ޕީޕީއެމް ޕީއެންސީން ތަޢާރަފްކުރި ލޯޔަލީ ކާޑަށް ސަރުކާރު ހިންގާ އެމްޑީޕީގެ ޕާލިމަންޓް މެމްބަރު އަލީ ނިޔާޒު ފާޑުވިދާޅުވުމުން، ޕީޕީއެމްގެ ނާއިބް ރައީސް އިބްރާހިމް ޝުޖާއު ރައްދު ދެއްވައިފިއެވެ.
ޕާޓީގެ މެމްބަރުންގެ މެދުގައި ތަފާތު ދަރަޖަތަކެއް ކަނޑައަޅައި ލޯޔަލްޓީ ތަފާތު ކުރުމަކީ މެމްބަރުންގެ މެދުގައި ކުރެވޭ ދަރަޖައިގެ ތަފާތެއް ކަމުގައި ވިދާޅުވެ އަލީ ނިޔާޒު ދެއްކެވި ވާހަތަކަށް ރައްދު ދެއްވަމުން ޝުޖާއު ވިދާޅުވީ ދުނިޔޭގެ ކުރިއަރާފައިވާ ޤައުމުތަކުގައި ޕާޓީ ސިސްޓަމް ހިނގާ ގޮތް އެމްޑީޕީގެ އިސްބޭފުޅުންނަށް ނޭގޭތީ ހިތާމަކުރާކަމަށެވެ. ދުނިޔޭގެ ކަންހިނގާ ގޮތާއި، ތަރައްޤީވެ ތަހުޒީބު ވެފައިވާ ޤައުމުތަކުން އަމަލުކުރާ އުސޫލުތަކަށް ދިވެހިންގެ ތެރެއަށް ތަޢާރަފްކުރުމުން އެކަންކަމާއި ދެކޮޅު ހެދުމަކީ ކަންކަން ހިނގާގޮތް ނޭގޭ ކަމުގެ އަސްލެއްކަމަށް އޭނާ ވިދާޅުވިއެވެ.
ލޯޔަލިޓީ ކާޑަކީ ކޮބައިކަން އެބަ ދެނެގަންނަންޖެހޭ. އަޅުގަނޑު މީގެ ކުރިން ހިތައްއެރީ އެމްޑީޕީ އަށް ދުނިޔޭގެ މަލްޓިޕާޓީ ސިސްޓަމް އެގޭކަމަށް. މިހާރު އެގިއްޖެ އެއްކަމެއްވެސް ދަންނަ ބައެއް ނޫންކަން. ޕީޕީއެމްގެ ލޯޔަލިޓީ ކާޑުގެ ފުރިހަމަ މައުލޫމާތު ހޯއްދެވުމަށް ދަންނަވަން.
– އިބްރާހިމް ޝުޖާއު
ޝޫޖާއު ވިދާޅުވީ ޕީޕީއެމްއަކީ ދުނިޔޭގެ ކުރިއަރާފައިވާ ގައުމުތަކުގައި ކަންކަން ހިނގާގޮތް އަބަދުވެސް ނަމޫނާއަށް ބަލައި އެކަންކަން ތަޖުރިބާ ކުރަމުންދާ ޕާޓީއެއްކަމަށެވެ. އޭނާ ވިދާޅުވީ މިހާރު ސަރުކާރާއި ހަވާލުވެ ތިއްބެވި ބޭފުޅުން ދުނިޔެވީ އެހެން ކަންކަމަށް ފާޑުކިޔުމަށްވުރެ ޒިންމާ އަދާކުރެވޭތޯ ބެލުން މާރަނގަޅުކަމަށެވެ.
ދުނިޔޭގެ ބޮޑެތި ޑިމޮކްރަސީތަކުގެ ޕާޓީތަކުގެ ލޯޔަލިޓީ ކާޑް ފަންކްޝަން ކުރާގޮތް ވެސް ބައްލަވާ ލައްވާ. ޕީޕީއެމް މިދަނީ ހުރިހާ ކަމަކުން ތަފާތު ދައްކަމުން. ސަރުކާރުގެ ވެރިން ސަރުކާރު ހިންގޭތޯ ބައްލަބާ.
– އިބްރާހިމް ޝުޖާއު
"ލޯޔަލިޓީ ކާޑު" އިދިކޮޅު ކޯލިޝަނުން ތަޢާރަފް ކުރުމާއި ގުޅިގެން ޢަލީ ނިޔާޒް ކުރެއްވި ޓްވީޓެއްގައި ވިދާޅުވީ ޕާޓީއެއްގެ ކޮންމެ މެމްބަރަކަށްވެސް އެޕާޓީއެއްގެ ތެރޭގައި ލޯޔަލީޓީ އޮންނަންވާނީ ހަމަހަމަ އުސޫލަކުންކަމަށެވެ. މެމްބަރުންގެ މެދުގައި ތަފާތު އުސޫލަކުން ކަންކަން ކުރެވޭ ގޮތަކަށް ދަރަޖަ ކުރުމަކީ ޕާޓީތަކުގެ މަފްހޫމާއިވެސް ޚިލާފްކަމެއްކަމަށް ޢަލީ ނިޔާޒު ވިދާޅުވިއެވެ.
ޕީޕީއެމް ޕީއެންސީގެ ލޯޔަލިޓީ ކާޑުތަކުގެ ތެރެއިން މެޖެންޑާ ކާޑަކީ ޕާޓީގެ ހުރިހާ މެމްބަރުންނަށް އަމާޒުކޮށްގެން ތަޢާރަފް ކުރެވިފައިވާ ކާޑެކެވެ. އަދި ސިލްވާ، ގޯލްޑް، ޕްލެޓިނަމް ކާޑަކީ ވިޔަފާރި ވެރިންނާއި، ޕާޓީއަށް ހެޔޮއެދޭ ފުދުންތެރި ފަރާތްތަކަށް ޚާއްސަކުރެވިގެން ތަޢާރަފް ކުރެވިފައިވާ ކާޑެއްކަމަށް އެކޯލިޝަނުން ބުނެއެވެ.
ކޮމެންޓު ފޮނުވާ