ދިވެހި އުފެއްދުންތައް މާކެޓްކޮށް ވިއްކުމަށްޓަކައި ބިޒްނަސް ސެންޓަރ ކޯޕަރޭޝަނުން ހިންގާ އޮތެންޓިކް މޯލްޑިވްސްގެ ފިހާރަތަކުން ފިޠުރު ޢީދާ ގުޅުވައިގެން ޚާއްޞަ ޑިސްކައުންޓެއް ތަޢާރަފް ކޮށްފިއެވެ.
ބީސީސީން ބުނީ އޮތެންޓިކް މޯލްޑިވްސްގެ ފިހާރަތަކުން ޢީދަށް ޚާއްޞަ ޑިސްކައުންޓުތަކެއް ދޭން ނިންމާފައިވަނީ ފިޠުރު ޢީދަކީ މުސްލިމުންނަށް ވަރަށް ޚާއްޞަ މުނާސަބާއަކަށްވެފައި ޢީދު ދުވަހު ހަދިޔާ ބަދިޔާ ބަދަލުކުރާއިރު ސީދާ ދިވެހި ފަންނުވެރިންގެ އުފެއްދުންތައް ހަދިޔާގެ ގޮތުގައި ދޭން ބޭނުންވާ ފަރާތްތަކަށް ފަސޭހައިން އެކަން ކުރެވޭނެ މަގު ފަހިކޮށްދިނުމަށް ކަމަށެވެ.
އެގޮތުން މި މަހުގެ 15 ވަނަ ދުވަހާހަމައަށް މާލެ އަދި ހުޅުމާލޭގައި ހިންގަމުންދާ އޮތެންޓިކް މޯލްޑިވްސްގެ ފިހާރަތަކުން ވިއްކާ ބައެއްތަކެތިން 50 އިންސައްތައާ ހަމައަށް ޑިސްކައުންޓު ލިބޭނެކަމަށް ބީސީސީން ބުނެއެވެ.
މާލެއާއި ހުޅުމާލޭގައި ހުޅުވާފައިވާ އޮތެންޓިކް މޯލްޑިވްސްގެ ދެ ފިހާރައިން އާންމު ދިރިއުޅުމުގައި ބޭނުންކުރެވިދާނެ ތަފާތު ދިވެހި އުފެއްދުންތައް ލިބެން ހުރެއެވެ. އަދި އޮތެންޓިކް މޯލްޑިވްސްގެ ފިހާރަތަކުގައި ދިވެހި އުފެއްދުންތައް މާކެޓްކުރަން ބޭނުންވާ ފަރާތްތަކަށް ބީސީސީން ވަނީ އެ ފުރުޞަތުވެސް ހުޅުވާލާފަ އެވެ.
ބިޒްނަސް ސެންޓަރ ކޯޕަރޭޝަނަކީ ވިޔަފާރިކުރަން ބޭނުންވާ ފަރާތްތަކަށާއި ވިޔަފާރިވެރިންނަށް ބޭނުންވާ އެހީތެރިކަން ފޯރުކޮށްދިނުމަށް އުފައްދާފައިވާ ސަރުކާރުގެ ކުންފުންޏެކެވެ. ބީސީސީން ދަނީ ރާއްޖޭގެ 8 ސަރަހައްދެއްގައި ބިޒްނަސް ސެންޓަރުތައް ހުޅުވައި ރައްޔިތުންނަށް ވިޔަފާރީގެ ދާއިރާއިން ބޭނުންވާ އެހީތެރިކަން ފޯރުކޯށްދެމުންނެވެ.
ކޮމެންޓު ފޮނުވާ