށް ތަނަވަސްވެގެން ވެއެވެ. އަމިއްލަ ޤައުމުގައި، އަމިއްލަ ވަޒަނުގައި، ތިބިކަމުގައި ވިޔަސް، ޙައްޖު މަހުގެ ފުރަތަމަ ދިހަ ދުވަހުގެ ދަރުމަޔާއި ޘަވާބު ލިބިގަތުމަށް މަސައްކަތް ކުރުމުގެ މަގު ވަނީ އަޅުގަނޑުމެންނަށް ތަނަވަސްވެފަ އެވެ. ރޯދަ ހިފުމާ އެކު ދުޢާ ކޮށް، އަޅުގަނޑުމެންގެ ޤައުމާއި މުޅި އިންސާނިއްޔަތު މި ބަލިމަޑުކަމުން ސަލާމަތް ކޮށްދެއްވުން އެދި، މާތް ﷲގެ ޙަޟްރަތުގައި ދަންނަވާށެވެ!

– ހުކުރު ޚުޠުބާ

ބަރަކާތްތެރިކަން އެންމެ ބޮޑު ޒަމާނަކީ، ޙައްޖު މަހުގެ ފުރަތަމަ ދިހަ ދުވަސްކަމަށާއި، އެ 10 ދުވަހުގެ މާތްކަމުގެ ތެރޭގައި، މާތް މި މަތިވެރި އިސްލާމް ދީން ފުރިހަމަކޮށްދެއްވުން ހިމެނޭކަން ބަޔާންކުރައްވާ ޚުޠުބާގައި ވިދާޅުވީ، މި ދީން ފުރިހަމަ ވުމުގެ ސަބަބުން، މި ދީނުގެ އަހުލުވެރިން ކުރާ ޢަމަލުތަކަށް ފުރިހަމައަށް ސަވާބު ލިބޭކަމަށެވެ. އެމީހުންގެ ޙަޔާތް، އަމާންކަމާއި، ރައްކައުތެރިކަން ލިބިފައިވާ ހެޔޮ ލަފާ ޙަޔާތަކަށްވާކަމަށާއި، އެމީހުންގެ ސުލޫކާއި، އަޚްލާޤު ރިވެތި ވާކަމަށް ވިދާޅުވިއެވެ. އަދި އިސްލާމް ދީން ފުރިހަމަވުމުގެ ސަބަބުން، މުސްލިމުންނަށް އެންމެ ސީދާ މަގު އެނގި، އެ މަގަށް ތަބާވެގެން ތިބުމުގެ ނަޞީބު ލިބޭކަމަށާއި، އިސްލާމް ދީނުގެ މަތިވެރި ރިސާލަތު ފޯރުކޮށްދެއްވުމަށް ފަހު، ލޮބުވެތި ރަސޫލާ މިދުނިޔެ ދޫކުރެއްވީ އެންމެހައި މުސްލިމުންނަށް އެނގޭނެ ފަދަ ސާފު، އަމާން މަގެއް މައްޗަށް، އެބައިމީހުން ނެރުއްވާފައިކަމަށްވެސް ވިދާޅުވިއެވެ.

ޔަހޫދީންގެ ޢިލްމުވެރިއަކު، މާތްﷲ ރުއްސުން ލެއްވި ޢުމަރުގެފާނަށް ދެންނެވިއެވެ. "ތިޔަ ބޭކަލުންގެ މައްޗަށް ބާވައިލައްވާފައިވާ ފަދަ އާޔަތެއް، އަޅުގަނޑުމެންގެ ފޮތުގައި އޮތް ނަމަ، އަޅުގަނޑުމެން އާޔަތް ބާވައިލެއްވި ދުވަހަކީ ޢީދެއް ކަމުގައި ހެދީމުހެވެ."

– ހުކުރު ޚުޠުބާ

ޙައްޖުމަހުގެ ދިހަ ދުވަހުގެ މާތްކަމާއި، މަތިވެރިކަން ގިނަގުނަކަމށާއި، މުސްލިމުންނަށް މާތް ﷲ ދެއްވާފައިވާ މި ފުރުޞަތުތަކުގެ ބޭނުން، ރަނގަޅަށް ހިފާ ބަޔަކު ކަމުގައި ވުމަށް ޚުޠުބާގައި ނަސޭހަތްތެރިވެވަޑައިގަތެވެ. ހެޔޮކަން ބޮޑު މި ފަދަ ދުވަސްތަކުގައި ޞާލިޙު ޢަމަލުތައް ގިނަކޮށް، ﷲ ގެ ރުހިވޮޑިގަތުން ލިބޭތޯ ވާދަ ކުރުމަށްވެސް އިރުޝާދުދެއްވިއެވެ.

މި ދިހަ ދުވަހު ކުރުން ހެޔޮވެގެންވާ ޢަމަލުތަކުގެ ތެރޭގައި، ރޯދަހިފުމާއި،ޤުރްއާން ކިޔެވުމާއި، ގިނަގިނައިން މާތް ﷲ ހަނދުމަކުރުން ހިމެނެއެވެ. ﷲގެ ޙަޟްރަތުގައި އެންމެ ލޮބުވެތިކަން ބޮޑީ، މާތް ﷲ ހަނދުމަކުރުމެވެ. އެއީ ދުނިޔެ އާއި އާޚިރަތުގައި އެކަމުގެ ސަބަބުން ސަލާމަތްކަން ލިބޭނެ ކަމެކެވެ. މާތް ﷲ ހަނދުމަކުރާ މީހާ ކުފުރުގެ ނުބައި އަނދަވަޅަށް ވެއްޓުމުންނާއި، ޝައިޠާނާގެ މަޅީގައި ޖެހުމުންނާއި، ނަރަކައިން ރައްކައުތެރި ކޮށްދެއްވާނެތެވެ. މާތް ﷲ ހަނދުމަކުރާ މީހާގެ މައްޗަށް، އެކަލާނގެ ރަޙްމަތާއި، މަލާއިކަތުންގެ ހެޔޮ ދުޢާ ލިބޭނެތެވެ.