ކުޅަދާނަ އެކްޓަރ މަނޯޖް ބަޖްޕާއީ އާއި ނުބައިބައި ރޯލުތަކުން މަޝްހޫރު ވި އަޝިޝް ވިދްޔާތީ ކޯވިޑަށް ޕޮޒިޓިވްވެއްޖެ އެވެ.
މަނޯޖް ކޯވިޑަށް ޕޮޒިޓިވް ވީކަން ބޮލީވުޑްގެ ޚަބަރުތައް ގެނެސްދޭ ނޫސްތަކުން އިއްޔެ ރިޕޯޓްކޮށްފައި ވާއިރު، އަޝިޝް ޕޮޒިޓިވް ވީކަން އިއްޔެ ހާމަކޮށްފައި ވަނީ އޭނާގެ އިންސްޓަގްރާމްގައި ޕޯސްޓްކުރި ވީޑިއޯއެއްގައެވެ. އަޝިޝްގެ މި ވީޑިއޯގައި ވާނީ އޭނާއާއި ބައްދަލުވީ އެންމެން ވެސް ކޯވިޑަށް ޓެސްޓްކުރުމަށް އިލްތިމާސްކޮށްފައެވެ. އަދި އޭނާ މިވަގުތު ދިއްލީގެ ހޮސްޕިޓަލެއްގައި އޮތް ނަމަވެސް ހާލު ވަރަށް ރަނގަޅުކަމަށް ވަނީ ބުނެފައެވެ.
View this post on Instagram
މަނޯޖް ޕޮޒިޓިވް ވީ އޭނާގެ ކުރިއަށް އޮތް ފިލްމު "ޑިސްޕެޗް" ގެ ޝޫޓިންގ ގައި މަހާރާޝްތުރާގައި އުޅެނިކޮށެވެ. އަދި މިވަގުތު ގޭގައި ކަރަންޓީނުވެގެން ހުރި އިރު އޭނާގެ ހާލުވެސް ރަނގަޅުކަމަށް ރިޕޯޓްތައް ބުނެއެވެ.
މަނޯޖް ޕޮޒިޓިވް ވެފައި މިވަނީ އެ ފިލްމުގެ ޑައިރެކްޓަރ ކަނޫ ބެހްލް ވެސް ކޯވިޑަށް ޕޮޒިޓިވް ވެފައި ވަނިކޮށެވެ. އެހެންކަމުން އެ ފިލްމުގެ މަސައްކަތްތައް މިވަގުތަު ވަނީ މަޑުޖައްސާލާފައެވެ.
ފިލްމު "ޑިސްޕެޗް" އަކީ ކްރައިމް ޖާނަލިސްޓެއްގެ މައްޗަށް ބިނާކޮށް ހަދާ އިންވެސްޓިގޭޓިވް ތްރިލަރ ފިލްމެކެވެ.
