ބޮލީވުޑްގެ މަޝްހޫރު ތަރި ކެޓްރީނާ ކައިފްގެ ލޯބިވެރިޔާ ކަމަށް އަޑުފެތުރިފައިވާ ވިކީ ކައުޝަލް ކޯވިޑްއަށް ޕޮޒިޓިވްވިކަން އިއުލާން ކުރިތާ އެއްދުވަސް ފަހުން ކެޓްރީނާއަށްވެސް ކޯވިޑް ޖެހިފައިވާކަން ހާމަކޮށްފި އެވެ.
ހޯމަދުވަހު އިންސްޓަގްރާމް މެދުވެރިކޮށް ވިކީ ކޮށްފައިވާ ޕޯސްޓެއްގައި ބުނެފައިވަނީ އެނާ ކޯވިޑް އަށް ޕޮޒިޓިވް ވެފައި ވާކަމަށެވެ. އޭނާ ޕޮޒިޓިވް ވެފައިވަނީ މިހާރު ކުޅެމުންދާ ފިލްމް "މިސްޓަ ލޭލޭ"ގެ ޝޫޓިން ކުރިއަށް ގެންދަނިކޮންނެވެ. ވިކީގެ އިތުރުން މި ފިލްމުގެ އަންހެން ތަރި ބޫމީ ޕެޑްނޭކަރް ވެސް ވަނީ ޕޮޒިޓިވްވެފަ އެވެ. އޭނާވެސް ވަނީ އިންސްޓަގްރާމްގައި އެކަން ހާމަކޮށްފަ އެވެ.
View this post on Instagram
ކެޓްރީނާ ކޯވިޑްއަށް ޕޮޒިޓިވްވެފައި ވާކަމަށް ހާމަކުރީ އިއްޔެ އޭނާގެ އިންސްޓަގްރާމް ސްޓޯރީގައެވެ. އަދި ރައްކާތެރި ކަމުގެ ފިޔަވަޅު އަޅަމުންދާ ކަމަށާއި މިވަގުތު ހުރީ ސެލްފް އައިސޮލޭޝަންގައި ކަމަށް އޭނާ ވަނީ ބުނެފައެވެ.
ކެޓްރީނާ އާއި ވިކީ ލޯބީގެ ގޮތުން ގުޅިގެން އުޅޭ ކަމަށް ވަނީ މީގެ ދުވަސްތަކެއް ކުރިން އަޑު ފެތުރިފައެވެ. މިއާއެކު އެ ދެމީހުން އެކަހެރި ބައްދަލުވުން ތަކުގެ ފޮޓޯތަށް ވެސް ވަނީ އާންމުވެފަ އެވެ. އަދި ދެމީހުންގެ އުފަލާއި ހިތާމަތަކުގައި ދެމީހުންވެސް ބައިވެރިވެ އެކުގައި ވަގުތު ހޭދަކުރަމުންދާކަމަށް ރިޕޯޓްތަށް ބުނެއެވެ. މިފަދަ ގޮތަކަށް އަޑުއަރާފައި ވާއިރު ދެމީހުން ގާތް ގާތުގައި ކޯވިޑަށް ޕޮޒިޓިވް ވުމާ ގުޅިގެން މިވާހަކަތަކަށް ވަނީ އިތުރަށް ބާރު ލިބިފަ އެވެ.
ނަމަވެސް މި ދެމީހުން ކުރެ އެކަކުވެސް މި މައުލޫއަށް އަދި މިހާތަނަށް ވާހަކަދައްކާފައެއް ނުވެއެވެ. އަދި ހަމަ އެހެންމެ މި ވާހަކަތަށް ދެމީހުންކުރެ އެކަކުވެސް މިހާތަނަށް ދޮގުކޮށްފައެއްވެސް ނުވެއެވެ.
