ހިންދީ އަދި މަރާޓީ ފިލްމީ ތަރިއެއް ކަމަށްވާ މޯހަން ޖޯޝީވަނީ ކޯވިޑް ވެކްސިންގެ ދެ ޑޯޒް ފުރިހަމަކުރި ފަހުން ކޯވިޑް ބަލި ޖެހިފައެވެ. އޭނާ މިވަގުތު ހުރީ ގޯވާގައެވެ.
އިންޓަވިއުއެއްގައި ވާހަކަ ދަައްކަމުން މޯހަން ބުނެފައިވަނީ އޭނާ ފުރަތަމަ ޑޯޒް ޖެހީ 06 މާރިޗުގައެވެ. އަދި ދެވަނަ ޑޯޒް ޖަހާފައިވަނީ އެޕްރީލް 20 ގައެވެ. މިވަގުތު އޭނާ ހުރީ ގޯވާގެ ހޮޓަލެއްގައި ކަރަންޓީނުވެފަ އެވެ.
ވެކްސިން ޖެހިތާ ދެތިން ހަފްތާ ފަހުން އޭނާވަނީ ފިލްމު ޝޫޓިންއަށް ނުކުމެފައެވެ. މީގެ އިތުރުން އޭނާގެ ޓީމުގެ އިތުރު ހަތަރު މީހަކު ވެސް ވަނީ ކޯވިޑަށް ޕޮޒިޓިވްވެފަ އެވެ. މީގެ ތެރޭގައި ހިމެނެނީ ދެ ލައިޓްމަނުންނާއި ޑްރައިވަރުގެ އިތުރުން އާޓް ދާއިރާގެ މީހެކެވެ.
މޯހަން ޖޯޝީ އަކީ ގިނަ ހިންދީ ފިލްމުތަކެއްގައި ނުބައި ރޯލުތަކުން މީހުންގެ މަޤްބޫލުކަން ހޯދާފައިވާ ތަރިއެކެވެ.
އިންޑިއާގައި ކޯވިޑްގެ ހާލަތު ގޯސްވުމާއި އެކުގައި ވަރަށް ގިނަ ފިލްމުތަކުގެ ޝޫޓިންވަނީ މެދުކެނޑިފަ އެވެ. ޚާއްސަކޮށް މަހާރަސްޓްރާ ފުރަބަންދު ކުރުމާއި ގުޅިގެން ވަރަށް ގިނަ ފިލްމުތައް ވަނީ ހުއްޓިފަ އެވެ. ހަމައެހެންމެ ގޯވާގައި ވެސް ކޮވިޑްގެ ކޭސްތައް ދަނީ އިތުރުވަމުންނެވެ.
