މަޝްހޫރު ޓެމިލް އެކްޓަރެއް ކަމުގައިވާ ވިވެކްވަނީ ހޮނިހިރު ދުވަހުގެ ހެދުނު މަރުވެފަ އެވެ.
އޭނާ މަރުވީ ހާޓްއެޓޭކެއް ޖެހިގެން އެޑްމިޓްކޮށް ފަރުވާ ހޯދަމުން ދަނިކޮށެވެ. އޭނާ މަރުވިއިރު އުރުން 59 އަހަރުގަ އެވެ.
ވިވެކަށް ހާޓްއެޓޭކެއް ޖެހިފައިވަނީ ހިތުގެ ނާރެއް ފިތިގެން ނެވެ. އަދި ޗެންނާއީގެ ސިމްސް ހޮސްޕިޓަލަށް އޭނާ ގެނެވުނު އިރުވެސް އޮތީ ހޭނެތިފައެވެ. އަދި މިއާއެކު ފަރުވާދީ އެމަޖެންސީ ކޯނަރީ އެންޖިއޯގްރާމެއް ވަނީ ހަދާފައެވެ. އަދި ހަމައެހެންމެ އެންޖިއޯ ޕްލާސްޓީއެއް ވެސް ވަނީ ހަދާފައެވެ.
ސިމްސް ހޮސްޕިޓަލުގެ ނައިބު ރައީސް ޑރ. ރާޖޫ ސިވާސަމީ ބުނެފައިވާ ގޮތުން ވިވެކްގެ ބަލި ހާލަތަކީ ކޯވިޑް 19ގެ ވެކްސިންއާއި ގުޅުން ހުރި ކަމެއް ނޫންކަމަށެވެ. އަދި ވިވެކް ހިތުގެ ނާރުގެ ފިތުން ރަނގަޅު ކުރުމަށް ވެސް ވަނީ އެއްގަނޑިއިރު ނަގާފައެވެ. އަދި މިއީ އެކިއުޓް ކޯނަރީ ސިންޑްރޯމްއެއް ކަމަށްވެސް ޑޮކްޓަރު ވަނީ ބުނެފައެވެ.
ޕަދްމާ ޝްރީ ލިބިފައިވާ ވިވެކް ވަނީ ޓެމިލް ފިލްމް އިންޑަސްޓްރީގެ އެންމެ މަޝްހޫރު ތަރިންނާއި އެކުގައި މަސައްކަތް ކޮށްފައެވެ. އެގޮތުން ރަޖްނީކާންތު، ވިޖޭ އަދި އަޖިތު ކުމާރް ހިމެނެއެވެ. މީގެ އިތުރުން ބައެއް ފިލްމުތަކުގެ ލީޑުރޯލުން ވެސް ވިވެކްވަނީ ބެލުންތެރިންނާއި ހަމައަށް ފެނިގެން ގޮސްފައެވެ.
ފިލްމީ ދާއިރާގެ އެކި އެކި ފަންނާނުންވަނީ ވިވެކަށް ހެޔޮ ދުއާ ކޮށް ޓްވީޓް ކޮށްފައެވެ. އެގޮތުން އޭއާރް ރަހްމާންގެ ޓްވީޓެއްގައި ބުނެފައި ވާގޮތުން ވިވެކްގެ ލެގަސީ އަކީ ހިތުން ފޮހިވިގެން ނުދާނެ ލެގަސީއެކެވެ.
