ދިވެހި ރާއްޖޭގެ ފަޚުރުވެރި ޤައުމީ ދުވަހުގެ ތަހުނިޔާ ޔޫތު މިނިސްޓަރ މަހުލޫފާއި ދަރިކަލުން އެލީ ޤައުމީ ލަވަޔަކުން ފޮނުވައިފިއެވެ.
"ކިޔާދޫތަކުންމީ ޝުކުރުވެރި ތަރާނާ، ޝަހީދުންގެ ޒިކުރާގެ މަތިވެރި ފަސާނާ" މިލަވަޔާއިއެކު މަހުލޫފާއި، ދަރިކަލުން ޤައުމީ ދުވަހުގެ ތަހުނިޔާ އަރިސްކޮށްފައިވާއިރު، މި ވޯޑިޔޯ ޝެއާކުރެއްވީ މަޝްހޫރު ލަވަކިޔުންތެރިޔާ އިބްރާހިމް އަލީ (ކުޑައިއްބެ) އެވެ. މަހުލޫފް އަކީ ޤައުމީ އެކި މުނާސަބަތުތަކާއި ގުޅިގެން ޤައުމީ ޖޯޝުގައި ދުވަހުގެ ތަހުނިޔާ އަރިސްކުރައްވާ ބޭފުޅެކެވެ. މިއަހަރުގެ ޤައުމީ ދުވަސް މާދަމާ ފާހަނގަކުރުމުގެ ގޮތުން ޚާއްސަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ.
A duo from Father & Daughter ♥️ @EllyMahloof @AhmedMahloof
Coming soon..? pic.twitter.com/v5QYJPghjE
— Ibrahim Zaid Ali (@ibrahimzaid_a) October 17, 2020
މި އަހަރުގެ ޤައުމީ ދުވަހުގެ މުނާސަބަތުގައި ބާއްވާ ދިދަ ނެގުމުގެ ރަސްމިއްޔާތު މާލެއާއި ބޮޑު ތަކުރުފާނުގެ ހަދާނީ މަރުކަޒުގައި ބޭއްވުމަށް ވަނީ ހަމަޖެހިފައެވެ. ޖުމްހޫރީ މައިދާނުގައި ބާއްވާ ދިދަ ނެގުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެޑައިގެންނަވާނެއެވެ.
ޤައުމީ ދުވަހުގެ މުނާސަބަތުގައި ބާއްވާ ހަރާކާތްތަކުގެ ތެރޭގައި ދިދަ ނެގުމުގެ ރަސްމިއްޔާތުގެ އިތުރުން ބޮޑުތަކުރުފާނުގެ އުފަން ރަށް ހއ.އުތީމުގައި ރަސްމީ ޖަލްސާއެއް ބޭއްވުމަށް ވަނީ ހަމަޖެހިފައެވެ. މި ޖަލްސާގައި ހޯމް މިނިސްޓަރ އައްޝައިޚް އިމްރާން އަބްދުﷲ ވީޑިއޯ މެދުވެރިކުރައްވާ ޚިޠާބެއް ދެއްވުމަށް ވަނީ ހަމެޖހިފައެވެ. ޤައުމީ ދުވަހާއި ގުޅިގެން ރައީސުލް ޖުމްހޫރިއްޔާ ޤައުމާއި މުޙާތަބް ކުރެއްވުމަށް ހަމަޖެހިފައިވަނީ މާދަމާ ހެނދު 10 ޖަހާ އިރުއެވެ.
ރާއްޖޭގައި ޤައުމީ ދުވަހުގެ ގޮތުގައި ފުރަތަމަ ދުވަހެއް ފާހަގަކުރީ ހިޖުރައިން 1365 ވަނަ އަހަރުގެ ރަބީޢުލްއައްވަލް މަހުގެ ފުރަތަމަ ދުވަހުއެވެ. އެއީ މީލާދީން 4 ފެބްރުއަރީ 1946 އެވެ. އޭގެ ކުރިން ޤައުމީ ދުވަހުގެނަމުގައި ވަކި ދުވަހެއް ރާއްޖޭގައި ފާހަގަކުރިކަމެއް އެނގޭކަށް ނެތެވެ.
ކޮމެންޓު ފޮނުވާ