އިންޑިއާގެ ޓީވީ އިންޑަސްޓްރީގެ އެންމެ މަގްބޫލު "ބަހޫ" ނުވަތަ ޅީދަރި، ދެވޮލީނާ ބައްޓަޗަރްޖީ ބުނެފައިވަނީ އޭނާ ކައިވެނި ކުރަން ވިސްނަނީ އަންނަ އަހަރުގައި ކަމަށެވެ. އިތުރަށްވާހަކަ ދައްކަމުން ދެވޮލީނާ ބުނެފައިވަނީ އޭނާ ރައްޓެހިވެގެން އުޅެނީ ވިޔަފާރިވެރިއަކާ ކަމަށާއި އޭނާއަކީ މުނިފޫހިފިލުވުމުގެ ދާއިރާއަށް ނިސްބަތް ނުވާ މީހެއްކަމަށެވެ.

ދެވޮލީނާ އޭ ބުނުމުން ނޭގޭނީ މަދު ބަޔަކަށެވެ. އެންމެ ބޮޑަށް އޭނާ މަޝްހޫރުވެގެން ގޮސްފައިވަނީ "ސާތު ނިބާނާ ސާތިޔާ" އިންނެވެ. އޭނާ އަކީ އިންޑިއަން ޓެލެވިޝަންގް އެންމެންގެ ފޭވްރިޓް "ބަހޫ"އެވެ.

އަދި މީގެ އިތުރުން ދެވޮލީނާ ވަނީ ބިގް ބޮސް 14 އިން އެއިޖާޒް ޚާންގެ ޕޮރޮކްސީގެ ގޮތުގައި ފެނިގެން ގޮސްފައެވެ. ދެވޮލީނާއަކީ ސޯޝަލް މީޑީއާގައި ވަރަށް ހަރަކާތްތެރި ތަރިއެކެވެ. އެގޮތުން ވަރަށް ފަހުން ކުރި އިންޓަވިއުއެއްގައި އޭނާ ވަނީ އޭނާގެ ލޯބީގެ ހަޔާތުގެ ވާހަކަ ދައްކާފައެވެ.

އެގޮތުން އޭނާ ބުނެފައިވަނީ އޭނާ ކައިވެނި ކުރަން ވިސްނާފައިވަނީ މިއަންނަ އަހަރުގައި ކަމަށެވެ. އެހެންނަމަވެސް އޭނާ ރައްޓެހިވެގެން އުޅޭ މީހެއްގެ ނަމެއް ބުނެފައެއް ނުވެއެވެ. މިކަމުގެ ސަބަބެއް ކަމުގައި އޭނާ ބުނެފައިވަނީ އޭނާ އަކީ ވަރަށް "ސުޕާސިޓީޝަސް" މީހެއް ކަމަށާއި އަދި އެސްފީނާ ޖެހިދާނެ ކަމަށް ގަބޫލުކުރާތީ ކަމަށް އޭނާ ވަނީ ބުނެފައެވެ.

ދެވޮލީނާ ބޭނުން ވަނީ ވަރަށް އާދައިގެ ދިރިއުޅުމެކެވެ. އެގޮތުން އޭނާ ބޭނުންވަނީ މަސައްކަތާއި އަމިއްލަ ދިރިއުޅުން ވަކިން ކުރިއަށް ގެންދިއުމެވެ. މި ދާއިރާގައި ނޫޅޭ މީހަކާއި ގުޅުމުގެ ސިއްރަކީ މިއީކަމަށްވެސް އޭނާ ވަނީ ބުނެފައެވެ. އަދި އޭނާ ބުނެފައިވާ ގޮތުގައި އޭނާއަކީ އާއިލާއާއި އެކުގައި ވަގުތު ހޭދަކުރުމަށް ލޯބިކުރާ މީހެކެވެ.