އެމްޑީޕީގެ ރައީސް މުހައްމަދު ނަޝީދު ވެރިކަމަށް އައުމަށް ދެކެމުންދާ ހުވަފެން ދޫކޮށްލެއްވުމަށް ދީނީ އިލްމުވެރިޔާ ޑރ.މުހައްމަދު އިޔާޒު ގޮވާލައްވައިފިއެވެ.
އެމްޑީޕީގެ ރައީސް މުހައްމަދު ނަޝީދުގެ އެލެކްސް އެކައުންޓުން ބައެއް ދީނީ އިލްމުވެރިންނަށް ނިސްބަތް ކުރައްވައި ކުރެއްވި ޓުވީޓަކަށް ރައްދު ދެއްވަމުން އިޔާޒު ވިދާޅުވީ ވެރިކަމަށް އައުމަށް ނަޝީދު ކުރައްވަމުންދާ ހުވަފެން ދެން ދުވަހަކުވެސް ހަގީގަތަކަށް ނުވާނެކަމަށެވެ. ދީނީ އެކި ކަންކަމުގައި ނަޝީދު ފާޅު ކުރައްވަމުންދާ ޚިޔާލުތަކާއި ގުޅިގެން އަބަދުވެސް ނަޝީދަށް ރައްދު ދެއްވައި ދީނީ ކަންކަން އޮންނަ ގޮތް ސާފުކޮށްދެއްވާ އިޔާޒު ވަނީ މިދިޔަ ހަފްތާގައި އެމަނިކުފާނުގެ އަދާކުރައްވަމުންދިޔަ ވަޒީފާއިންވެސް ވަކިކޮށްފައެވެ.
މަނިކުފާނު ރާއްޖޭގެ ވެރިކަމަށް ވަޑައިގެންނެވުމަށް ގެންގުޅުއްވާ ހުވަފެން ދޫކޮށްލައްވާ. އިންޝާﷲ ދެނެއް ދުވަހަކުވެސް އެކަމެއްނުވާނެ.
– ޑރ.އިޔާޒު ވިދާޅުވިއެވެ.
Manikfaanu Raajje ge verikamah vadaigathumah gengulhuvvaa huvafen dhookohlavvaa. In Sha Allah dheneh dhuvahaku ves ekameh nuvaane.
— Dr.Mohamed Iyaz (@dr_iyaz) July 2, 2021
ނަޝީދު ކުރެއްވި ޓްވީޓުގައި ބުނެފައިވަނީ އިންޑިއާ އައުޓް އާއި އަންހެނުން ޚިތާނު ކުރުމަށް ސަޕޯޓް ކުރުމާއި އަދި ނަފްރަތު ބިލާއި އިދިކޮޅު ހަދާ މީހުންނަކީ އެއްބައެއްކަން ސޯޝަލް މީޑިއާގައި ނެގި ޕޯލުން ސާފުވާކަމަށެވެ. އަދި އެފަދަ މީހުންގެ ތާއީދު ހޯދައިގެން ސިޔާސީ މަސައްކަތް ކުރެއްވުމަށް ގަސްތު ނުކުރައްވާކަމަށް ނަޝީދު ވަނީ ވިދާޅުވެފައެވެ.
ސޯޝަލް މީޑިއާގެ ސާވޭއަކުން ސާފުވާނެ، އިންޑިއާ އައުޓް އާއި އަންހެނުން ޚިތާނު ކުރުމަށް ސަޕޯޓް ކުރުމާއި އަދި ނަފްރަތު ބިލާއި އިދިކޮޅު ހަދާ މީހުންގެ 90 އިންސައްތަ އެއީ އެއްބައެއްކަން. އެފަދަ މީހުންގެ ތާއީދު ހޯދައިގެން އަޅުގަނޑު ކުރަން ބޭނުންވާ ސިޔާސީ މަސައްކަތެއްނެތް.
– ނަޝީދު ވިދާޅުވިއެވެ.
ރައީސް ނަޝީދަކީ އަބަދުވެސް ދީނީ އިލްމުވެރިންނާއި ޚިޔާލު ތަފާތުވެ، އެބޭފުޅުންނަށް ރައްދު ދެއްވައި ހައްދަވާ ސިޔާސީ ލީޑަރަކެވެ. ނަމަވެސް ރައީސް ނަޝީދު ވިދާޅުވަމުންދަނީ ޝައިޚު އިޔާޒު އާއި ސަލަފްގެ އިލްމުވެރިންނާއި، އަދާލަތު ޕާޓީގެ ބައެއް އިލްމުވެރިންނަކީ މުޖުތަމައުގެ އަމަންކަން ގެއްލުވާލަން މަސައްކަތް ކުރައްވާ އިލްމުވެރިންތަކެއް ކަމަށެވެ. ނަޝީދު ނިސްބަތްވާ އެމްޑީޕީގެ ވެރިކަމުގެ ކޯލިޝަންގައިވެސް އެންމެ މުހިންމު ދައުރެއް އަދާކުރާ އެއް ޕާޓީއަކީ އަދާލަތު ޕާޓީއެވެ.
ކޮމެންޓު ފޮނުވާ