ނުވަދިހައިގެ އަހަރުތަކާއި ދެހާހުގެ ކުރީކޮޅު ހިންދީ ސިނަމާތަށް ފަޅުފިލުވާލަދިން ގިނަ ލަވަތަކެއްގެ މިއުޒިކް ކޮމްޕޯސްކޮށްދިން ޝްރަވަން ރާތޯރްގެ މަރުގެ ޚަބަރާއި އެކުގައި މުޅި ދާއިރާއަށްވެސް ވަނީ ފުން ހިތާމައެއް ލިބިފައެވެ. މިއީ ހިންދީ މިއުޒިކުގެ ދައިރާއަަށް ލިބުނު ވަރަށް ބޮޑު ގެއްލުމެކެވެ. ޝްރަވަން މަރުވެފައި ވަނީ ކޯވިޑް 19 އަށް ފަރުވާ ހޯދަމުން ދަނިކޮށް މިދިޔަ ބުރާސްފަތި ދުވަހުއެވެ.
މި ހިތާމަވެރި ހާދިސާއަށް ދުވަސްކޮޅެއް ވެފައިވާއިރު ޝްރަވަންގެ ފިރިހެންދަރިފުޅުވަނީ ފުރަތަމަ ފަހަރަށް މިކަމާއި ގުޅޭގޮތުން ވާހަކަ ދައްކާފަ އެވެ. އޭނާ ބުނެފައިވާ ގޮތުގައި ކޯވިޑް 19 އިން ރައްކާތެރިވުމަށް، ރައްކަަތެރިކަމުގެ ފިޔަވަޅު އެޅުމަށް އަބަދު ވެސް މާހިރުން ނަސޭހަތްތެރި ވަަމުންދާނަމަވެސް މި ނަސޭހަތް އަޑުއަހަނީ މަދު ފަހަރަކު ކަމަށެވެ.
ޓައިމްސް އޮފް އިންޑިއާއާ ވާހަކަ ދައްކަމުން ޝްރަވަންގެ ފިރިހެންދަރިފުޅު ސަންޖީވް ބުނެފައިވަނީ އޭނާގެ ބައްޕައަކީ ދީނީ ކަންކަމަށް ލޯބިކުރާ ފަރާތެއް ކަމަށާއި ދީނީ އެކިއެކި އެއްވުންތަކަށާއި ހަރަކާތްތަކަށް ވަރަށް ގިނައިން ދަތުރުވެސް ކުރާކަމަށެވެ. އަދި ކޯވިޑް 19 ތެެރޭގައި ވެސް މި ދަތުރުތަކަށް އެއްވެސް ބަދަލެއް ނާންނަކަމަށްވެސް އޭނާ ވަނީ ބުނެފައެވެ.
ޝްރަވަން އަކީ ކާމިޔާބު ފިލްމުތައް ކަމަށްވާ "އާޝިޤީ"، "ޕޫލްއޮރް ކާންޓޭ"، "ރާޖާ ހިންދުސްތާނީ"، "ސަޑަކް" ފަދަ ފިލްމުތަކަށް މިއުޒިކް ކޮންޕޯސްކޮށްދިން މިއުޒިކް ޑައިރެކްޓަރ ޑުއޯ "ނަދީމް-ޝްރަވަން"ގެ އެއް ބައިވެރިޔާއެވެ.
