ޒުވާނުންގެ ދުވަހު ޒުވާނުންނަށް މިޤައުމުގައި ފުރުސަތެއް ނެތްކަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ހާމަކޮށްދެއްވާފައިވާ ކަމުގައި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޒުވާނުންގެ ދުވަހު ހެލްތު މިނިސްޓަރަކަށް އުމުރުފުޅުން ދޮށި ރައީސް އޮފީހުގެ މިނިސްޓަރ އަޙްމަދު ނަސީމް އައްޔަންކުރައްވުމާއި ގުޅިގެން އެކަމަށް ފާޑުވިދާޅުވެ ޝިޔާމް ވިދާޅުވީ ޒުވާނުންނަކީ ޤައުމުގެ ކުރިމަގުކަމަށް ވިދާޅުވެ ފޮނި ހުވަފެންތައް ދެއްކުމަށްފަހު މިއަދު މިފެނިގެންދަނީ ޒުވާނުންނަށް ސަރުކާރުން ނޫނެކޭ ބުނާ މަންޒަރުކަމަށެވެ.
ޒުވާނުންގެ ދުވަހު ދިވެހި ޒުވާނުންގެ ތެރެއިން އެތައް ބަޔަކު ވަޒީފާނެތި މަގުމަތި ވެފައިވާއިރު ފެނިގެން މިދަނީ ޒުވާނުންނަށް އޮތް ފުރުސަތު ބަންދު ކުރައްވަމުންދާ މަންޒަރުކަމަށެވެ. ތައުލީމީ ގޮތުން ޤާބިލް ހަރުދަނާ އެތަކެއް ޒުވާނުން މިޤައުމުގައި ތިއްބެވިއިރު އެބޭފުޅުންނަށް ޤައުމު ހިންގެވުމުގެ ފުރުސަތު ނުދެއްވުމަކީ ސަރުކާރުން ޒުވާނުންނަށް ފުރުސަތެއް ނެތްކަން ހާމަކޮށްދެއްވި ކަމެއްކަމަށް ޝިޔާމް ވިދާޅުވިއެވެ.
ޕާޓީގެ ނަމުގައި "ޑިމޮކްރަޓިކް" ޖަހައިގެން ޕާޓީގެ ވެރިކަމެއްގައި މި ފެނިގެންދަނީ "ނެޕޮޓިސަމް" ޤައުމީ ޒުވާނުންގެ ދުވަހު ރައީސް އިބްރާހިމް މުހައްމަދު ޞާލިހު ޒުވާނުންނަށް މި ދެއްވި ޔަގީންކަމަކީ ފުރުސަތެއް ނެތްކަމުގެ ޔަޤީންކަން. ޤައުމު ބަގުރޫޓްކޮށް އަޅުވެތިކޮށްފި. ޒުވާނުންގެ މުސްތަޤުބަލެއް އޮންނާނީ ޤައުމެއް އޮވެގެން.
– އަހުމަދު ޝިޔާމް
ނަސީމް ހެލްތު މިނިސްޓަރަކަށް އައްޔަން ކުރެއްވުމާއި ގުޅިގެން ގިނަބައެއްގެ ފާޑުކިޔުންވަނީ ސަރުކާރަށް އަމާޒުވެފައެވެ. ޚާއްސަކޮށް މި ސްލޮޓަކީ ވެރިކަން ކުރާ ކޯލިޝަންގެ ޖުމްހޫރީ ޕާޓީގެ ސްލޮޓަކަށްވާއިރު މި ސްލޮޓް އެމްޑީޕީއަށް ދިނުމަކީ ގިނަ ބައެއްގެ ފާޑުކިޔުން އަމާޒުވި ކަމެކެވެ.
ހެލްތު މިނިސްޓަރުގެ މަޤާމާއި ހަވާލުވެވަޑައިގެންނެވުމުގެ ކުރިން އަޙްމަދު ނަސީމް ހުންނެވީ ރައީސުލްޖުމްހޫރިއްޔާގެ އޮފީހުގެ މިނިސްޓަރުގެ މަޤާމުގައެވެ. އެ މަނިކުފާނު ވަނީ، 2011 ވަނަ އަހަރު މާރިޗު މަހުގެ 21 ވަނަ ދުވަހުން ފެށިގެން 2012 ވަނަ އަހަރުގެ ފެބުރުއަރީ މަހުގެ 07 ވަނަ ދުވަހުގެ ނިޔަލަށް މިނިސްޓަރ އޮފް ފޮރިން އެފެއާޒްގެ މަޤާމު ފުރުއްވާފައެވެ.
އަދި އޭގެ ކުރިން އަޙްމަދު ނަސީމް ވަނީ މިނިސްޓަރ އޮފް ސްޓޭޓް ފޮރ ފޮރިން އެފެއާޒްގެ މަޤާމު ވެސް ފުރުއްވާފައެވެ. އެ މަނިކުފާނު ސަރުކާރުގެ ޚިދުމަތާއި ގުޅިވަޑައިގަތީ 1966 ވަނަ އަހަރުއެވެ.
