ފިލްމީ ތަރި މުގްދާ ގޯޑްސޭ ވަނީ ރާހުލް ދޭވްއާ ދެމީހުންގެ ލިވް-އިން ރިލޭޝަންޝިޕްގެ ވާހަކަ ބެލުންތެރިންނާ ހިއްސާކޮށްފަ އެވެ. އެގޮތުން އޭނާ މިވާހަކަ ދައްކާފައިވަނީ، ބެލުންތެރިން އޭނާ ކައިވެނި ކުރަނީ ކޮން އިރަކު ތޯ ކުރަމުންދާ ސުވާލުގެ ޖަވާބު ދިނުމުގެ ގޮތުންނެވެ.

މުގްދާ ގޮޑްސޭ އަކީ ހުރިހާ ކަމަކާ ވަރަށް ކެރިގެން ކުރިމަތިލާ މީހެކެވެ. އެއީ އޭނާގެ މަސައްކަތު އަދި އަމިއްލަ ދިރިއުޅުން ކަމުގައި ވިޔަސްމެއެވެ. އެގޮތުން މުގްދާ އާއި ރާހުލް ލިވް-އިން ރިލޭޝަންޝިޕެއްގައި އުޅޭތާ މިހާރު އެތަށް އަހަރެއް ވެދާނެއެވެ. މިއާ އެކު ގިނަ ބެލުންތެރިންގެ ހިތުގައި އެންމެ ގިނައިން އުފެދޭ އެއް ސުވާލަކީ މި ދެމިހުން ކައިވެނި ކުރަނީ ކޮން ދުވަހަކުތޯ ކަމަށް ވުމީ އެއްވެސް ޝައްކެއް އޮތް ކަމެއް ނޫނެވެ.

އިންޓަވިއުއެއްގައި ވާހަކަ ދައްކަމުން މުގްދާ ބުނެފައިވަނީ މި ސުވާލަކީ ވަރަށް ގިނައިން އޭނާއާ ކުރިމަތިވާ ސުވާލެއް ކަމަށެވެ. މި ސުވާލަށް އޭނާ ދިން ޖަވާބަކީ މި ދެލޯބިވެރިން އުޅެނީ ވަރަށް އުފަލުގައި ކަމަށެވެ. އަދި މިހާރުވެސް އިހުސާސު ވަނީ ކައިވެނި ކޮށްގެން އުޅެވޭހެންނެވެ. ހަމައެކަނި ކައިވެނީގެ ސެޓްފިކެޓްއެއްގައި ސޮއި ނުކުރާ ކަމެވެ.

ލިވް-އިން ރިލޭޝަންޝިޕަކީ އިންޑިއާގެ އާންމު ސަގާފަތާއި އާދަކާދަތަކާވެސް ފުށުއަރާ ކަމަކަށް ވާތީ މިއީ އިންޑިއާގައި ހުއްދަކޮށްފައި އޮތް ކަމެއް ނަމަވެސް އިންޑިއާގެ ގިނަބަޔަކު މާބޮޑަށް ތާއީދު ކުރާ ކަމެއް ނޫނެވެ.

34 އަހަރުގެ ފިލްމީ ތަރި ބޮލީވުޑުން އެންމެ ފުރަތަމަ ފެނިގެންގޮސްފައި ވަނީ 2008 ވަނަ އަހަަރު ފިލްމު "ފެޝަން" އިންނެވެ. އަދި ވަރަށް ފަހުން އޭނާ ވަނީ "ފައުޖީ ކޯލިންގ" އިންވެސް ފެނިގެން ގޮސްފަ އެވެ.