ރާނީ މުކަރްޖީ ބޮލީވުޑްގައި މަސައްކަތް ކުރާތާ މިހާރު 25 އަހަރަށްވުރެ ގިނަދުވަސް ވަނީ ވެފައެވެ. އެނާގެ ފާއިތުވެދިޔަ 25 އަހަރުގެ ދިގު ކެރިއަރ ގައި އޭނާ ވަނީ އެތަކެއް ގިނަގުނަ ޚިދުމަތްތަކެއް މި ދާއިރާއަށް ކޮށްދީފަ އެވެ. އަދި އެނާވަނީ އޭނާގެ މަސައްކަތުން ބޮލީވުޑްގައި ނަންވިދާލާ ތަރިއަކަށް ވެފައެވެ.
ރާނީ ވަނީ ކުރިއަތް އޮތް ޒުވާން ޖީލަށް ނަސޭހަތުގެ ދެތިން ބަސް ބުނެލާފައެވެ. 25 އަހަރުގެ ތަޖުރިބާއާއި އެކުގައި ރާނީ ބުނެފައިވަނީ ފިލްމީ ތަރިއަކަށް ވުމަކީ އެއްވެސް ގޮތަކަށް ފަސޭހަ ކަމެއް ކަމަށް ނުދެކުމަށެވެ. އެއީ ނުހަނުގިނަ އުނދަގޫ ތަކާއި ގޮންޖެހުންތަކާއި ކުރިމަތިވާ ކަމެއް ކަމަށްވެސް ރާނީ ވަނީ ބުނެފައެވެ. އެގޮތުން ތަރިއަކަށް ވުމަށްފަހު ބެލުންތެރިންގެ އެތަކެއް އުއްމީދުތަކެއް އެމީހަކާ އެކުަގައި ވާނެކަމަށާއި ކޮންމެ ފަދަ ހާލަތެއްގައިވެސް އެކްޓްކުރަން ތައްޔާރަށް ހުރުމަކީ ވެސް މުހިއްމު ކަމެއް ކަމަށް ރާނީ ވަނީ ބުނެފައެވެ.
ބައެއް ފަހަރު ސްކްރީނުން ފެންނައިރު ކިތަންމެ ރީތިވެފައި ފަސޭހަހެން ހީވިޔަސް މި ދާއިރާގައި މަސައްކަތް ކުރުމަކީ އުދަނގޫ ކަމެއް ކަމަށް ރާނީ ބުންޏެެވެ. އެހެންކަމުން ބުރަކޮށް މަސައްކަތް ކުރުމާއި އެކްޓްކުރުމަށް ލޯބިކުރާނަމަ މި ދާއިރާއަށް ގުޅުމަށް ޒުވާން ޖީލަށް ރާނީ ވަނީ ގޮވާލަފައެވެ.
ރާނީގެ އިތުރުން އޭނާގެ ފިރިމީހާ އަދިތިޔާ ޗޯޕްރާ އަކީ ވެސް ހިންދީ ފިލްމު އިންޑަސްޓްރީއަށް ދިގު މުއްދަތަކަށް ގިނަ ޚިދުމަތްތަކެއް ކޮށްދެމުންގެންދާ މީހެކެވެ. ބޮލީވުޑްގެ އެންމެ މަޝްހޫރު ފިލްމް ސްޓޫޑިއޯ ޔަޝްރާޖް ފިލްމްސްގެ އެމްޑީގެ އިތުރުން އަދިތިޔާ އަކީ އެތަނުގެ ޗެއަރމަން ވެސް މެއެވެ. ކާމިޔާބު ގިނަ ފިލްމުތަކެއް ޑައިރެކްޓްވެސް ކޮށްދީފައި ވާ އަދިތިޔާ އާއި ރާނީ ކައިވެނި ކުރީ 2014 ވަނަ އަހަރުގައެވެ.
