އިންޑިއާގައި ތިބި އިންސާނީ ހައްޤުތަކަށް މަސައްކަތް ކުރާ އެކްޓިވިސްޓުން ހައްޔަރު ކުރަމުންދާ ކަމަށް ވިދާޅުވެ އދ.ގެ ހައި ކޮމިޝަނާ ފޯ ހިއުމަން ރައިޓްސް މިޝޭލް ބަޝެލެޓް ކަންބޮޑުވުން ފާޅު ކުރައްވައިފިއެވެ.
އދ.ގެ ހައި ކޮމިޝަނާ ފޯ ހިއުމަން ރައިޓްސްގެ އޮފީހުން ނެރުނު ބަޔާނެއްގައި ވިދާޅުވެފައިވަނީ، އިންޑިއާގެ ޤާނޫނުހަދާ މަޖިލީހުން މިދިޔަ އަހަރުގެ ޑިސެމްބަރު މަހު ފާސްކުރި ރައްވެހިކަމާ ގުޅޭ ޤާނޫނު، ސިޓިޒެންޝިޕް އެމެންޑެމެންޓް އެކްޓު (ސީއޭއޭ)އާ ދެކޮޅަށް އެޤައުމުގައި ކުރި މުޒާހަރާއާއި ގުޅިގެން 1،500 އަށްވުރެ ގިނަ މީހުން ހައްޔަރުކޮށްފައިވާކަމަށެވެ. އަދި އޭގެ ތެރެއިން ގިނަ އަދަދެއްގެ މީހުންގެ މައްޗަށް ދައުވާކޮށްފައިވަނީ ބައިނަލްއަޤުވާމީ އިންސާނީ ޙައޤުތަކުގެ މިންގަނޑަށް ނުފެތޭ ޤާނޫނެއްގެ ގޮތުގައި ގިނަ ބަޔަކު ސިފަކޮށްފައިވާ 'އަންލޯފުލް އެކްޓިވިޓީސް ޕްރިވެންޝަން އެކްޓު’ގެ ދަށުން ކަމަށްވެސް ވިދާޅުވެފައިވެއެވެ.
ފާޑުކިޔުންތައް މިގޮތަށް މަނާކޮށްގެން ނުވާނެ. އިންޑިއާގައި ޚިޔާލު ފާޅު ކުރުމާއި އެއްވެ އުޅުމުގެ މިނިވަންކަން ބޭނުން ކުރުމުގެ ސަބަބުން އިތުރު މީހަކު ހައްޔަރު ނުކުރާނެކަން ޔަޤީން ކުރުމަށް އެ ޤައުމުގެ ސަރުކާރަށް އަޅުގަނޑު ގޮވާލަން
– ބަޝެލެޓް
ބަޝެލެޓްގެ އޮފީހުން ނެރުނު ބަޔާނުގައި ވަނީ އިންޑިއާގައި އަމަލުކުރާ ބައެއް ޤާނޫނުތަކުގެ ސަބަބުން އިންސާނީ ޙައްޤުތަކަށް މަސައްކަތް ކުރާ އެކްޓިވިސްޓުން ހައްޔަރު ކުރުމަށާއި އެންޖީއޯތަކުގެ މަސައްކަތްތަކަށް ހުރަސް އެޅުމަށް މަގުފަހިވާ ކަންވެސް ފާހަގަކުރައްވާފައެވެ.
އެގޮތުން "އާއްމު މަސްލަހަތަށް ނުރައްކާވާ ފަދަ ހަރަކާތްތަކަށް" ބޭރުގެ އެހީ ދިނުން މަނާ ކުރުމަށް އެކުލަވާލާފައިވާ ފޮރިން ކޮންޓްރިބިއުޝަން ރެގިއުލޭޝަން އެކްޓްގައި "އާއްމު މަސްލަހަތަކީ" ކޮބައިކަން ތަފްސީލު ގޮތެއްގައި ބުނެދީފައި ނުވާއިރު، އެ ޤާނޫނަކީ އެންޖީއޯތަކުގެ މަސައްކަތްތަކަށް ހުރަސް އެޅުމަށް ބޭނުން ކުރުމަށް ފުރުސަތު ލިބޭ ޤާނޫނެއް ކަމަށް ވިދާޅުވެފައިވެއެވެ. އަދި އެއީ އިންސާނީ ހައްގުތަކަށް މަސައްކަތް ކުރާ އެންޖީއޯތަކުން އެހެން ފަރާތްތަކުގެ އެހީއާއިއެކު މަސައްކަތް ކުރުމަށް ހުރަސް އަޅާ ގާނޫނެއްކަމަށްވެސް މި ބަޔާނުގައި ވިދާޅުވެފައިވެއެވެ.
އދ.ގެ ހައި ކޮމިޝަނާ ފޯ ހިއުމަން ރައިޓްސްގެ މި ބަޔާނަށް ރައްދު ދެމުން އިންޑިއާއިން ބުނެފައިވަނީ ޙައްގުތައް ރައްކާތެރި ކުރުމުގެ ނަމުގައި ޤާނޫނާ ހިލާފު ހަރާކާތްތަކަށް ހުއްދަ ނުދެވޭނެކަމަށެވެ.
އިންޑިއާއިން މިދިޔަ އަހަރުގެ ޑިސެމްބަރު މަހު ތަސްދީޤުކުރި ރަށްވެހިކަމުގެ ޤާނޫނުގައި ވަނީ ބަންގުލަދޭޝް އާއި ޕާކިސްތާނާއި އަފްޣާނިސްތާނުން އިންޑިއާއަށް ޤަވާއިދާ ޚިލާފަށްދާ މުސްލިމު ނޫން މީހުންނަށް ރަށްވެހިކަން ދެވޭނެ ގޮތް ހަދައިފައެވެ. އަދި އެ ޤާނޫނާ ދެކޮޅު މީހުން ވަނީ އެއީ މުސްލިމުންނާ މެދު ތަފާތު ކުރާ ގާނޫނެއްގެ ގޮތުގައި ސިފަކޮށްފައެވެ.
