ޓީވީ އެކްޓަރ ހިނާ ޚާންގެ ބައްޕަ ހާޓްއެޓޭކެއް ޖެހިގެން މަރުވެފައިވަނީ މިދިޔަ މަހުއެެވެ. ދާދިފަހުން އިންޓަވިއުއެއްގައި ހީނާ ޚާން ބުނެފައިވަނީ އޭނާ އަދިވެސް ހުރީ ވާހަކަ ދެކެވޭ ކަހަލަ ހާލަތެއްގައި ނޫން ކަމަށާއި އެކަމާއި މެދު ވިސްނުމުން އިތުރަށް ދެރަވާކަމަށެވެ.
ވާހަކަ ދައްކަމުން ހިނާ ބުނެފައިވަނީ އެއްވެސް ކަމެއް ކުރާ ހިތް ނުވާކަމަށާއި އެއްވެސް މީހަކާއި ވާހަކަ ދައްކަންވެސް ބޭނުންނުވާ ކަމަަށެވެ. އޭނާ ބޭނުންވަނީ އަމިއްލައަށް ވަގުތު ކޮޅެއް ހުސްކޮށްލުމަށެވެ. އަދި ގިނަ މަސައްކަތްތަކުން ވެސް އޭނާ ވަނީ ބްރޭކެއް ނަގާފައެވެ.
މީގެ އިތުރުން ހީނާ ޚާން ވަނީ ކޮވިޑް 19އަށްވެސް ޕޮޒިޓިވްވެފައެވެ. މިހާރު ބަލިން ރަނގަޅު ވެފައިވީ ނަމަވެސް އޭނާ ހުރީ އައިސޮލޭޝަންގަ އެވެ. ހިނާ ބުނާ ގޮތުގައި އައިސޮލޭޝަންގައި ހުންނަން ޖެހުމުން އޭނާއަށް ނަފްސާނީ ގޮތުން އަސަރު ކޮށްފައިވާކަމަށެވެ.
އޭނާއަށް މިވަގުތު އެންމެ މުހިންމީ އޭނާގެ މަންމަ ކަމަށާއި އޭނާގެ މަންމަވެސް މިވަގުތު ހުރީ ހިތާމާގައިަކަމަށް ހިނާ ވަނީ ބުނެފަ އެވެ. ހީނާ ބުނީ އޭނާ އަބަދުވެސް ދުޢާ އަކީ އޭނާގެ ފިރިއަކަށް އޭނާގެ ބައްޕަ ފަދަ މީހެއް ލިބުންކަމަށެވެ.
ހިނާގެ އެންމެ ފަހުގެ މިއުޒިކް ވީޑިއޯ "ޕައްތަރް ވަރްގީ" އިއްޔެ ވަނީ އާންމުކޮށްފަ އެވެ. މި ލަވަ ކިޔާފައި ވަނީ ބީ ޕްރާކްއެވެ.
ހިނާ ބުނެފައިވަނީ މި ލަވަައަކީ އޭނަގެ ބައްޕައަށް ވަރަށް ކަމުދާ ލަވައެއް ކަމަށެވެ. މި ލަވަ އެންމެ ފުރަތަމަ ރިލީޒްކުރަން ހަމަޖެހިފައިއޮތީ މިމަހު 3 ގައެވެ. ލަވަ ރިލީޒްކުރުން ލަސްކޮށްފައިވަނީ ކޯވިޑް 19ގެ ސަބަބުންނެވެ.
