ބޮލީވުޑްގެ މަޝްހޫރި މިއުޒިކް ޑައިރެކްޓަރ ސާޖިދް އަލީ ޚާންގެ ނަން ސާޖިދް ވާޖިދަށް ބަދަލިކޮށްފި އެވެ.
ސާޖިދް ވާޖިދްގެ ނަމުން ބޮލީވުޑްގައި މަޝްހޫރުކަން ހޯދި ދެބެންގެ ތެރެއިން ކޮއްކޮ ވާޖިދް އަލީ ޚާން ވަނީ މިދިޔަ އަހަރު ކޯވިޑަށް ފަަރުވާދެމުންދަނިކޮށް ކިޑްނީ މައްސަލަތަކެއް ދިމާވެގެން މަރުވެފަ އެވެ.
1998 ވަނަ އަހަރު ސަލްމާން ޚާންގެ "ޕިޔާރްކިޔާތޯ ޑަރްނާކިޔާ"ގެ ލަވަޔަކުން ދެބޭން އެކުގައި މިއުޒިކް ކޮމްޕޯޒްކުރަން ފަށައި މިހާތަނަށް އައި އިރު ގިނަ އެވޯޑްތަކެއް ވެސް ސާޖިދް ވާޖިދްގެ ނަމުގައި ވަނީ ހޯދާފައެވެ. އެހެންކަމުން މުޅި އިންޑަސްޓްރީގައި ވެސް އެ ދެމީހުން މަޝްހޫރު ވެފައި ވަނީ ސާޖިދް ވާޖިދްގެ ނަމުންނެވެ. އަދި ގިނަމީހުނަށް އެ ދެ މީހުން އެނގެނީވެސް އެ ނަމުންނެވެ.
ކޮއްކޮ ވާޖިދް މަރުވުމާއި ގުޅިގެން ސާޖިދްގެ ނަން ސާޖިދް ވާޖިދަށް ބަދަލުކުރީ ދެބޭންގެ ނަން އަބަދަށް ދެމެހެއްޓުމަށްޓަކައި ކަމަށް ސާޖިދު ވަނީ ބުނެފައެވެ. އެގޮތުން ކޮއްކޮގެ ނަން މީހުންގެ ހިތްތަކުގައި އަބަދަށް ބެހެއްޓުމަށް ނަން ބަދަލުކުރީ ކަމަށް އޭނާވަނީ ބުނެފައެވެ.
View this post on Instagram
މި ދެބެން އެކުގައި ވަނީ މަޝްހޫރި އެތަށްގިނަ މިއުޒިކްތަކެއް ތައްޔާރުކޮށްފައެވެ. އޭގެތެރޭގައި "މާޝައްﷲ"، "ސޯނީދެ ނަކްރޭ"، "ހުޑް ހުޑް ދަބަންގް" ފަދަ މަޝްހޫރު ލަވަތަށް ހިމެނެއެވެ. މީގެ އިތުރުން އައިޕީއެލްގެ މަޝްހޫރު ތީމް "ދޫމް ދޫމް ދޫމް ދަޑާއްކާ" އަކީވެސް މި ދެބެންގެ ކޮމްޕޮސިޝަނެކެވެ. މީގެ އިތުރުން ސަލްމާންގެ ކާމިޔާބު ގިނަ ފިލްމ ުތަކަކަށް ސާޖިދް ވާޖިދް ވަނީ މިއުޒިކް ތައްޔާރުކޮށްދީފައެވެ.
