ކޮމެޑީ ގިނަ ޝޯވް ތަކަކުން ބެލުންތެރިންގެ މަގްބޫލުކަންހޯދާފައިވާ ކޮމޭޑިއަން ސުގަންދާ މިޝްރާ އާއި ކޮމޭޑިއަން އަދި މިމިކްރީ އާޓިސްޓް ޑރ. ސަންކެތު ބޯސްލޭ ކައިވެނިކުރީ ހޯމަ ދުވަހު އެވެ. މީގެ ދުވަސްކޮޅެއް ކުރިން ސުގަންދާ ވަނީ އޭނާގެ އިންސްޓްގަރާމު މެދުވެރިކޮށް މި އުފާވެރި ޚަބަރު ބެލުންތެރިންނާއި ހިއްސާކޮށްފަ އެވެ.
މި ކައިވެނީގެ ބައެއް ފޮޓޯތައް ދެމީހުންގެ ރަހުމަތްތެރިންވެސް ވަނީ ހިއްސާކޮށްފަ އެވެ. އަދި މި ފޮޓޯތައް ހިއްސާކުރަމުން ދެމަފިރިންނަށް މަރުހަބާ ކިޔާފައި ވެއެވެ. ބައެއް ފޮޓޯތަކުން ފެނިގެން ދަނީ ސުގަންދާ އަދި ސަންކެތު އެއް ތަށިން ކަމުންދާ މަންޒަރެވެ. އަދި ދެމަފިރިން ތިބީ ވެސް ކައިވެނީގެ ހެދުމުގައެވެ.
ކައިވެނީގެ ކުރިން ސުގަންދާ އާއި ސަންކެތު ވަނީ ކައިވެންޏާއި ގުޅުވައިގެން ބޭއްވި އެކިއެކި ރަސްމިއްޔާތުތަކުގެ ބައެއް ފޮޓޯތައް އިންސްޓަގަރާމުގައި ހިއްސާކޮށްފަ އެވެ. އެގޮތުން އެންގޭޖްމެންޓާއި މެހެނދީ ރަސްމިއްޔާތުގެ ފޮޓޯތައް ހިމެނެވެ.
ކައިވެނީގެ ކުރިން މި ދެމަފިރިން ވަނީ ވަރަށް ގިނަ ވީޑިއޯ އަދި ފޮޓޯތައް އިންސްޓަގްރާމުގައި ހިއްސާކޮށްފަ އެވެ. އެގޮތުން ހިއްސާ ކޮށްފައިވާ ވީޑީއޯއެއްގައި ސުގަންދާ އޭނާގެ އަތުގައި އަޅާފައި ހުރި މެހެންދީ ސަންކެތް އަށް ދައްކާ މަންޒަރު ފެނިގެން ދެއެވެ.
ސުގަންދާ އަކީ ކޮމޭޑިއަނެއްގެ އިތުރުން ޓީވީހޯސްޓެއް އަދި ލަވަކިއުންތެރިއެއްވެސް މެއެވެ.
ކޮމެންޓު ފޮނުވާ