ތުޝާރް ކަޕޫރް އެންމެ ފުރަތަމަ ފެނިގެން ދިޔައީ 2001 ވަނަ އަހަރު ނެރުނު "މުޖޭ ކުޗް ކެހެނާހޭ" އިންނެވެ. އެއަށްފަހު އޭނާ ވަނީ ކާމިޔާބު ކަމާއި އެކުގައި ބޮލީވިޑްގައި 20 އަހަރު ހޭދަ ކޮށްފަ އެވެ.
މި ފިލްމަށް ފަހު ތުޝާރް ވަނީ ވަރަށް ގިނަ ފިލްމުތަކުން ފެނިގެން ގޮސްފައެވެ. މީގެ ތެރޭގައި "ޖީނާ ސިރްފް މޭރޭ ލިޔޭ"، "ޔެ ދިލް"، "ގަޔަބް"، "ކިޔާ ކޫލް ހެ ހަމް"، "ގޯލްމާލް" އަދި "ޝޫޓްއައުޓް އެޓް ލޯކަންޑްވާލާ" ހިމެނެއެވެ.
އިންޓަވިއުއެއްގައި ވާހަކަ ދައްކަމުން ތުޝާރް ބުނެފައިވަނީ އޭނާ ރިގްރެޓް ކުރާ އެއްވެސް ކަމެއް ނެތް ކަމަށެވެ. އެހެންނަމަވެސް ފިލްމީ ކެރިއަރ ފެށިގެން އައި ދުވަސްކޮޅުގައި ބައެއް ފިލްމު ނުކުޅެވުނު ނަމައޭ ހިތަށް އަރާކަމަށްވެސް ތުޝާރް ވަނީ ބުނެފައެވެ. މީގެ ތެރޭގައި އޭނާ ކުޅެން ބޭނުން ނުވި އެހެންނަމަ ވެސް ނޫނެކޭ ބުނަން ނުކެރުނު ބައެއް ފިލްމްތައް ހިމެނޭ ކަމަށް އޭނާ ވަނީ ބުނެފައެވެ.
އެހެންނަމަވެސް ތުޝާރް ބުނީ މިފިލްމުތައް ކުޅެގެން ވެސް އޭނާއަށް ކަންތައްތަކެއް ދަސްވެ، ތަޖުރިބާތަކެއް ލިބިފައި ވާކަމަށެވެ. އެހެންކަމުން ތަޖުރިބާއަށްޓަކައި ހުރިހާ ވައްތަރެއްގެ ފިލްމުތައް ކުޅުންވެސް މުހިންމުކަމަށް ތުޝާރު ދެކެއެވެ.
View this post on Instagram
ތުޝާރުގެ ކާމިޔާބު ފިލްމުތަކެއް ބެލުންތެރިންނާ ހަމައަށް އައިސްފައި ވީނަމަވެސް އޭނާގެ ބައްޕަ ޖީތެންދްރާ ވަރުގެ މަގްބޫލު އަދި ކާމިޔާބު އެކްޓަރަކަށް އޭނާއަކަށް ނުވެވުނެވެ. ޖީތޫޖީ އަކީ 1970 އާއި 1980ގެ އަހަރުތަކުގައި އެންމެ ކާމިޔާބު ތަރިންގެ ތެރޭގައި ގުނާލެވުނު، ބޮލީވުޑްގެ އެއް ތަރިއެވެ.
