އިންޑިއާގައި ކޯވިޑް 19ގެ ހާލަތު ދުވަހަކަށްވުރެ ދުވަހެއް ގޯސްވަމުން ދަނީ ވަރަށް ބާރު ސްޕީޑުގަ އެވެ. އެގޮތުން މިހާރު ދުވާލެެއްގެ މައްޗަށް 3 ލައްކަ އަށްވުރެ ގިނަ މީހުން ދަނީ މި ބައްޔަށް ޕޮޒިޓިވް ވަމުންނެވެ. މިއާއެކުގައި އިންޑިއާ ސަރުކާރުން ވަނީ ރައްކާތެރި ކަމުގެ ހަރުކަށި ފިޔަވަޅުތައް އަޅާފައެވެ.
ބައެއް ފަންނާނުންތައްވެސް އެމީހުންގެ ސޯޝަލް މީޑިއާގައި ދަނީ އާންމުންނަށް ރައްކާތެރިވުމުގެ ގޮތުން ނަސޭހަތްތެރި ވަމުންނެވެ. އެގޮތުން ޝާހިދް ކަޕޫރުގެ އަންހެނުން މީރާ ރާޖްޕުތުވެސް ވަނީ އޭނާގެ އިންސްޓްގަރާމުގައި މިކަމާއި ބެހޭގޮތުން ޕޯސްޓެއް ހިއްސާކޮށްފައެވެ.
މި ޕޯސްޓުގައި ބުނެފައިވަނީ އެންމެންވެސް ގޭގައި ތިބުމަށާއި ކޮންމެހެން ނުކުނަން ޖެހިއްޖެ ހާލަތެއް އައިސްފިނަމަ މާސްކު އެޅުމާއި ގައިދުރުކަން ފަދަ ރައްކާތެރިކަމުގެ ފިޔަވަަޅުތަކަށް ސަމާލުކަން ދިނުމަށެވެ. އަދި މުޅި އިންޑިއާގަވެސް ހާލަތު ވަރަށް ގޯސްކަން އެންމެނަށްވެސް އެނގޭ ކަމަށާއި، އަމަލީގޮތުން މި ކަންކަމުގައި އެހީނުވެވޭ މީހުން ގޭގައި ތިބެގެން ވެސް މިހާލަތުން އަރައިގަތުމަށް މުހިންމު ދައުރެއް އަދާކުރެވޭނެ ކަމަށްވެސް މީރާ ވަނީ ބުނެފައެވެ.
މީރާއަކީ ސޯޝަލް މީޑިއާގައި ވަރަށް އެކްޓިވް ފަރާތަކަށް ވުމާއި އެކުގައި އޭނާގެ ގިނަ ފޭނުން އަދި ފޮލޮވާސް ތިބެއެވެ.
