ބޮލީވުޑްގެ ތަރި ނީނާ ގުޕްތާއަކީ ފަހަކަށް އައިސް އާންމުކޮށް މަންމަގެ ރޯލުން ފެންނަ ތަރިއެކެވެ. ނަމަވެސް ކަސްރަތާއި ފެޝަނަށް ލޯބިކުރާ މި ތަރިއަށް މަންމަގެ ރޯލު ނުގުޅޭކަމަށް އޭނާއާއެކު މަސައްކަތްކުރާ ގިނަ އެކްޓަރުން ވެސް ބުނަމުންގެންދެއެވެ.
ނީނާގެ ފެޝަން ސްޓައިލާއި ޔޯގާއަށް އޮތް ލޯބި އޭނާގެ އިންސްޓަގްރާމް އެކައުންޓަށް ބަލާލަުމުންވެސް އެނގެއެވެ.
ނަމަވެސް ވެސް ނީނާގެ ކުރިއަށްއޮތް ފިލްމުން އޭނާ ފެނިގެން ދަނީ މާމައެއްގެ ރޯލުންނެވެ. ނެޓްފްލިކްސް އިން އިއުލާންކުރި ފިލްމު "ސަރްދާރްކާ ގްރޭންޑް ސަން"ގެ ފަސްޓްލުކް މިއަދު ނެޓްފްލިކްސް އިންޑިއާއިން ދައްކާލާފައި ވާއިރު ނީނާ އާއެކު ފިލްމުގެ ލީޑުން ފެނިގެންދަނީ އަރްޖުން ކަޕޫރާއި ރަކުލް ޕްރީތު ސިންގް އެވެ. ފިލްމުގައި އެންމެ ތަފާތުކޮށް ފެންނަނީ ނީނާ އެވެ. އެގޮތުން އަރްޖުންގެ މާމައެއްގެ ގޮތުގައި ނީނާ ފެންނަނީ ވަރަށް މުސްކުޅި މީހެއްގެ ގޮތުގައެވެ.
View this post on Instagram
މިއަހަރު ނެޓްފްލިކްސް އިން ބެލުންތެރިންނާ ހަމައަށް ގެނެސްދިނުމަށް މަސައްކަތްކުރާ މި ފިލްމުން ފެންނާނެ އިތުރު ތަރިންނަށް ބަލާއިރު، އަދިތީ ރާއޯ ހައިދަރީ، ޖޯން އަބްރަހަމް އަދި އާލިއާ ބަޓްގެ މަންމަ ސޯނީ ރާޒްދާން ފަދަ ތަރިން ފާހަގަކޮށްލެވެއެވެ.
ފިލްމުގައި ދައްކައިދެނީ އެމެރިކާގައި ދިރިއުޅެފައި އަންނަ މާމަދަރިފުޅު މާމަގެ އެންމެ ފަހުގެ ވަސިއްޔަތް ފުރިހަމަ ކޮށްދިނުމަށް ކުރާ މަސައްކަތެވެ.
ފިލްމުގައި އަދާކުރާ ރޯލާ ގުޅޭގޮތުން ނީނާ ބުނީ މިއީ އޭނާ މިހާތަނަށް ކުޅޭ އެންމެ ތަފާތު ރޯލު ކަމަށާއި ބެލުންތެރިން އޭނަގެ މިރޯލު ބަލައިގަންނަނީ ކިހިނެތްތޯ ބަލާލުމަށް ކެތްމަދުވެފައި ވާކަމަށެވެ. އަދި މިއީ އަސަރުގަދަ ބައިތަކަކާއި ހެއްވާ މަޖާ ކަންކަންވެސް ފެންނާނެ ފިލްމެއް ކަމަށް ނީނާ ވަނީ ބުނެފައެވެ.
61 އަހަރުގެ ނީނާގެ ފަހުގެ ފިލްމުތަކުގެ ތެރޭގައި "ބަދާއި ހޯ"، "ޕަންގާ" އަދި "ޝުބް މަންގަލް ޒިޔާދާ ސާވްދާން" ފަދަ ފިލްމުތައް ހިމެނެއެވެ.
