ބޮލީވުޑްގެ ޒުވާން ދެ ތަރިން ކަމަށްވާ ތާރާ ސުތާރިއާ އާއި ސިއްދާންތު ޗަތުރުވެދީ ވެސް ކޯވިޑަށް ޕޮޒިޓިވްވެއްޖެ އެވެ.
ފާއިތުވި ހަފްތާ އަކީ ބޮލީވުޑް އިން ގިނަ އަދަދެއްގެ ތަރިން ކޯވިޑަށް ޕޮޒިޓިވްވީ ހަފްތާއެކެވެ. ހާއްސަކޮސް މަހާރާޝްތުރާ ސްޓޭޓުގައި ކޯވިޑް ފެތުރޭ މިންވަރު އިތުރުވެ، ގިނަ ތަރިންނަށްވެސް ކޯވިޑާއި ކުރިމަތިލާން ޖެހިފައި ވަނީ އެ ސްޓޭޓުންނެވެ.
ސިއްދާންތު ކޯވިޑަށް ޕޮޒިޓިވްވީކަން ސޯޝަލް މީޑިއާ މެދުވެރިކޮށް އޭނާ ޔަގީންކޮށްދީފައި ވީނަމަވެސް ތާރާ ޕޮޒިޓިވް ވީކަން އޭނާ އަދި މިހާތަނަށް ޔަގީންކޮށްދީފައެއް ނުވެއެވެ. ނަމަވެސް އޭނާގެ ގާތް ފަރާތަކާއި ހަވާލާދި ރިޕޯޓްތަށް ބުނާގޮތުގައި ތާރާވެސް ކޯވިޑަށް ޕޮޒިޓިވްވުމުގެ ސަބަބުން މިހާރު ގެންދަނީ ފަރުވާ ހޯދަމުންނެވެ.
ސިއްދާންތު ސޯޝަލް މީޑިއާއަށް ދޫކޮށްލި ޕޯސްޓްގައި ބުނެފައި ވަނީ އޭނާ ބައްޔަށް ޕޮޒިޓިވްވީ ނަމަވެސް ހާލު ރަނގަޅު ކަމަށެވެ. އަދި އަމިއްލައަށް ކަރަންޓީނުވެ ޑޮކްޓަރުންގެ ލަފާ ހޯދަމުން ގެންދާކަމަށް ވަނީ ބުނެފައެވެ. އޭނާ ޕޮޒިޓިވްވެފައި މިވަނީ ކެޓްރީނާ އާއި އިޝާން އާއެކު ޕޯން ބޫތުގެ މަސައްކަތްތަކުގައި އުޅެނިކޮށެވެ.
ތާރާ އެންމެ ފަހުން މަސައްކަތްކުރީ އަހާން ޝެއްޓީއާ އެކު "ތަޑަޕް"ގެ ޝޫޓިންގތަކުގަ އެވެ.
މި ފަހުން އިންޑިއާގެ ފިލްމް އިންޑަސްޓްރީން ކޯވިޑަށް ޕޮޒިޓިވްވި ތަރިންގެ ތެރޭގައި ރަންބީރް ކަޕޫރު، ޑައިރެކްޓަރ ސަންޖޭ ލީލާ ބަންސާލީ، މަނޯޖް ބަޖްޕާއީ، އަދި މަޝްހޫރު ވިލަން އަޝިޝް ވިދްޔާތީ ހިމެނެއެވެ.
