ދީޕިކާ ޕަޑުކޯން އާއި ރަންވީރު ސިންގް އަކީ ބެލުތެރިންގެ މެދުގައި މަޤްބޫލު ޖޯޑެކެވެ. ކުޅަދާނަ ޑައިރެކްޓަރ ސަންޖޭ ލީލާ ބަންސާލީގެ ފިލްމުތައް ކަމަށްވާ "ގޯލިޔޯންކީ ރަސީލާ، ރާމްލީލާ"، "ބާޖީރާއޯ މަސްތާނީ" އަދި "ޕަދްމާވަތު" ފަދަ ފިލްމުތަކަކީ ދީޕިކާ އާއި ރަންވީރު ސިންގް އެކުގައި ކުޅެފައިވާ، ބޮކްސް އޮފީހުގައި ކާމިޔާބު ފިލްމުތަކެވެ.
މި ފިލްމުތަކުގައި ދީޕިކާ ދައްކައިދިން މޮޅު އެކްޓިންގގެ ސަބަބުން އެތަކެއްބައެއްގެ ހިތުން ޖާގަ ވަނީ ހޯދާފައެވެ. ނަމަވެސް "ބާޖިރާއޯ މަސްތާނީ" އަދި "ޕަދްމާވަތު" މި ދެ ފިލްމުގައި ދީޕިކާ ކުޅެފައިވާ ރޯލު ފުރަތަމަ ހުށަހަޅާފައި ވަނީ އައިޝްވާރީއާ ރާއި ބަޗަން އަށެވެ.
ސްޕޮޓް ބޯއި އަށް ދިން އިންޓަވިއުއެއްގައި އައިޝްވާރިއާ ބުނެފައިވަނީ މި ދެ ފިލްމުވެސް އޭނާއަށް ސަންޖޭ ފުރަތަމަ ހުށަހެޅި ނަމަވެސް ދިމާވީ ހަމަ އެއް މައްސަލައެއް ކަމަށެވެ. ދެ ފިލްމުގައި ވެސް އޭނާއާއެކު ލީޑުރޯލަށް މެޗްވާނެ ފިރިހެން ތަރިއެއް ނުލިބުނު މައްސަލައެވެ.
" ފުރަތަމަ މަސްތާނީ އަށް ބާޖީރާއޯއެއް ނުހޯދުނު، ދެން ޕަދްމާވަތު އަހަރެންނަށް ހުށަހެޅި ނަމަވެސް ކިލްޖީ އެއް ނުހޯދުނު، މިއީ މި ދެފިލްމުވެސް އަތުން ދިޔަގޮތް" – އައިޝްވާރިއާ
މިހެން ކަންތައްތައް ދިމާވިނަމަވެސް އައިޝްވާރިއާ އާއި ސަންޖޭ އަކީވެސް ދެމީހުން އެކުގައި މަސައްކަތްކުރަން ވަރަށް ބޭނުންވާ ދެމީހުންކަމަށްވެސް އައިޝްވާރިއާ ވަނީ ބުނެފައެވެ. ފިލްމު "ހަމް ދިލްދޭޗުކޭ ސަނަމް" އާދި " ދޭވްދާސް" އަކީ މި ދެމީހުން އެކުގައި ކޮށްފައިވާ ކާމިޔާބު މަސައްކަތްތަކެވެ.
View this post on Instagram
އައިޝްވާރިއާ މިހާރު މަސައްކަތް ކުރަމުންދަނީ ތަމަޅަ ފިލްމެއް ކަމަށްވާ "ޕޮނިޔިން ސެލްވަން" ގައެވެ. މި ފިލްމުގައި އައިޝްވާރިއާގެ އިތުރުން ޗިޔާން ވިކްރަމް، ޓްރިޝާ، ޖަޔަމް ރަވީ، ވިކްރަމް ޕްރަބޫ އަދި ސަރަތް ކުމާރް ފެނިގެންދާނެއެވެ.
